ەلىمىزدىڭ وڭتۇستىگىندەگى ەگىن القاپتارىنداعى ەگىستىكتى ورۋ مەن باۋ-باقشا ونىمدەرىن جيناۋ جۇمىستارى اياقتالدى. جالپى وڭتۇستىك ءوڭىر ەل حالقىن ارزان ءارى ساپالى ونىممەن قامتۋعا كۇش سالاتىن ايماق. ءونىمنىڭ ءبىر بولىگى سولتۇستىك وڭىرلەرگە جونەلتىلسە، ارتىلعانى رەسەي قالالارىنا ەكسپورتتالادى.

ءبىر عانا قازىعۇرت اۋدانىنداعى شارۋاشىلىق قازىرگە دەيىن 150 توننا ءجۇزىم، 100 توننا الما مەن 80 توننا المۇرتتى رەسەيگە جونەلتىپ ۇلگەرگەن. جاز ورتاسىنان بەرى بۇل قوجالىق 500 گەكتار باۋدان 800 تونناداي شيە، شابدالى جانە قارا ورىك جيناپ، ساتىپ ۇلگەرگەن. شارۋاشىلىقتىڭ جەكە تالىمباعى، 2 مىڭ توننا ءونىم ساقتاۋعا قاۋقارلى توڭازىتقىشى بار. جەرگىلىكتى 300 تۇرعىن تۇراقتى جۇمىسپەن قامتىلعان.

نۇرلان قۇرالوۆ، شارۋاشىلىق جەتەكشىسى:

- مۇنىڭ ەكونوميكالىق رەنتابەلنوستى وتە جوعارى. مىسالى، گەكتارىنان 10 توننا العان كۇننىڭ وزىندە قازىر 250 تەڭگەدەن ساتىپ جاتىرمىز. 2,5 ميلليون تەڭگە ءار گەكتارىنان تابىس ءتۇسىپ جاتىر. 

بيىلعى جىلى قازىعۇرت اۋدانى ءداندى داقىلدار، ارپا-بيداي، جۇگەرى ەگۋدەن وبلىس بويىنشا الدىڭعى ورىنعا شىقتى. ەگىنشىلىكتىڭ سىرىنا قانىققان قازىعۇرتتىقتار سوڭعى جىلدارى جىلىجاي سالىپ قىستىڭ كوزى قىراۋدا دا ەگىن ەگۋگە بەت بۇرىپ كەلەدى. جىلىجايمەن اينالىساتىن شارۋا قوجالىقتارىنىڭ ءبىرى «قازىعۇرت نۇرى» جشس توراعاسى امانجول اشىرباەۆتىڭ ايتۋىنشا، ولار جىل سايىن اقپاندا قيار، قىزاناق ەگىپ، ءساۋىر، مامىر اينىدا العاشقى ونىمدەرىن الا باستايدى. العاشىندا 25 گەكتارعا قيار-قىزاناق سالعان شارۋالار ءبىر ءتۇپ قىزاناقتان 5 كەلىگە دەيىن ءونىم الاتىندارىن ايتتى.

Abai.kz