قازاقستان رەسپۋبليكاسى تاۋەلسىزدىگىنىڭ 25 جىلدىق مەرەيتويى قارساڭىندا وڭتۇستىك قازاقستان وبلىسى، ارىس قالاسىندا ءتۇرلى يگى شارالار ۇيىمداستىرىلىپ، الەۋمەتتىك نىساندار ەل يگىلىگىنە بەرىلدى. ماسەلەن، جىل باسىنان بەرى 2 مەكتەپ، 1 كوپىر، 1 بالاباقشا مەن 1 سپورتتىق نىسان اشىلدى. بۇل تۋرالى «اباي اقپارات» پورتالى وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

ال، قازاقستان رەسپۋبليكاسى تاۋەلسىزدىگىنىڭ 25 جىلدىق مەرەيلى مەرەكەسى كۇنى قالادا 25 الەۋمەتتىك نىسان اشىلىپ، تۇرعىندارعا پايدالانۋعا ۇسىنىلدى.

اتاپ ايتقاندا 1 مەكتەپ، 1 اۋىز سۋ جۇيەسى، 2 شاعىن باق، 8 بالالار ويىن الاڭشاسى مەن 13 زاماناۋي سپورت الاڭشالارى حالىق يگىلىگىنە قولدانىسقا بەرىلدى.

اتالعان نىسانداردىڭ سالتاناتتى اشىلۋ راسىمىنە ارىس قالاسىنىڭ اكىمى م.قادىربەك، وق وبلىستىق ءماسليحات دەپۋتاتى ق.ابدىحالىق، قالالىق ءماسليحات حاتشىسى ا.بايتاناەۆتار قاتىسىپ، ارىستىقتاردىڭ قۋانىشىمەن ءبولىستى. شارا بارىسىندا جيىلعان جۇرتشىلىققا قالالىق مادەنيەت ءۇيىنىڭ ونەرپازدارى كونتسەرتتىك باعدارلاما ۇسىنىپ، مەرەكەلىك كوڭىل كۇي سىيلادى.

وسى تۇستا ارىستىقتار ەگەمەندىگىمىزدىڭ تۇعىرلى بولۋىن تىلەپ، شيرەك عاسىردا ەلىمىزدىڭ ءوسىپ-وركەندەۋى جولىنداعى ەڭبەگى ءۇشىن مەملەكەت باسشىسى نۇرسۇلتان ءابىشۇلىنا العىستارىن جەتكىزدى.

Abai.kz