«قازاقستان جولى: ۇلت كوشباسشىسىمەن بىرگە  25 جىل بەيبىتشىلىك پەن جاسامپازدىق»

قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان حالىقارالىق عىلىمي تاجىريبەلىك كونفەرەنتسيا ءوتتى. كونفەرەنتسيا جۇمىسىنا 26 مەملەكەتتەن 120-دان استام بەلگىلى عالىمدار، سونداي-اق، قازاقستاندىق 30 ۋنيۆەرسيتەتتىڭ عالىمدارى باس قوستى. م.اۋەزوۆ اتىنداعى وقمۋ-دا وتكەن شاراعا وبلىس اكىمى جانسەيىت تۇيمەباەۆ قاتىسىپ، كونفەرەنتسيا جۇمىسىنا ساتتىلىك تىلەدى.

«ماڭگىلىك ەل يدەياسىنىڭ ءمانى مەن مازمۇنىن جاستارىمىزدىڭ ساناسىنا سىڭىرە وتىرىپ، ولاردىڭ بويىندا بەلسەندى ازاماتتىق ۇستانىمدى، وتانشىلدىق سەزىمدى، جوعارى ادامگەرشىلىك قاسيەتتەردى قالىپتاستىرۋ ءبىزدىڭ باستى مىندەتىمىز بولىپ تابىلادى. ماسەلەن، ەلىمىزدە جىل سايىن «بولاشاق» باعدارلاماسى بويىنشا ءۇش مىڭنان استام جاس شەتەلگە ءبىلىم الۋعا جىبەرىلۋدە. بۇل مەملەكەتتىڭ جاس ماماندارعا جاساپ جاتقان ۇلكەن قامقورلىعى دەپ بىلەمىن. سوندىقتان شەتەلدە، نە بولماسا، وزىمىزدە ءبىلىم العان بىلىكتى ماماندار وتانىمىزدىڭ، ونىڭ ىشىندە وڭتۇستىك ءوڭىرىنىڭ وركەندەپ، دامۋىنا اتسالىسۋلارى كەرەك. بۇل رەتتە، جاس عالىمداردىڭ ءدۋالدى وقۋ جۇيەسىمەن ءبىلىم الۋى ماڭىزدى»، - دەدى ايماق باسشىسى. 

كونفەرەنتسيادا تاۋەلسىز قازاقستاننىڭ قالىپتاسۋى مەن دامۋىنداعى قر تۇڭعىش  پرەزيدەنتى نۇرسۇلتان نازارباەۆتىڭ ءرولى، تاۋەلسىز قازاقستان مۇراتى - «ماڭگىلىك ەل» ۇلتتىق يدەياسىن جۇزەگە اسىرۋ، «قازاقستان -2050» ستراتەگياسى – قازاقستاننىڭ الەۋمەتتىك-ازاماتتىق جۇيەسىن جۇزەگە اسىرۋداعى جاڭا ساياسي باعىت، قازاقستاننىڭ تاۋەلسىزدىك جولىنداعى ۇلت-ازاتتىق قوزعالىستارى، يندۋستريالدى-يننوۆاتسيالىق دامۋ مەملەكەتتىك باعدارلاماسىن ىسكە اسىرۋداعى تەنولوگيالار مەن تەحنيكالىق دامۋدىڭ وزەكتى ماسەلەلەرى سىندى تاقىرىپتار تالقىلاندى.

حالىقارالىق كەزدەسۋ بارىسىندا ايماق باسشىسى اتالعان وقۋ ورنىنىڭ سەرىكتەستەرى بولىپ تابىلاتىن “KARLSKRONA LC AB” جشس-ءنىڭ باس ديرەكتورى ۋاليحان احمەتوۆ پەن وقو كاسىپكەرلەر پالاتاسىنىڭ ديرەكتورى اسقار ابۋباكىروۆكە ەلىمىزدىڭ ينجەرەنلىك سالاسىنىڭ دامۋىنا قوسقان ۇلەسى ءۇشىن «قازاقستاننىڭ قۇرمەتتى ينجەنەرى» ءتوس بەلگىسىن تابىستادى. سونداي-اق، جيىندا مەتاللۋرگيا سالاسىندا ءۇش عىلىمي جاڭالىق اشقان تەحنيكا عىلىمدارىنىڭ دوكتورى، پروفەسسور قايرات يسلامقۇلوۆقا عىلىمي جاڭالىقتار مەن  ونەرتابىستار حالىقارالىق اكادەمياسى پرەزيدەنىتىنىڭ اتىنان ديپلومدار بەرىلدى. 

مۇنان بولەك، جيىندا دۇنيەجۇزىلىك عىلىمي ورتاعا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان م.اۋەزوۆ اتىنداعى وقمۋ عالىمدارىنىڭ، جاڭادان تانىلعان عىلىمي اشىلىمدارى تانىستىرىلدى. اتاپ ايتقاندا، العاش رەت ۇلى جىبەك جولىنىڭ ساۋدا-ەكونوميكالىق نەگىزگى ورتالىقتارىنىڭ ءبىرى بولىپ تابىلاتىن وتىرار القابىنداعى ەجەلگى قاڭلى مەملەكەتى ءداۋىرىنىڭ ارحەولوگيالىق ەسكەرتكىشتەرىنىڭ (بەسىنشىتوبە، پىشاقشىتوبە قالاشىقتارى جانە التىنتوبە قورىمى) جادىگەرلەرى تانىستىرىلىپ، تۇڭعىش رەت قازاقستان-رەسەي مۇراعات قورىنان الىنعان حح عاسىردىڭ باسىنداعى ۇلت-ازاتتىق قوزعالىسىنىڭ جاڭا قۇپيا قۇجاتتارى ارنايى كورمەگە قويىلدى. سونداي-اق، الەمدىك ماڭىزى بار عىلىمي اشىلىمدار رەتى تىڭدالدى.

Abai.kz