وڭتۇستىك قازاقستان وبلىسى ماقتارال اۋدانى، مىرزاشولدىك شارۋالار ماقتا قىرمانىن «اق التىنعا» تولتىرىپ جاتىر. اق ماقتانى قىركۇيەك ايىنان باستاپ تەرە باستاعان قوجالىقتار بۇگىنگە دەيىن 53 مىڭ گەكتار ماقتالىقتان 110 مىڭ توننا ءشيتتى ماقتا جيناپ ۇلگەردى. ونىڭ 44 مىڭ تونناعا جۋىعى قولمەن تەرىلسە، 66 مىڭ توننادان استامى ارنايى تەحنيكامەن جينالعان. بۇل تۋرالى "اباي اقپارات" پورتالى وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

تۇسىمدىلىك تە كوڭىل كونشىتەدى. ءار گەكتاردان بولجامدىق شامامەن 24,1 تسەنتنەردەن «اق التىن» الىنۋدا. بۇگىنگە دەيىن جالپى ماقتالىق القاپتارىنىڭ 64 پايىزىن جيناعان ماقتاشىلار ءبىرىنشى تەرىمدى اياقتاپ، ەكىنشى تەرىمگە كوشۋدە. ول ءۇشىن اۋدان كولەمىندە 297 دانا ءتۇرلى كومبايندار مەن 10 مىڭنان استام ادام ماقتا تەرىم ناۋقانىنا قاتىسۋدا. 

«ماقتانىڭ باعاسى بيىل جامان ەمەس. كەلىسىن 155-160 تەڭگەدەن وتكىزىپ جاتىرمىز. ونىمدىلىگى دە جىلداعىدان ايتارلىقتاي جوعارى. قۇدايعا شۇكىر، بيىل ءبىر بايىپ قالاتىن بولدىق»، - دەيدى شارۋا الدان سارسەنباەۆ.

ايتا كەتەيىك، بيىل ماقتارالدىق شارۋالار ماقتا القاپتارىنىڭ كولەمىن جىلداعىمەن سالىستىرعاندا 6 مىڭ گەكتارعا ارتتىرىپ، 83 مىڭ گەكتار جەرگە ماقتا ءشيتىن ەكتى. جيىن-تەرىم ناۋقانىنىڭ سوڭىنا دەيىن مىرزاشولدە 200 مىڭ توننادان استام اق ماقتا جيناۋ كۇتىلۋدە.   

اباي اقپارات