ارمەنيا پرەزيدەنتى سەرج سارگسيان قازاقستان مەن بەلورۋسسيانى ەاەو مەن ۇقكۇ-دان شىعارىپ تاستاۋدى ۇسىندى دەپ حابارلايدى «ۆەستنيك كاۆكازا» باسىلىمى.

ارمەنيا مەن ءازىربايجان اراسىندا تالاسقا ءتۇسىپ جاتقان تاۋلى قاراباق جانجالىنا قاتىستى رەسەيدىڭ ساياسي ەليتاسى شەشىم شىعارىپ، داۋعا ارالاسۋعا بەكىنگەنى بەلگىلى. ءتىپتى ارالاسپاساق ۇيات بولادىعا باسىپ، ماسەلەنى شەشۋدى رەسەيدىڭ ەڭ باستى مىندەتتەرىنىڭ تىزىمىنە كىرگىزگەن ەكەن.

ال  ارمەنيالىق ساياسي ساراپشى مانۆەل سارگسيان باق-قا بەرگەن سۇحباتىندا بۇل باستامانى قولداپ، ەگەر اتالعان ەكى ەل وداقتان شىعاتىن بولسا، ارمەنيانىڭ ايى وڭىنان تۋاتىنىن ايتىپتى.

قازاقستان مەن بەلورۋسسيا تاۋلى قاراباق جانجالىندا ارمەنيانىڭ پوزيتسياسىن قولداماعان بولاتىن. سول ءۇشىن سەس كورسەتكەن سىڭاي تانىتىپ، سەرج سارگسيان وسىنداي قادام جاساپ وتىرعانعا ۇقسايدى.

مانۆەل سارگسياننىڭ سوزىنە نازار اۋدارساق، ەاەو-دا ارمەنيا مەن رەسەي عانا قالۋى كەرەك ەكەن. ونىڭ ۇستىنە ارمەنيانىڭ رف ارمياسىنا قارسى تۇرا الاتىن قاۋقارى دا بار كورىنەدى.

«ەگەر ەاەو مەن ۇقكۇ-دان اتالعان ەكى ەلدى شىعارىپ تاستايتىن بولساق،  بۇل ارمەنيا ءۇشىن وتە پايدالى بولماق. ەاەو-دا ارمەنيا  مەن رەسەي عانا قالادى. ال ۇقكۇ-عا كەلەر بولساق، قازاقستان مەن بەلورۋسسيانىڭ جاعدايىنان كەيىن قىرعىزستان مەن تاجىكستان ءتيىستى شەشىم قابىلدايتىن بولادى. اسىرەسە، تاۋلى قاراباق ماسەلەسىندە ارمەنيا ديپلوماتياسىمەن كەلىسەدى ءام قولدايدى»,-دەيدى سارگسيان.

ونىڭ ۇستىنە الەكساندر لۋكاشەنكو ءازىربايجان باسشىلىعىنان ارنايى ماراپات العان ەكەن. بۇل تۋرالى دا ساراپشى ايتىپ وتىر.

«ارمەنيا ءۇنسىز قالماۋى كەرەك. كەرىسىنشە لۋكاشەنكو ەندىگارى اليەۆتەن مەدال الاردا ءجۇز ويلانىپ، مىڭ تولعاناتىنداي جاۋاپ بەرىلۋى ءتيىس»,-دەپتى.

سونداي-اق، قازاقستان پرەزيدەنتى نۇرسۇلتان نازارباەۆتىڭ ەاەو سامميتىنە بارماي قويعانى دا ارمەنيالىق ساراپشىلار مەن سەرج سارگسياندى الاڭداتىپ وتىرعان سىڭايلى.

تاقىرىپقا تۇزدىق رەتىندە ايتا كەتەيىك، پايداسىنان پالەكەتى كوپ وسى ءبىر وداققا رەسمي بيلىك بولماسا، قازاقستاندىقتاردىڭ قۇلشىنىپ تۇرعانى شامالى. ەاەو مەن كو ءام ۇقكۇ تۇسىنداعى قازاقستاننىڭ ەكونوميكالىق احۋالى تۋرالى وسىعان دەيىن سان مارتە جازعان بولاتىنبىز.

ال تاۋلى قاراباق ماسەلەسى قايتا تۇتانعان 2015 جىلى ارازداسقان ەكەۋ قازاقستان پرەزيدەنتىنەن اراعايىندىق جاساۋدى سۇراعان بولاتىن. نازارباەۆتىڭ بىتىمگەرلىك ميسسياسىن تمد تۇگىلى دۇنيەجۇزى ەلدەرىنىڭ باسشىلارى مويىندايتىنى جاسىرىن ەمەس. سوندىقتان دا قاراباق قىرقىسىنا قاتىستى نازارابەۆتىڭ پىكىرى ماڭىزدى بولدى. بۇل ماسەلەدە جوعارىداعى اتالعان ۇيىمداردى سىلتاۋ ەتكەن ارمەنيا نازارباەۆتان ارمەنيا پايداسىنا شەشىلەتىن شەشىم كۇتتى. الايدا نۇرسۇلتان ءابىشۇلى سوناۋ 2014 جىلى-اق، ەاەو-نىڭ ماسكەۋدە وتكەن جيىنىندا تاۋلى قاراباققا قاتىستى پوزيتسياسىن اشىق ايتىپ، قاراباقتى ازىربايجانعا قايتارىپ بەرۋدى تالاپ ەتتى. "ويتپەگەن جاعدايدا ارمەنيا وداققا كىرە المايدى" دەپ ءسوزدىڭ اشىعىن دا ايتقان بولاتىن. ودان كەيىن دە ەكى جىل وتكەنىمەن، پوزيتسيا وزگەرمەگەن سەكىلدى. سەبەبى، ەاەو-نىڭ ەرەۆاندا وتكەن سوڭعى ەكى جيىنىنا نۇرسۇلتان نازارباەۆ بارماي قويدى. بۇل دا سارگسياندى ءبىراز سارساڭعا سالعان ەكەن، اقىرى ول قازاقستاندى قوس وداقتان ءبىرجولاتا شىعارىپ تاستاۋدى سۇراپتى.

نۇرزات توعجان

Abai.kz