اتىراۋ وبلىسىنىڭ اكىمى نۇرلان نوعاەۆ قازاق قوعامىن ۇلتسىزدانۋدان قورعاۋىمىز كەرەك دەپ مالىمدەدى. ايماق باسشىسى بۇل تۋرالى وبلىستا وتكەن رەسپۋبليكالىق جۇمەكەن ناجىمەدەنوۆ وقۋلارى كەزىندە ايتتى.

“ارامىزدا ءداستۇرىن، مادەنيەتىن ۇمىتىپ بارا جاتقان ازاماتتار بار. ءبىز ۇل-قىزدارىمىزدى ۇلتسىزدانۋدان قورعاۋىمىز كەرەك. ال، بۇل پروتسەسكە توتەپ بەرەتىن بىردەن-ءبىر نارسە – رۋحتىڭ بيىكتىگى. جاستار رۋحقا ازىق بولاتىن حالقىنىڭ مۇرالارىنان ۇنەمى ءنار الىپ وتىرۋى قاجەت”، - دەدى نۇرلان نوعاەۆ.

ايتا كەتەلىك، جۇمەكەن ناجىمەدەنوۆ اتىنداعى رەسپۋبليكالالىق كوركەم ءسوز وقۋ شەبەرلەرى سايىسى وبلىستا بيىل ءبىرىنشى رەت وتكىزىلىپ وتىر. 

بايقاۋ قورىتىندىسى بويىنشا، اتىراۋلىق ۇمىتكەر ءنازيرا ءاشىم ءبىرىنشى ورىندى ەنشىلەسە، اقمولا وبلىسىنان كەلگەن پەريزات مۇراتقىزى مەن ماڭعىستاۋلىق ايدوس جۇماباەۆ جۇلدەلى ەكىنشى ورىندى جەڭىپ الدى. ال، اتىراۋلىق نۇرداۋلەت تابىلديەۆ، شىعىس قازاقستاننان كەلگەن ارايلى التاەۆا، وڭتۇستىك قازاقستاننان قاتىسقان نازەركە قۇلجاباەۆا ءوزارا ءۇشىنشى ورىندى ءبولىستى.

تالاپاكەرلەرگە قر مەملەكەتتىك سىيلىعىنىڭ يەگەرى، جازۋشى قاجىعالي مۇحانبەتقاليۇلى، حالىقارالىق «الاش» ادەبي سىيلىعىنىڭ يەگەرى، اقىن سەرىك تۇرعىنبەكۇلى، قر پرەزيدەنتى سىيلىعىنىڭ لاۋرەاتى، جازۋشى مەرەكە قۇلكەنوۆ، فيلولوگيا عىلىمدارىنىڭ دوكتورى، اقىن قادىر ءجۇسىپ جانە اتىراۋ وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى ءابىل جولامانوۆ قازىلىق ەتتى.

قۇرمەتپەن، 

اتىراۋ وبلىسى اكىمى ءباسپاسوز قىزمەتىنىڭ جەتەكشى مامانى 

ەركەبۇلان اناربەكۇلى

Abai.kz