وڭتۇستىك قازاقستان وبلىسى اكىمىنىڭ ورىنباسارى قوعامدىق قابىلداۋ وتكىزدى. بۇل تۋرالى «اباي اقپارات» وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

وڭتۇستىك قازاقستان وبلىسى اكىمىنىڭ ورىنباسارى ەربول سادىر بىرقاتار ازاماتتاردى جەكە ماسەلەلەرى بويىنشا قابىلدادى. قوعامدىق قابىلداۋعا كەلگەن ادامداردىڭ باسىم كوپشىلىگى ەكىنشى دەڭگەيلى بانكتەرگە كەپىلدىككە قويىلعان باسپانالارىن قايتا قارجىلاندىرۋ ماسەلەسىن كوتەردى.

ايماق تۇرعىندارىنىڭ ماسەلەسىن مۇقيات تىڭداعان وبلىس اكىمىنىڭ ورىنباسارى قايتا قارجىلاندىرۋ جۇمىستارىن تۇسىندىرە وتىرىپ، الداعى ۋاقىتتا كوميسسيا وتىرىسىندا قارالاتىندىعىن جەتكىزدى.

قايتا قارجىلاندىرۋ جايىنان بولەك، مۇندا الەۋمەتتىك جانە تۇرعىن ءۇي الۋ جايى دا ايتىلدى. ءوز كەزىندە ە.سادىر كوتەرىلگەن ءوتىنىش-تىلەكتەردىڭ ورىندالۋى بويىنشا ءتيىستى باسقارما مەن ءبولىم باسشىلارىنا بىرقاتار تاپسىرمالار جۇكتەدى.

جالپى بۇل كۇنى قوعامدىق قابىلداۋعا 15 ازامات كەلىپ، وزدەرىنىڭ ءوتىنىش-تىلەكتەرىن جەتكىزە الدى.

ايتا كەتەرلىگى ايماق باسشىلارى حالىقپەن قويان-قولتىق جۇمىس جاساپ كەلەدى. تەگىندە ەل باسشىلارى ەلگە ءتۇسىندىرۋ جۇمىستارىن تۇراقتى تۇردە جۇرگىزىپ، ماسەلەنىڭ ءمانىن ايتىپ وتىرسا، حالىق تاراپىنان ۇنەمى قولداۋعا يە بولارى ءسوزسىز. القالى جيىنداردا ەلباسىمىزدىڭ ءوزى حالىققا ءتۇسىندىرۋ جۇمىستارىنىڭ اسا قاجەت ەكەندىگىن ەسكەرتىپ وتىرادى. وڭتۇستىك قازاقستان وبلىسى اكىمىنىڭ ورىنباسارى وتكىزگەن قوعامدىق قابىلداۋ سول يگىلىككە اينالىپ كەلە جاتقان ءداستۇردىڭ ءبىر نىشانى بولسا كەرەك.

وقو اكىمىنىڭ ءباسپاسوز قىزمەتى

Abai.kz