وڭتۇستىك قازاقستان وبلىسىنا تاتارستان رەسپۋبليكاسىنىڭ استاناسى – قازان قالاسىنان ايرىقشا سىي جەتتى. بۇل تۋرالى «اباي اقپارات» پورتالى وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.
وڭتۇستىك قازاقستان وبلىسى اكىمى جانسەيىت تۇيمەباەۆتىڭ شىمكەنت قالاسىن جاسىل قالاعا اينالدىرۋ يدەياسى تۋرالى ارنايى سيۋجەتتى رەسپۋبليكالىق «حابار» تەلەارناسىنان كورگەن ايماق باسشىسىنىڭ قازان شاھارىنداعى دوستارى يگى ىسكە ۇلەس قوسىپ، تامشىداي كومەك رەتىندە كوگىلدىر شىرشا اعاشى كوشەتىنىڭ 120 داناسىن سىيعا تارتتى. 
بيىكتىگى 4-5 مەتر بولاتىن جاس شىرشا كوشەتتەرى، نەگىزىنەن، اكىمشىلىك-ىسكەرلىك ورتالىعىنىڭ ماڭىنا، اتاپ ايتقاندا، اكىمدىك پەن «تۇركىستان» سالتانات سارايى، ج.شانين اتىنداعى وبلىستىق اكادەميالىق دراما تەاترىنىڭ اينالاسىنا ەگىلدى. 
قىلقانجاپىراقتى وسىمدىكتەردىڭ ەڭ ادەمىسى بولىپ تابىلاتىن كوگىلدىر شىرشا اعاشىنىڭ وتانى سولتۇستىك امەريكا بولىپ سانالادى. دەسە دە، اتالعان جاسىل جەلەك ءتۇرى الەمنىڭ باسقا دا ەلدەرىندە وسە الادى.

ايتا كەتەيىك وسىنىڭ الدىندا شىمكەنتتە ارنايى رەيد جۇرگىزىلگەن بولاتىن. قالانىڭ ساۋدا ورىندارىنا جاسىل شىرشالار قايدان اكەلىنۋدە؟ جاڭا جىل مەرەكەسى قارساڭىندا اۋماقتىق ورمان جانە اڭ شارۋاشىلىعى ينسپەكتسياسىنىڭ وكىلدەرى قالا بازارلارى مەن دۇكەندەرىنە رەيد جۇرگىزدى.

رەيدكە شىققاندار جاسىل شىرشا ساتىلىپ جاتقان ءاربىر ساۋدا نۇكتەسىن مۇقيات تەكسەردى. ءبىر ايتا كەتەرلىگى، ادەتتە ۇرپيە قارسى الاتىن ساتۋشىلار بۇل جولى ۇرىككەن جوق. مىنا دۇكەننىڭ يەسى ءتىپتى قوناقتاردى قۋانا قارسى العانداي.

اقىلبەك ءاليحان، كاسىپكەر: «مەندەگى بارلىق قۇجاتتار زاڭداستىرىلعان. بۇل قىلقانجاپىراقتى كوشەتتەردى ءوزىم تالىمباقتا ءوسىرىپ، باپتاپ، كەيىننەن ساتىلىمعا شىعارامىن. وسىنداي رەيدتەر ءجيى جاسالسا بىزگە دە جاقسى. زاڭسىز جۇمىس جاسايتىن باسەكەلەستەردىڭ دە قاتارى ازايار ەدى».

جاس وسكىندى زاڭسىز كەسىپ، ساتاتىندار قاتاڭ جازالانادى. ورمان جانە اڭشىلىق شارۋاشىلىعىنىڭ ايماقتىق يسپەكتورلارى ەسكەرتى جۇمىستارىمەن بىرگە ايىپپۇل دا سالىپ جاتىر. شىرشا مەن قاراعايدى زاڭسىز قىرقىپ، پايدا تابۋشىلارعا وسىلاي عانا توقساۋىل قويۋعا بولادى دەيدى ماماندار.

اباي-اقپارات