وڭتۇستىك قازاقستان وبلىسى، ورداباسى اۋدانىنداعى كوكتوبە اۋىلىنىڭ تۇرعىندارى قۋانىشقا كەنەلدى. قوس كاسىپكەر ج.ومىرزاقوۆ پەن س.دامىرقاجى دەمەۋشىلىك جاساپ، كوكتوبە اۋىلىنا ءزاۋلىم مەشىت تۇرعىزدى. بۇل تۋرالى «Abai.kz» پورتالى وقو، ورداباسى اۋدانى اكىمىنىڭ رەسمي ينتەرنەت رەسۋرسىنا سىلتەمە جاساي وتىرىپ حابارلايدى.

بۇل كۇنگە دەيىن تۇرعىندار 1830 جىلى قابىرعاسى قالانعان ءجۇنىس ءاجى اتىنداعى مەشىتتىڭ قىزمەتىن پايدالانىپ كەلدى. كوكتوبەلىك قاريا ب.يساقوۆ ەسكى عيماراتتىڭ ءۇش عاسىرعا كۋا بولعانىن ايتادى. اۋىل تۇرعىندارى جىلدا ءوز كۇشتەرىمەن جوندەۋ جۇمىستارىن جۇرگىزىپ، عيماراتتى جارامدى كۇيگە كەلتىرىپ تۇرعان.

قازاقستان مۇسىلماندارى ءدىني باسقارماسىنىڭ وڭتۇستىك قازاقستان وبلىسى بويىنشا وكىل يمامى ا.كەرىمبەك جاماعاتتى ايتۋلى كۇنمەن قۇتتىقتاپ، باس ءمۋفتيدىڭ ىزگى تىلەگىن جەتكىزدى. "داۋلەتالىۇلى بەگالى اتا" مەشىتىنىڭ يمامى ب.ءاشىرباي يگى ءىستىڭ باسى-قاسىندا جۇرگەن ازاماتتارعا العىس حات تابىستادى.

رەسپۋبليكاعا اتى بەلگىلى جاس ايتىسكەر-اقىن ءبىرجان بايتۋوۆ جومارت جانداردىڭ ساۋاپتى ءىسىن جىرمەن ارلەپ، كوپشىلىككە ۇسىندى. اۋدان اكىمىنىڭ ورىنباسارى ءا.سادىرمەك، قاجىمۇقان اۋىل وكرۋگى ارداگەرلەر كەڭەسىنىڭ توراعاسى ل.ءجۇسىپ كوكتوبەلىكتەردى قۇتتىقتاپ، مەشىت سالۋدىڭ ساۋابى جونىندە اڭگىمەلەدى. اۋىل تۇرعىندارى ءوز تاراپىنان دەمەۋشى جىگىتتەرگە تۇلپار مىنگىزىپ، العىسىن ءبىلدىردى.

Abai.kz