قازاقستان جەرى كولەمدى مەملەكەت بولعاسىن، قاشان دا اۋىل شارۋاشىلىعىنا كوڭىل ءبولۋى ءتيىس. اۋىل شارۋاشىلىعى دەگەندە كوپ ادام استىقتى ويلايدى. استىق دەگەن – نان. ارينە، استىق ءوندىرۋ وتە ماڭىزدى. دەگەنمەن، باسقا ونىمدەردى دە ۇمىتۋعا بولمايدى.

ياعني، جەمىس-جيدەك، كوكونىس، قىسقاشا ايتقاندا باۋ-باقشا داقىلدارى. بۇلاردى ءوندىرۋ ارقىلى ءوز ازاماتتارىمىزدىڭ مۇقتاجىن وتەپ، شەتەلگە ەكسپورتقا شىعارىپ، قىرۋار تابىسقا كەنەلۋگە بولادى. ارينە، ايتقانعا وڭاي. دەگەنمەن، قول قۋسىرىپ قاراپ وتىرا بەرگەن دە بولمايدى. سول سەبەپتى قازاقستان اۋىل شارۋاشىلىعىن اياققا تۇرعىزۋعا كىرىستى. بۇل ءۇشىن مەملەكەت «اگرو بيزنەس 2020» باعدارلاماسىن دايارلادى. وسى باعدارلاما اياسىندا وڭتۇستىك وڭىرىندە كاسىبىن دوڭگەلەتىپ وتىرعان شارۋالار از ەمەس. سول سەبەپتى بولار، ولاردىڭ كوڭىلدەرى كوتەرىڭكى. حالىقتىڭ دا ءال-اۋقاتى جىلدان-جىلعا جاقسارىپ كەلەدى.

مىسالى، وڭتۇستىك قازاقستان وبلىسى اكىمدىگىنىڭ حابارلاۋىنشا، سارىاعاش اۋدانىندا بۇگىندە 1891 گەكتار ءجۇزىم القابى بار. ونىڭ ءونىم بەرەتىن 1648 گەكتارىنان شارۋالار بيىل 13184 توننا ءونىم الىپ وتىر. بيىلعى ورتاشا ونىمدىلىك گەكتارىنا 80 تسەنتنەردى قۇراعان. جينالعان ءجۇزىمنىڭ 4 313 تونناسى اسحانالىق بولسا، 8871 تونناسى تەحنيكالىق سورتتار. بيىل جىلداعىدان مول ءونىم الىپ وتىرعاندىعىن ايتقان ديقاندار جينالعان 8871 توننا تەحنيكالىق ءجۇزىم سورتىن اۋدانداعى «Caspian Food» جشس مەن «سەميرەچە» جشس-ءنىڭ شاراپ زاۋىتتارىنا وتكىزگەنىن ايتۋدا.

ال قالعان ءونىم ىشكى نارىققا جانە ەلىمىزدىڭ باسقا وبلىستارى مەن 500 تونناسى رەسەي فەدەراتسياسىنا جونەلتىلگەن. ايتا كەتەيىك، وتكەن جىلى 1648 گا ءجۇزىم القابىنان 13 مىڭ توننا ءونىم الىندى. ورتاشا ونىمدىلىك 79,2 تسن/گا بولعان. مىنە، وسىلايشا شارۋالار مەملەكەتتەن كومەك الىپ وتىرعاسىن، ايانىپ قالماسى انىق. بۇعان وتكەن جىلعا قاراعاندا ارتقان كورسەتكىش كۋا. 

Abai.kz