ەگەمەندىكتىڭ ەڭسەلى جىلدارىن تويلاۋ مەرەكەسى قارساڭىندا ماقتارال اۋدانى ا.قالىبەكوۆ اۋىلدىق وكرۋگىنە قاراستى ب.سوقپاقپاەۆ جالپى ورتا مەكتەبىنىڭ 150 ورىندىق، قىزىلقۇم اۋىلدىق وكرۋگىنە قاراستى «قىزىلقۇم» جالپى ورتا مەكتەبىنىڭ باستاۋىش سىنىپقا ارنالعان 100 ورىندىق جاڭا عيماراتتارى پايدالانۋعا بەرىلدى.

اۋدان اكىمى ع.يسمايلوۆ مەكتەپ عيماراتتارىنىڭ اشىلۋ سالتاناتىنا قاتىسىپ، وقۋ سىنىپتارىنىڭ ساپاسىن تەكسەرىپ قايتتى. مۋلتيمەديالىق كابينەتتەردى، زەرتحانالار، مامانداندىرىلعان وقۋ سىنىپتارىن، شەبەرحانالار مەن كىتاپحانالاردى، ادىستەمەلىك، دارىگەرلىك، پسيحولوگيالىق كابينەتتەردى ارالاپ شىققان اكىم مەكتەپتىڭ قۇرىلىس ساپاسىنا وڭ باعاسىن بەردى. ءوز سوزىندە، اكىم مۇنىڭ بارلىعى دا تاۋەلسىزدىكتىڭ جەمىسى ەكەندىگىن اتاپ ءوتتى.

جالپى، 1991 جىلدان بەرى ماقتارال اۋدانىندا 57 مەكتەپ پەن وقۋ عيماراتتارى اشىلسا، بيىلدىڭ وزىندە 9 ورتا مەكتەپ عيماراتى مەن 1 قوسىمشا وقۋ كورپۋسى ەل يگىلىگىنە بەرىلدى. سونداي-اق، تاۋەلسىزدىكتىڭ 25 جىلدىق جەتىستىگىنىڭ ايقىن كورىنىسى رەتىندە زاماناۋي ۇلگىدەگى 5 بالاباقشا عيماراتى سالىنعانىن اتاپ وتكەن ءجون.

ايتا كەتەيىك، 25 جىل ىشىندە ءمىرزاشول وڭىرىندە اۋدان حالقىنا مەديتسينالىق-سانيتارلىق كومەك كورسەتۋ ماقساتىندا جاڭا 2 اۋداندىق، 13 اۋىلدىق مەديتسينا مەكەمە عيماراتتارى جاڭادان سوعىلسا، 15 مەديتسينالىق تىرەكتەر مەن جەدەل مەديتسينالىق جاردەم كورسەتۋ ستانتسيالارى جاڭا نىساندى بولدى. سونداي-اق، دەنە شىنىقتىرۋ جانە بۇقارالىق سپورتپەن شۇعىلدانۋ ءۇشىن قولجەتىمدى سپورت عيماراتتارىنىڭ سانى 1991 جىلى 258 بولسا، 25 جىل ىشىندە 3,1 ەسە ءوسىپ بيىل 790 نىسانعا جەتىپ وتىر.

Abai.kz