بۇگىن شىمكەنتتەگى «جەڭىل اتلەتيكا سپورت كەشەنىندە» ەل تاۋەلسىزدىگىنىڭ 25 جىلدىعىنا وراي  2000-2001 جىلى تۋعان جاسوسپىرىمدەر اراسىندا «وڭتۇستىك قازاقستان وبلىسىنىڭ كۋبوگىنىڭ» جالاۋى جەلبىرەدى. 

جارىستىڭ شىمىلدىعىن وبلىس اكىمى جانسەيىت تۇيمەباەۆ اشىپ بەردى.

«جىل باسىنان بەرى وبلىس سپورتشىلارى سپورتتىڭ 59 ءتۇرى بويىنشا قازاقستان رەسپۋبليكاسىنىڭ چەمپيوناتتارى، كۋبوكتارى مەن بىرىنشىلىكتەرىنە قاتىسىپ، بارلىعى 1168 مەدال جەڭىپ السا، وسى ۋاقىت مەرزىمىندە ازيا چەمپيوناتتارى مەن كۋبوكتارىندا وبلىس سپورتشىلارى بارلىعى 117 مەدال  ۇتىپ الدى. ال الەم چەمپيوناتتارى مەن كۋبوكتارىندا بارلىعى 90 مەدال ەنشىلەسە، كەشە عانا برازيليادا وتكەن جازعى وليمپيادا ويىندارىندا اۋىر اتلەتيكا شەبەرى جازيرا جاپپارقۇلدىڭ كۇمىسى مەن دزيۋدو شەبەرى گالبادراح وتگونتسەتسەگتىڭ قولاسى وبلىستىڭ سپورت سۇيەر قاۋىمىن ءبىر سەرپىلتىپ تاستادى»، - دەگەن وبلىس باسشىسى جارىس قاتىسۋشىلارىنا ساتتىلىك تىلەدى.

كەشە، 6 جەلتوقسان كۇنى باستالىپ، بۇگىن رەسمي تۇردە اشىلعان جارىس «سپورت-ناشاقورلىققا قارسى» ۇرانىمەن وتۋدە. وبلىس كۋبوگىنە تالاستا سپورتتىڭ 7 ءتۇرى - باسكەتبول، ۆولەيبول، گرەك-ريم، ەركىن، قازاق كۇرەسى، دزيۋدو جانە جۇزۋدەن كىل مىقتىلار انىقتالىپ جاتىر.

ەسكە سالساق، 28 قاراشا مەن 2 جەلتوقسان كۇندەرى «وڭتۇستىك قازاقستان وبلىسىنىڭ كۋبوگىنىڭ» ءبىرىنشى كەزەڭى اۋدان، قالالاردا ءوتىپ، وندا 2 مىڭنان استام ءجاسوسپىرىم باق سىنادى. وندا جۇزدەن جۇيرىك شىققان 1600-دەن استام سپورتشى بۇگىنگى اقتىق ەكىنشى كەزەڭگە قاتىسىپ جاتىر.

ايتا كەتۋ كەرەك، وڭتۇستىك قازاقستان وبلىسىندا سپورتتىڭ باسكەتبول تۇرىنەن 3 مىڭنان استام بالا ءتالىم السا، ۆولەيبول بويىنشا 5 مىڭ، گرەك-ريم كۇرەسىندە 1800-گە جۋىق، ەركىن كۇرەسپەن 4 مىڭنان استام، قازاق كۇرەسىنەن 3200-دەن اسا، دزيۋدومەن 2700 جانە  ءجۇزۋ سپورتىمەن 600-گە جۋىق بالا شۇعىلدانادى.

Abai.kz