وڭتۇستىك قازاقستان وبلىسى جىل باسىنان بەرى شەت ەلدەرگە، سونىڭ ىشىندە يران يسلام رەسپۋبليكاسى مەن بىرىككەن اراب امىرلىكتەرى ەلدەرىنە مال باسىن ەكسپورتتاپ كەلەدى. ەندى وڭتۇستىك مال باسىن عانا ەكسپورتتاپ قويماي ەت ونىمدەرىن شىعارىپ، ونى مۇسىلمان ەلدەرىنە ەكسپورتتاماق. «وسى ماقساتتا الداعى جىلى جالپى قۇنى 30 ملن دوللار جوبا اياسىندا دۋبايلىق ينۆەستورلار 20 مىڭ ءىرى قارا بورداقىلاۋ الاڭى مەن جىلىنا 5 مىڭ توننا ەت وڭدەيتىن زاۋىت سالماقشى»، دەپ حابارلايدى اباي-اقپارات.

بۇگىندە جوبانى جۇزەگە اسىرۋدىڭ شارتتارى مەن ەگجەي-تەگجەيلى تەتىكتەرى وڭتۇستىك قازاقستان وبلىسىنىڭ اكىمدىگى دەڭگەيىندە تالقىلانىپ، بايدىبەك اۋدانىنان 17 مىڭ مال جايىلىمدىق جەر مەن 2 مىڭ گەكتار سۋارمالى جەر، سونداي-اق، زاۋىت سالۋ ءۇشىن اۋدانداعى يندۋستريالدى ايماقتان 5 گەكتار جەر تەلىمى بولىنگەن.  

جوبانىڭ ەرەكشەلىگى سول، مۇندا وندىرىلگەن ەت «حالال» ستاندارتىنا سايكەستەندىرىلىپ، ونىڭ باسىم بولىگى مۇسىلمان ەلدەرىنە ەكسپورتتالماق. بۇل اۋىل شارۋاشىلىعى كاسىپورىندارىنا، ونىڭ ىشىندە قاراپايىم شارۋالارعا ءوز ءونىمىن تۇراقتى تۇردە قىمبات باعادا ەكسپورتتاۋعا مۇمكىندىك بەرەدى.  

ايتا كەتەرلىگى، بىرىككەن اراب امىرلىگىندە تىركەلگەن «AMK METAL FZCO» كومپانياسى 20 جىلدان بەرى «ارسەلورميتتال تەمىرتاۋ» اق-مەن تىعىز بايلانىستا جۇمىس ىستەپ كەلە جاتقان كاسىپورىن. وسىلايشا وڭتۇستىك مىڭعىرعان مال باسىن تولاعاي تابىس كوزىنە اينالدىرماقشى.

اباي-اقپارات