وڭتۇستىك قازاقستان وبلىسى مەن گرۋزيانىڭ شىعىس جانە باتىس  ايماقتارى ءوزارا بايلانىس ءتۇزىپ، ەكىجاقتى ءتيىمدى جوبالاردى بىرىگىپ قولعا الۋدا. بۇل تۋرالى وبلىس اكىمىنىڭ ءباسپاسوز قىزمەتى حابارلادى.

 وسى كۇندەرى گرۋزيا كاسىپكەرلەرى  وڭتۇستىك قازاقستان وبلىسىندا ءتۇرلى جوبالارعا قاتىسۋدا. گۇرجى كاسىپكەرلەرى نەگىزىنەن  وڭتۇستىك ءوڭىرىنىڭ اۋىل شارۋاشىلىعى سالاسىنا  كوپ كوڭىل ءبولىپ، وسى سالادا ارىپتەستىك ورناتۋعا نيەت بىلدىرۋدە. «وزدەرىڭىزگە بەلگىلى، گرۋزيا مەن قازاقستان، ونىڭ ىشىندە، وڭتۇستىك قازاقستان وبلىسى اگرارلى ايماق رەتىندە تانىمال ولكەلەر. سوندىقتان، ءبىزدىڭ تاراپ  قازاقستانمەن اراداعى تاۋار اينالىمىنىڭ ارتۋىنا قىزىعۋشىلىق تانىتىپ وتىر. گرۋزيانىڭ ونىمدەرى قازاقستانعا ەكسپورتتالىپ، سايكەسىنشە، قازاقستاندىق تاۋارلاردىڭ گرۋزيادا يمپورتتالۋىنا ءبىزدىڭ ەل دايىن»، – دەيدى گرۋزيالىق ەلشىسى ز.پاتارادزە.

 گرۋزيالىق كاسىپكەرلەر قازاقستاندىق ارىپتەستەرىمەن ناقتى جوبالاردى ىسكە اسىرۋدى كوزدەپ وتىر. سونىڭ ىشىندە وڭتۇستىك قازاقستان وبلىسىندا دامىپ جاتقان اۋىلشارۋاشىلىعىنا ينۆەستيتسيا سالۋعا اسا ىقىلاستى ەكەندىكتەرىن قايتالاپ ايتۋمەن كەلەدى.

گرۋزيا ەلشىسى وڭتۇستىك قازاقستان وبلىسىنا جاساعان ساپارى بارىسىندا قازاق-گرۋزيا  ىنتىماقتاستىعى ودان ءارى نىعايىپ، جاندانا تۇسەتىندىگىن ايتتى. جيىن سوڭىندا ز.پاتارادزە كۇنگەيدەگى شۋاقتى ولكە – شىمكەنتتىڭ حالقىنا مەيمانقوستىعى مەن قوناقجايلىلىعى ءۇشىن العىس ءبىلدىردى. «وڭتۇستىكتىڭ حالقى ەرەن ەڭبەكقور ەكەن» دەدى ەلشى. 

اباي-اقپارات