شىمكەنتتەگى «تۇركىستان سارايى» سالتانات سارايىنىڭ جانىنان  ايتىسكەر اقىندار ورتالىعى اشىلدى. ورتالىقتىڭ جۇمىسىن باستاۋىنا وراي، رەسپۋبليكاعا تانىمال وڭتۇستىكتىڭ بەتكە ۇستار اقىندارى ءبىرجان بايتۋوۆ، بەكمۇرات انارباي، نۇرلان ەسەنقۇلوۆ، قاجىمۇحان ابزالوۆ جانە وزگە دە ونەر يەلەرى  دوڭگەلەك ۇستەل باسىندا باس قوستى.

اقىندىق ونەردىڭ ۇمىت بولا باستاعان تۇرلەرىن جانداندىرىپ، جاس اقىنداردى انىقتاۋ، ولاردىڭ ولەڭدەرىن ناسيحاتتاۋ جانە شىعارماشىلىعىنا قولداۋ كورسەتۋ ماقساتىندا اشىلعان ورتالىقتىڭ الداعى مىندەتتەرى جايلى ءسوز باستاعان «تۇركىستان» سارايىنىڭ ديرەكتورى ك.ايداربەكوۆا جاس اقىنداردىڭ ءسوز ساپتاۋىن، ادەبيەتىمىز بەن تاريحىمىزدى تەرەڭ زەرتتەپ، ەل الدىندا اشىق ويىن ايتا بىلەتىن دەڭگەيگە جەتكىزۋ قاجەتتىگىن ءتۇسىندىردى.  

اقىندار - قاجىمۇحان ابزالوۆ پەن ءبىرجان بايتۋوۆ اپتانىڭ ءار سەيسەنبى كۇنى وسى ورتالىقتا كەزدەسىپ، جۇمىس اتقاراتىندارىن مالىمدەدى. سونداي-اق، «تاۋەلسىزدىكتىڭ 25 جىلدىعىنا» وراي «تۇركىستان» سارايىندا  اقىندار ايتىسىن ۇيىمداستىرۋدى جانە سول ايتىسقا اقىندار ورتالىعىندا  دايىندىق جۇمىستارىنىڭ  جۇرگىزەتىنىن ايتتى.  

ايتا كەتەيىك، وسىنىڭ الدىندا وقو اكىمى ءبىر توپ زيالى قاۋىم وكىلدەرىمەن كەزدەسكەنىن حابارلاعان ەدىك.

بەيرەسمي باسقوسۋدا وبلىستىڭ الەۋمەتتىك ماسەلەلەرى تالقىلانىپ، ونىڭ شەشۋ جولدارى بويىنشا ايماق باسشىسى ومىردەن تۇيگەنى مول ەل اعالارىنىڭ  پىكىرىن تىڭدادى.

ازىرگە، وڭتۇستىك قازاقستان وبلىسىنىڭ تىنىس-تىرشىلىگىمەن تانىسىپ جاتقانىن ايتقان وبلىس اكىمى الداعى ۋاقىتتا بىرلەسە اتقاراتىن مىندەتتەردىڭ كوپ ەكەنىن جەتكىزدى.

سونداي-اق، حالىقتىڭ ءال-اۋقاتىن كوتەرۋگە باعىتتالعان جۇمىستاردا ءاربىر سالانىڭ ەڭبەك ارداگەرلەرىمەن جەكە كەزدەسىپ، كەڭەسكىسى كەلەتىنىنە نيەت ءبىلدىردى.

كەزدەسۋ سوڭىندا زيالى قاۋىم وكىلدەرى مەن قازىنالى قاريالار اكىمنىڭ وبلىستى باسقارۋداعى جۇمىسىنا ساتتىلىك تىلەپ، باتالارىن بەردى.

جالپى وبلىستا بۇگىنگى كۇندە 220 مىڭعا جۋىق زەينەتكەر تۇرادى. ولاردىڭ 300-ءى ۇلى وتان  سوعىسىنىڭ ارداگەرى بولسا، 21 مىڭى تىل ەڭبەككەرلەرى.

وقو اكىمىنىڭ ءباسپاسوز قىزمەتى