ELSANA-AMANAT قوعامدىق قورى مەن «نۇر وتان» پارتياسىنىڭ «جاس وتان» جاستار قاناتىنىڭ استانا قالالىق فيليالى بىرىگىپ، قوعامدىق جانە مەملەكەتتىك تاراپتار اراسىندا ديالوگ ورناتۋ ماقساتىمەن، «سۇحبات-الاڭ» جوباسىنىڭ العاشقى وتىرىسىن 2016ج 23 قىركۇيەكتە وتكىزدى. جوبانىڭ العاشقى وتىرىسى «قازاقشا جارنامانى كۇشەيتۋ تەتىكتەرى» تاقىرىبىنا ارنالدى. جوبا جونىندە وسى سالا بويىنشا مامان زەمفيرا ەرجان حانىم بايانداما جاسادى.

وتىرىسقا  پۋبليتسيست، مادەنيەتتانۋشى سەرىك ەرعالي  مودەراتور بولدى. ز.ەرجان ءوزىنىڭ بايانداماسىندا قازاقشا جارناماداعى قاتەلىكتىڭ تۇپكى نەگىزى جارنامانىڭ لوكالدانباي وتىرعاندىعىنان، ياعني ەلدىڭ تىلدىك ەرەكشەلىگىنە،رۋحاني قۇندىلىعىنا سايكەس بەيىمدەلمەي، مەحانيكالىق جولمەن اۋدارىلا سالۋىندا ەكەندىگىن جانە قاتەلەردىڭ باقىلاۋدان تىس قالعاندىعىن كەلتىردى.  

وتىرىسقا قاتىسقان باق وكىلدەرى مەن جارناماشىلار بۇل ماسەلە بويىنشا ءتۇرلى باعىتتا جوبالار اتقارىلۋى كەرەكتىگىن ايتتى. بۇعان اسىرەسە، جارناما اگەنتتىكتەرىن تارتىپ، ارنايى تۇردە قارالۋى قاجەتتىگىن جانە بۇل سالادا ساناۋلى مونوپوليست اگەنتتەر بار ەكەنىن جاسىرمادى. تۇپتەپ كەلگەندە ولار قازاقشا جارنامانى بولماشى اقىعا ءبىلىمى مەن بىلىگى تومەن ماماندارعا جاساتا سالاتىنى جاريا ەتتى. 

جارناما ماسەلەسىنە ءتيىستى ءتىل سالاسىنىڭ ورگاندارى ارالاسپاي وتىرعاندىعى دا ءسوز بولدى. جەرگىلىكتى وڭىرلەردەگى قازاقشا جارنامانىڭ قاتەلىگى كەيبىر ءتىل سالاسىنداعى مەملەكەت تاراپىنان باقىلاناتىن  ۇيىمدار تاراپىنان  جاسالعان جۇيەنىڭ دۇرىس ەمەستىگى، ءاربىر ءوڭىر بويىنشا 1-2 مامان وتىرىپ، ءماتىنىن تەكسەرەتىندىگى مۇلدەم لوگيكاعا سىيمايتىندىعى ايتىلدى. مۇنداي جۇيە مونپوليالانباي كوممەرتسيالىق جانە قوعامدىق تاراپتا اتقارىلۋى كەرەكتىگىن جانە كەتەتىن قاتەلەرگە اتقارعان مەملەكەتتىك ەمەس قۇرىلىمدار جاۋاپ بەرۋ تيىستىگى كورسەتىلدى.

وكىنىشكە وراي، «سۇحبات-الاڭدا»  كوزدەلگەن تاراپتاردىڭ ديالوگى ورناي قويمادى، ويتكەنى، قازاقتىلدى ورتا ءۇشىن ماڭىزدى ماسەلەگە شاقىرىلعان مادەنيەت جانە سپورت مينيسترلىگى مەن اقپارات جانە كوممۋنيكاتسيا مينيسترلىكتەرى تاراپىنان ەشبىر قىزمەتشى قاتىسپادى.

دەگەنمەن، «سۇحبات-الاڭ» ءوزىنىڭ مۇراتىنا سايكەس  جارناما ماسەلەسىنە جاۋاپتى تاراپتاردىڭ ءالى دە بولسا باسىن قوسىپ، ءىستى تياناقتاۋ قاجەت دەگەن قورتىندىعا كەلدى. ELSANA-AMANAT قورىنىڭ پرەزيدەنتى س.ەرعالي اتالعان جوبا بويىنشا بولاشاقتا مەملەكەتتىك ورگاندارمەن ۇيلەسە جۇمىس جاسايتىندارىنا سەنىمدى ەكەندەرىن ءبىلدىردى.

Abai.kz