ۇقك: سوڭعى 5 جىلدا سيرياعا كەتپەك بولعان 560 ادامنىڭ جولى كەسىلگەن
سوڭعى بەس جىلدا ەلدىڭ كۇش قۇرىلىمدارى تەرروريستەردىڭ بەلسەندى ايماعىنا بارماق بولعان 559 قازاقستاندىقتىڭ جولىن كەسكەن. وسىلاي دەپ بەيسەنبى كۇنى استانادا ۇلتتىق قاۋىپسىزدىك كوميتەتى (ۇقك) توراعاسىنىڭ ورىنباسارى نۇرعالي بىلىسبەكوۆ مالىمدەدى.
ول بەس جىلدىڭ ىشىندە قازاقستاندا تەرروريستىك جانە ءدىني-ەكسترەميستىك پيعىلدا قىلمىس جاساعان 445 ادامنىڭ سوتتالعانىن اتاپ ءوتتى. ولاردىڭ 25-ىنە ۇستىمىزدەگى جىلى ۇكىم شىققان.
پارلامەنتتىڭ جاڭا جۇمىس سەسسياسى باستالعالى بەرى، زاڭ شىعارۋشى مەكەمە «ەكسترەميزم جانە تەرروريزمگە قارسى تۇرۋ ماسەلەلەرى جونىندەگى» زاڭ جوباسىنا وزگەرىستەر ەنگىزۋ قاراستىرىلىپ جاتىر. قازاقستان پرەزيدەنتى 1-قىركۇيەكتە پارلامەنتتە دەپۋتاتتارعا اتالعان زاڭ جوباسىن قابىلداۋ جونىندە تاپسىرما بەرگەن.
پارلامەنتتەگى «ەكسترەميزم مەن تەرروريزمنىڭ الدىن الۋداعى زاڭدىق شارالار» دەپ اتالاتىن دوڭگەلەك ۇستەلدە ءسوز سويلەگەن بىلىسبەكوۆ سوڭعى جىلدارى ەلدە تەراكتى جاساماق بولعان راديكالدى توپتاردىڭ تىكەلەي حالىقارالىق تەرروريستىك ۇيىمداردىڭ نۇسقاۋى بويىنشا جۇمىس ىستەگەنىن ايتادى.
Abai.kz
