قازاقستان رەسپۋبليكاسىنىڭ تاۋەلسىزدىگىنىڭ 25 جىلدىعى  اياسىندا  وڭتۇستىك قازاقستان وبلىسىنىڭ اكىمى ج.تۇيمەباەۆ ءوز سالاسىنىڭ دامۋىنا ۇلەس قوسقان ءبىلىم، دەنساۋلىق جانە مادەنيەت سالالارىنىڭ قىزمەتكەرلەرىنە جالپى 110 ادامعا تۇركيا رەسپۋبليكاسىندا تاجىريبە الماسۋ ءۇشىن جولداما تاپسىرعان بولاتىن، - دەپ حابارلايدى اباي-اقپارات.

2016 جىلعى 14-21 جەلتوقسان ارالىعىندا تۇركيا رەسپۋبليكاسى ستامبۋل قالاسىندا وبلىستىق مەديتسينا سالاسىنىڭ 50 قىزمەتكەرىنە ارنالعان ماستەر-كلاسستار مەن وقىتۋ سەمينارلارى وتكىزىلدى. وقىتۋ ستامبۋل قالاسىنداعى ەڭ ۇزدىك كلينيكالارى  Okan Üniversitesi Hastanesi, Yeditepe Üniversitesi Hastanesi, Acıbadem Hastanesi بازالارىندا جۇرگىزىلدى. سەمينارلار مەن ماستەر-كلاستاردىڭ نەگىزگى باعىتى – جۇرەك پەن قانتامىر اۋرۋلارى، ونكولوگيالىق دەرتتەر، انا مەن بالاعا مەديتسينالىق جاردەم كورسەتۋدىڭ بىرىكتىرىلگەن مودەلىن ەنگىزۋگە باعىتتالدى. ونىڭ ىشىندە: ءجىتى ميوكارد ينفاركتى، ءجىتى ينسۋلت جانە جاراقات كەزىندەگى مەديتسينالىق كومەك كورسەتۋ جانە ونكولوگيالىق اۋرۋلاردى باسقارۋدا، بوساندىرۋ مەن بالالار قىزمەتىندە مەديتسينالىق كومەك كورسەتۋ قامتىلدى.

سونداي-اق اتالعان كلينيكالاردىڭ جۇمىس مەنەدجمەنتىمەن، دارىگەرلەردى دايىنداۋ ادىسىمەن تانىستىرۋ جۇرگىزىلدى. ماستەر-كلاستار بارىسىندا وبلىستىق دارىگەرلەر كورسەتىلگەن باعىتتار بويىنشا وتالار مەن مانيپۋلياتسيالاردى جانە ناۋقاستاردى جۇرگىزۋ ءتارتىبىن ۇيرەندى.

وقىتۋدىڭ قورىتىندىسى بويىنشا بارلىق ماماندار ارنايى سەرتيفيكاتتارعا يە  بولدى.

سونىمەن قاتار، ءبىلىم جانە مادەنيەت سالالارىنىڭ قىزمەتكەرلەرى دە حالىقارالىق دەڭگەيدە تاجىريبە الماسىپ، اسا پايدالى ماعلۇمات الىپ قايتتى.

ونىڭ ىشىندە ءبىلىم قىزمەتكەرلەرى ستامبۋل مەن انكارا قالالارىنىڭ مەكتەپتەرى مەن بالا باقشا جۇمىستارىمەن تانىستى.

اباي-اقپارات