بيىل الماتى قالاسىنداعى جارمەڭكەگە وڭتۇستىك قازاقستان وبلىسى شارۋالارى 320 توننا اۋىل شارۋاشىلىعى ونىمدەرىن اكەلدى. جالپى 160 ملن تەڭگە تۇراتىن اۋىل شارۋاشىلىعى ونىمدەرى الماتى قالاسىنىڭ تۇرعىندارىنىڭ كوڭىلىنەن شىقتى. 

«الماتى مەن استانا قالاسىن ازىق تۇلىك قاۋىپسىزدىگىمەن قامتاماسىز ەتۋ ماقساتىندا وسىنداي جارمەڭكە ۇيىمداستىرىپ تۇرامىز. الماتىعا بيىل ەكىنشى رەت كەلىپ وتىرمىز. تاڭعى 7-دەن ساۋدا باستالىپ كەتتى. 160 ملن. تەڭگەگە 320 توننا اۋىل شارۋاشىلىعى ءونىمىن الىپ كەلدىك. ونىڭ 100 تونناسى باۋ-باقشا، 60 تونناسى ەت. وزىمىزدە وسىرىلەتىن كۇركەتاۋىق، شاردارانىڭ بالىعى دا بار. ءبىزدىڭ تاۋارلار نارىقتاعى باعادان 20-25 پايىزعا ارزان. ودان بولەك، وقو-دا شىعاتىن اياق كيىم، كىلەم سەكىلدى شەبەرحانالاردىڭ ونىمدەرىن دە الماتىلىقتارعا ۇسىنىپ وتىرمىز»، - دەدى جارمەڭكەگە قاتىسۋشى تۇرعانبەك وسپانوۆ.

جارمەڭكە بارىسىندا بايقاعانىمىز، الماتىلىقتاردىڭ دەنى بال مەن بالىققا قىزىعۋشىلىق تانىتتى. شاردارانىڭ بالىعى دا «مەن مۇندالاپ» تۇردى. «شاردارا اۋدانىندا 6 ملرد تەكشە سۋ جينالاتىن سۋ قويماسى بار. شاردارانىڭ بالىعى رەسپۋبليكادا تانىمال. بۇل جارمەڭكەگە 5 توننا بالىق، 5 توننا كۇرىش اكەلىپ وتىرمىز. 5 توننا قاۋىن-قاربىزىمىز دا بار. نەگىزىنەن، اۋدانداعى شارۋالاردىڭ ءوز ءونىمىن عانا اكەلدىك، باعا دا سول اۋىلداعى باعادا، ۇستىنەن اقشا قوستىرعان جوقپىز. حالىق الىپ جاتىر. «باعاسى ارزان، ءجيى كەلىپ تۇرىڭىزدار» دەپ ءبىر-ەكى كىسى كەلىپ كەتتى»، - دەيدى شاردارا اۋدانى اكىمىنىڭ ورىنباسارى قايرات جولدىباي. ايتا كەتەر جايت الماتى قالاسىنىڭ تۇرعىندارىنىڭ كۇنگەيدەن كەلەتىن مۇنداي ونىمدەرگە دەگەن سۇرانىسى ەرەكشە. 

Abai.kz