ەلىمىزدە وتاندىق ونىمدەردىڭ قاتارى جىلدان جىلعا تولىعىپ ارتىپ كەلەدى. سولاردىڭ ءبىرى دە بىرەگەيى شىمكەنتتىك كاسىپورىن سيىر ەتىن بۇقتىرىپ، كونسەرۆىلەنگەن تاماق ءونىمىن شىعارۋدا. بۇگىندە نارىقتا سۇرانىسقا يە ازىق-تۇلىكتىڭ بۇل ءتۇرىن شىعارۋدى مونعوليادان قونىس اۋدارعان قانداسىمىز جانىبەك قاناعات بۋرياتياعا ارنايى بارىپ قىر-سىرىن ۇيرەنىپ قايتقان.

و باستا ماماندىعى ءتىس دارىگەرى بولعان ول بۇگىندە تاماق ونەركاسىبى تەحنولوگى ماماندىعىن يگەرىپ، ناتيجەسىندە ۇلگى تۇتارلىق بىرەگەي كاسىپورىن يەسى.  اتالمىش كاسىپورىن قولجەتىمدى باعادا بۇقتىرىلعان سيىر ەتىنىڭ ءۇش ءتۇرىن شىعارۋدا.

جانىبەك قاناعات، كاسىپكەر: «سۇرانىسقا ساي ءونىمنىڭ ءتۇرىن كوبەيتتىك. قازىرگى تاڭدا بۇقتىرىلعان ەتتەن بولەك سيىر ەتىمەن بۇقتىرىلعان كۇرىش، ارپا بوتقاسىن دايىنداپ شىعارامىز. بالىق ەتىن دە بۇقتىرۋ تەحنولوگياسىن يگەردىك. ەكولوگيالىق تازا ءونىم شىعارۋ ءۇشىن بارلىق تالاپ تولىق ورىندالۋى ءتيىس. تاماق ونەركاسىبى بولعاندىقتان ءبىز مالدى بورداقىلاۋدان باستاپ ونى كونسەرۆىلەۋگە دەيىنگى پروتسەسستى مۇقيات قاداعالايمىز. سوندىقتان ءوز ونىمىمىزگە كەپىلدىك بەرەمىز.»

مەملەكەت تاراپىنان نەسيە، سۋبسيديا الماي، ءوز كاسىبىن دوڭگەلەتكەن كاسىپكەر بۇگىندە 100-گە جۋىق جەرلەسىمىزدى تۇراقتى جۇمىسپەن قامتىپ وتىر. ايتا كەتەتىن جايت، 30 جاستاعى كاسىپكەر كاسىپورىندى جەتكىلىكتى شيكىزاتپەن قامتۋ جاعىن الدىن الا ويلاستىرعان. ەكولوگيالىق تازا ەت مۇندا تولەبي اۋدانىنداعى «تورەبەك» شارۋاشىلىعىنان جەتكىزىلەدى. بۇگىندە سەرىكتەستىك جىلقى ەتىن دە بۇقتىرىپ، كونسەرۆىلەۋدە.

كاسىپكەردىڭ ايتۋىنشا بۇقتىرىلعان جىلقى ەتىنە سۇرانىس، اسىرەسە، وڭتۇستىك وڭىرىندە جوعارى. ونىڭ تەحنولوگياسى كۇردەلىرەك. قازىنى جاساپ العاننان كەيىن ولاردى 0 گرادۋستا كەپتىرىپ، ساقتايدى. سودان كەيىن بۇقتىرىپ، قۇتىلارعا سالىنادى.

سەرىكتەستىكتە تاۋلىگىنە بەس مىڭ قۇتىعا جۋىق ەت بۇقتىرىلادى. ەڭ باستىسى، كاسىپورىن قالدىقتاردى دا كادەگە جاراتۋدى قولعا العان. تاعام قالدىعىنىڭ وزىنەن دە يت پەن مىسىقتارعا ارنالعان كونسەرۆىلەنگەن ءونىم شىعارىلادى. ەش قوسپاسىز تازا ونىمگە سۇرانىس بۇگىندە جوعارى.

وڭتۇستىكتە شىعارىلىپ جاتقان كونسەرۆىلەردى ەلىمىزدىڭ نارىعىنان بولەك كورشى وزبەكستانعا دا ەكسپورتتاۋدا. ءونىمنىڭ وزىندىك قۇنىن تومەندەتۋ باعىتىندا جۇمىستار جوسپارلانعان. ياعني، الداعى ۋاقىتتا كاسىپورىن ءوز بورداقىلاۋ الاڭىن اشپاق. ارينە، بۇل ءتيىمدى جوبانى جۇزەگە اسىرۋ ءۇشىن قوماقتى قارجى قاجەت ەتەدى. الايدا، جۇمىسىڭدى باستاماس بۇرىن نارىقتى تالداپ، ارەكەت ەتسەڭ، الىنبايتىن قامال جوق دەيدى ىسكەر كاسىپكەر.

Abai.kz