وڭتۇستىك قازاقستان وبلىسىنىڭ ورتالىعى – شىمكەنتتە قالا كۇنى مەرەكەسى ايرىقشا تويلانىپ جاتىر. اپتا بۇرىن سەنبىلىكپەن باستالعان مەرەكەلىك شارا بۇگىن دۋمانعا ۇلاستى.

نەگىزگى ساۋىق-سايراندى «قازىنا» ەتنوتاريحي كەشەنىندە وتكىزىپ جاتقان جۇرتشىلىق ناۋرىز الاڭىنداعى مونۋمەنتتى اينالدىرا اق شاڭقاي كيىز ۇيلەر تىكتى. ال ەتنواۋىلداعى شىعارماشىلىق ۇجىم كەلۋشىلەرگە كونتسەرتتىك باعدارلاما ۇسىنۋدا.

مۇنان بولەك، قالانىڭ وتكەنىنەن سىر شەرتەتىن سۋرەت پەن ۇلتتىق قولونەر بۇيىمدارىنىڭ كورمەسى دە وتۋدە. ەڭ نەگىزگىسى - قولىنىڭ قيۋى بار شەبەرلەر جاقىندا عانا بەكىگەن قالانىڭ لوگوتيپىن ءتۇرلى جەمىس-جيدەكتەر مەن كوكونىستەردەن جاساپ شىعىپتى.  

جالپى اۋماعى 117 مىڭ گەكتار جەردى الىپ جاتقان شىمقالا شىعىس باعىتتا دامىپ كەلەدى. ەندى عيماراتتارى حايتەك ستيلىندە سالىناتىن جاڭا ىقشاماۋدان بوي كوتەرىپ جاتىر. 

جەتى كۇنگە سوزىلعان مەرەكەلىك شارانىڭ كورىگىن اتشابارداعى ۇلتتىق ويىندار قىزدارا ءتۇستى. بىلەكتى جىگىتتەر جامبى اتىپ، تەڭگە ءىلدى ءھام كوكپار شاپتى. قىز قۋدان دا قۇر قالعان جوق. 

شاھارلىقتاردىڭ قالا كۇنىن تويلاۋى تۇنگە دەيىن جالعاسپاق. كەشقۇرىم ەلىمىزگە بەلگىلى ونەر جۇلدىزدارىنىڭ قاتىسۋىمەن گالا-كونتسەرت ءوتىپ، وتشاشۋلار بولادى دەپ كۇتىلۋدە.

وقو اكىمىنىڭ ءباسپاسوز قىزمەتى

Abai.kz