جاقىندا شىمكەنت قالاسىندا «تۇيە تۇقىمدارى» رەسپۋبليكالىق پالاتاسىنىڭ  كەڭەسى ءوتتى. اتالعان جيىنعا قاتىسقان كاسىپكەر باقتيار احاەۆ شارۋالارعا مەملەكەتتىك قولداۋدىڭ جاسالىپ جاتقانىن ايتتى.

باقتيار احاەۆ، «ۇسەنوۆ ن» شارۋا قوجالىعىنىڭ توراعاسى:
- بۇگىندە تۇيە شارۋاشىلىعىمەن اينالىساتىن قوجالىقتارعا بارىنشا كومەك قاجەت. تۇيەنىڭ ەتىنە، سۇتىنە مەملەكەت تاراپىنان سۋبسيديا بەرىلسە دۇرىس بولار ەدى. جۇمىسىن باستاعالى وتىرعان پالاتا وسى ماسەلەلەردىڭ شەشىمىن تابۋعا اتسالىسادى دەگەن ۇمىتتەمىز. عالىمداردىڭ ءوزى دالەلدەپ وتىر عوي تۇيە ءسۇتىنىڭ بىرنەشە اۋرۋعا ەم ەكەنىن. ەندەشە اۋرۋحانالاردىڭ، مەكتەپتەردىڭ، مەكەمەلەردىڭ مازىرىنە شۇباتتى ەندىرسە دۇرىس بولادى،- دەدى احاەۆ.

تۇيە تۇقىمىنىڭ تازا قاندى، اسىل تۇقىمدى مالدارىن ساتۋ بويىنشا اۋكتسيوندار (بيرجالار), كورمەلەر مەن جارمەڭكەلەر وتكىزۋدى ۇيىمداستىرۋ دا پالاتانىڭ موينىندا. سونداي-اق، شارۋاشىلىقتاردا قاجەتتى ينفراقۇرىلىمدى ازىرلەۋگە جاردەمدەسۋ، جارعىلىق ماقساتتار مەن مىندەتتەردى جۇزەگە اسىرۋ ءۇشىن ينۆەستيتسيالار مەن گرانتتار تارتۋ دا تۇيە وسىرۋشىلەرگە كوپ جاردەم بولارى انىق.

تۇيە تۇقىمى مەن سوعان بايلانىستى بيزنەستىڭ دامۋىنا كومەگىن تيگىزەتىن شەتەل ۇيىمدارىمەن، اتاپ ايتقاندا جاڭا تەحنولوگيالاردى ەنگىزۋ، گەنەتيكانى جاقسارتۋ، تۇيە تۇقىمدارىن تاراتۋ جانە بايلانىستاردى نىعايتۋ بويىنشا بىرىگىپ قىزمەت ىستەۋ، تۇيە تۇقىمدارىن ءوسىرۋ ماسەلەلەرى بويىنشا باسقا ەلدەردىڭ اسسوتسياتسيالارىمەن بىرىگىپ قىزمەت اتقارۋ دا ناتيجەلى بولارى انىق.

تۇيە تۇقىمىنىڭ ىشكى جانە سىرتقى نارىقتاعى ساۋداسىنىڭ دامۋىنا جاعداي جاساۋ دا پالاتانىڭ الدىنا قويعان ماقساتتارىنىڭ ءبىرى بولىپ تابىلادى.

Abai.kz