بۇگىن شىمكەنتتەگى ءال-فارابي الاڭىندا جاڭا جىلدىق شىرشا شامى جاعىلدى. بۇل تۋرالى «اباي اقپارات» پورتالى وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى. شاراعا وبلىس اكىمى جانسەيىت تۇيمەباەۆ پەن شاھار باسشىسى عابيدوللا ءابدىراحىموۆ ارنايى قاتىسىپ، بارشا قالا تۇرعىندارىن كەلە جاتقان جاڭا جىل مەرەكەسىمەن قۇتتىقتادى.

«وڭتۇستىك قازاقستان وبلىسى جاڭا جىلعا جاڭا تابىستارمەن كەلىپ وتىر. كۇنى كەشە عانا ەل تاۋەلسىزدىگىنىڭ 25 جىلدىق مەرەيتويىن جوعارى دەڭگەيدە اتاپ وتتىك. شيرەك عاسىرلىق جەمىستى جۇمىستارعا وڭتۇستىكقازاقستان حالقىنىڭ دا قوسىپ وتىرعان ۇلەسى وراسان»، - دەدى وبلىس اكىمى جانسەيىت قانسەيىتۇلى تۇيمەباەۆ.

قالا تۇرعىندارى ەندى جاڭا جىلدى قارسى الۋعا قامدانىپ-اق كەتتى. ءال-فارابي الاڭىندا وتكەن ءىس-شاراعا 400-گە جۋىق ونەرپاز قاتىسىپ، ارنايى شەرۋ ۇيىمداستىردى. 200-گە تارتا اياز اتا مەن قارشا قىز ەرتەگى كەيىپكەرلەرىنەن كورىنىس قويدى. 

مەرەكەلىك شارا سوڭى وتشاشۋلارعا ۇلاستى. قالا اكىمدىگى تاراپىنان جاڭا جىلدىق كورىكتەندىرۋ جۇمىستارى كەزىندە شاھاردىڭ 3 نۇكتەسىندە جاڭا جىلدىق شىرشا شامى جاعىلدى. ولار جەكە-جەكە ءال-فارابي الاڭىندا، ءشامشى اللەياسى مەن وبلىستىق اكىمشىلىك-ىسكەرلىك ورتالىعىندا ورنالاسقان. 

Abai.kz