ەل تاۋەلسىزدىگىنىڭ 25 جىلدىق مەرەيتويى قارساڭىندا سوزاق اۋدانىندا 50 وتباسى جاڭادان باسپانالى بولدى. تەرىسكەيلىكتەرگە تۇرعىن ۇيلەردى بەرۋ سالتاناتتى شاراسىنا وڭتۇستىك قازاقستان وبلىسىنىڭ اكىمى جانسەيىت تۇيمەباەۆ قاتىستى.

وبلىس اكىمى اۋدان ورتالىعى – شولاققورعان اۋىلىندا «قولجەتىمدى باسپانا - 2020» باعدارلاماسى اياسىندا وبلىستىق بيۋدجەت ەسەبىنەن سالىنعان تۇرعىن ۇيلەردىڭ كىلتىن جەتىم جانە اتا-اناسىنىڭ قامقورلىعىنسىز قالعان بالالارعا، مۇمكىندىگى شەكتەۋلى جاندارعا، كوپ بالالى انالار مەن كەزەكتە تۇرعان مەملەكەتتىك قىزمەتكەرلەرگە تابىستاپ، جاڭا قونىستىڭ قۇتتى شاڭىراققا اينالۋىن تىلەدى.

«ەل ءۇي – ەلۋ وتباسى – ەلۋ جانۇيا. وسى ەلۋ وتباسىنىڭ ارقايسىسىندا 4-5 ادامنان بار دەپ ەسەپتەسەك، بۇگىن 200-گە جۋىق سوزاقتىق تۇرعىننىڭ قۋانىشىنا ورتاقتاسىپ وتىرمىز. مۇنداي جاعداي وڭىرىمىزگە «نۇرلى جول»، «قولجەتىمدى باسپانا - 2020» باعدارلاماسى اياسىندا ءبولىنىپ جاتقان ۇلكەن قارجىنىڭ ارقاسىندا مۇمكىن بولىپ وتىر. بولاشاقتا وسىنداي باعدارلامالار ارقىلى كوپتەپ اقشا ءبولىپ، بۇگىنگىدەي تۇرعىن ۇيلەردىڭ سالىنۋىنا بارىنشا اتسالىساتىن بولامىز»، - دەدى ج.تۇيمەباەۆ.

جاڭا قونىستاردىڭ ىرگەتاسى 2015 جىلى قالانا باستاعان بولاتىن. ەل تاۋەلسىزدىگىنىڭ 25 جىلدىق مەرەيتويىنا وراي، تابىستالعان باسپانالار مەرەيلى مەرەكەدەگى ۇلكەن سىي بولىپ وتىر. ال تۇرعىن ۇيلەردىڭ قۇرىلىس جۇمىستارىن «ەل قۇرىلىس توبى» جشس مەردىگەر مەكەمەسى جۇرگىزدى.

ايتا كەتۋ كەرەك، بۇگىندە سوزاق اۋدانىندا تۇرعىن ءۇي كەزەگىندە 454 ادام تۇر.

Abai.kz