بۇكىل رەسپۋبليكاعا «اق التىن ءوندىرۋ زاۋىتى» دەگەن اتپەن تانىلعان ماقتارال اۋدانىنىڭ شارۋالارى سوڭعى 10 جىلدا قاۋىن-قاربىز وسىرۋمەن دە تانىمال بولا باستادى. بۇگىندە ماقتارالدىق ديقاندار قاۋىن-قاربىز ءوسىرۋدى شەبەر مەڭگەرىپ، باقشا داقىلدارىنىڭ ەكسپورتقا جارامدى نەشە ءتۇرلى سورتتارىن جاساپ شىعارۋدا.

ءبىر عانا مىسال، ماقتارالدىق ديقاندار بيىل 28 مىڭ گەكتار جەردەن 610 مىڭ توننا قاۋىن-قاربىز السا، سونىڭ 450 مىڭ تونناسىن شەت ەل نارىعىنا شىعارعان. بۇل گەكتارىنان 263 تسەنتنەردەن ءونىم الىپ، وتكەن جىلمەن سالىستىرعاندا 25 تسەنتنەرگە ارتىق قاۋىن-قاربىز جيناعان مىرزاشولدىكتەر باقشا داقىلدارىن وسىرۋدەن ورتا ازيانىڭ كوشباسشىسى ەكەندىگىن دالەلدەيدى.

ماقتارالدىڭ باۋ-باقشا ونىمدەرىنەن كول-كوسىر پايدانى رەسەيلىك جانە بەلارۋستىك كاسىپكەرلەر دە كورىپ وتىر. وڭتۇستىكتەن جەتكەن قاۋىن-قاربىزدى وسى تەرىسكەيدەگى كورشىلەر باتىس ەۋروپا مەملەكەتتەرىنە تاسىمالدايدى ەكەن.

ماسەلەن، رەسەيلىك بيزنەسمەن ستانيسلاۆ كاسپاروۆ: «ماقتارالدى «قاۋىن-قاربىزدىڭ وتانى» دەپ سانايمىز. بۇل جەردىڭ قاۋىن-قاربىزىنىڭ ءدامى ەرەكشە ءتاتتى. سول سەبەپتى، ماسكەۋ مەن مينسك قالالارى وسى جەردىڭ ونىمىنە تاپسىرىس بەرەدى. ءبىز وسى جەردەن جەتكىزىپ تۇرامىز»، - دەيدى ءبىر سۇحباتىندا.
     ايتا كەتۋ كەرەك، ورتا ازيادا تۇركىمەنستان، تاجىكستان جانە وزبەكستان ەلدەرى قاۋىن وسىرۋمەن اينالىسادى. دەگەنمەن، «ەۋرازيالىق ەكونوميكالىق وداقتىڭ» ارقاسىندا ماقتارال اۋدانىنىڭ شارۋالارى ونىمدەرىن رەسەي مەن بەلورۋسسياعا وڭاي ەكسپورتتاپ، كەدەندىك ماسەلەلەردىڭ بولماۋىنىڭ ارقاسىندا شەت ەلدەرگە جول تارتۋدا.

ماقتارال اۋدانى اكىمىنىڭ ءباسپاسوز قىزمەتى