نەشە كۇننەن بەرى قازاقتىڭ ءبىر اردا ازاماتىن جەردەن الىپ، جەرگە سالۋ توقتالار ەمەس. ونىڭ بيلىكتە جۇرگەننەن كەيىن بيلىكشە سويلەۋگە ءماجبۇر ەكەنىن نەگە ويلامايدى جۇرت؟ "قاي جەردىڭ وتىن وتتاساڭ، سول جەردىڭ سۋىن سۋلايسىڭ دەيدى قازاق. "پو-ۆولچي جيت - پو-ۆولچي ۆىت" دەيدى ورىستار. مەن ونى "قازاقتىڭ دەن ءسياوپينى" دەپ بىلەمىن. دەن ەكى رەت ۇرىلىپ، "پوليتيچەسكي ترۋپ" بولىپ، ەكىنشىسىندە ماو ومىردەن وتكەننەن كەيىن عانا جارىققا شىققان. دەننىڭ سول تاعدىرىن قايتالاۋ قاجەت پە؟ ەكىنشىدەن، ولاي ەتۋ بۇگىن وتە قاۋىپتى دە. 

ەندەشە، ء"وزىڭ بولىپ العانشا، بولعان ەردىڭ قوسىن جەك!" دەگەن قازاقي دانا ۇستانىمنان اينىماعانىنىڭ نەسى بۇرىس؟ ەڭ باستىسى - ول ۇستازىنا ادال. مۇحاممەد پايعامبار (س.ا.س.) "ۇستازىڭ - اتا-اناڭنان ارتىق" دەگەن. ياعني، قانداي بولعان كۇندە دە ۇستازىڭا ادال بولۋ - ادامدىق مىندەت. "اقىرىنا دەيىن ادال بولىپ قالايىن، ماڭدايىما ەل باسقارۋ جازىلسا كەزىندە كورەرمىن، جازىلماسا - بۇيرىق ەمەس شىعار" دەپ، قانداي اۋىر تاپسىرما بەرسە دە، ابىرويمەن ورىنداپ شىعىپ ءجۇر ول.

وزدەرىن بايلىق پەن بيلىككە جەتكىزگەن ادامعا ادال بولا الماعان، "دەموكراتيا" دەگەن ءسوزدى جامىلىپ، بيلىككە ەرتەرەك جەتۋدى كوزدەگەندەرگە قوسىلمايتىنى سوندىقتان. دەن 77 جاسىندا بيلىككە كەلسە دە بار-جوعى 10 جىلدا حالقىن الەمنىڭ الدىنا شىعاراتىن جۇيە، داڭعىل جول سالىپ بەرىپ كەتتى. سونىڭ ارقاسىندا قىتاي 5 مىڭ جىلدىق تاريحىندا بولماعان قارقىنمەن دامۋدا، 

مەن "قازاقتىڭ دەن ءسياوپينى" دە ءدال سولاي ىستەيدى دەپ بىلەمىن. سول كەزدە قازاق قىتايدىڭ 30 جىلدا جۇرگەنىن 15-اق جىلدا ءجۇرىپ وتەتىن بولادى. سەبەبى، قازاقتاي تالانتتى، دارىندى، العىر، قابىلەتتى، ءتوزىمدى، شىدامدى، مىقتى، بەرىك ۇلت جەر بەتىندە جوق! 

ارينە، قام ءسۇت ەمگەن پەندە بولعان سوڭ مەنىڭ قاتەلەسۋىم مۇمكىن، بىراق، بيلىك اۋىسقان كەزدە ونىڭ بيلىككە كەلگەنى جالپى قازاق ءۇشىن تەڭدەسسىز يگىلىك بولاتىنىنا، جانە ونىڭ ەشۋاقىتتا، ەشقانداي جاعدايدا بايلىق ءۇشىن ەلىن تاستاپ كەتپەيتىنىنە سەنىمىم كامىل!
 
ومىرزاق اقجىگىت

Abai.kz