تۇركيا رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگى (TIKA) وڭتۇستىك قازاقستان وبلىسىمەن بىرلەسكەن جوبالارى اياسىندا باستاعان شەبەرلىك ساباعىن اياقتاپ، وقۋ كۋرسىنان وتكەن دارىگەرلەرگە ارنايى سەرتيفيكاتتارىن تابىستادى.

دەلەگاتسيا قۇرامىن باستاپ كەلگەن TIKA توراعاسىنىڭ ورىنباسارى مەحمەد سۋرەيا ەر، ەڭ الدىمەن، وبلىس اكىمى جانسەيىت تۇيمەباەۆپەن كەزدەسىپ، شەبەرلىك ساباعىنىڭ وڭ ناتيجەلى بولارىنا سەنىم ءبىلدىردى.

وڭتۇستىك قازاقستانعا العاش رەت اياق باسقان مارتەبەلى مەيمان مەحمەد سۋرەيا ەر ايماق باسشىسىن 2017 جىلى تۇركىستان قالاسىنىڭ تۇركى الەمىنىڭ مادەني استاناسى اتانۋىمەن قۇتتىقتاپ، ءوزى قىزمەت ەتەتىن ۇيىمنىڭ الداعى ۋاقىتتاردا وڭتۇستىكتە ىسكە اسىرعىسى كەلەتىن تۋريزم، ءبىلىم بەرۋ سالالارىنداعى جوبالار رەتىمەن ءبولىستى.

مۇنان سوڭ، وبلىس اكىمى ج.تۇيمەباەۆ پەن مەحمەد سۋرەيا ەر وبلىستىق بالالار كلينيكالىق اۋرۋحاناسىنىڭ حالىقارالىق تەحنولوگيالار ورتالىعىنىڭ بازاسىندا «انا مەن بالا دەنساۋلىعىن ساقتاۋ» باعدارلاماسى اياسىندا ۇيىمداستىرىلعان شەبەرلىك ساباعىنا قاتىسقان 56 مەديتسينا قىزمەتكەرىنە ارنايى سەرتيفيكات تابىستاپ، دارىگەرلەردىڭ جۇمىسىنا ساتتىلىك تىلەدى.

ەسكە سالايىق، 2-4 جەلتوقسان كۇندەرى تۇركيانىڭ مەديتسينا سالاسىنداعى بىلىكتى دارىگەرلەرى دەريا بۋيۋككايكان، يلكە مۋنكان اكىن جانە ايلين ارداگيل اكچاكايا وبلىستاعى 56 مەديتسينا قىزمەتكەرىنە تاجىريبە الماسۋ سەمينارىن وتكىزگەن بولاتىن. اتاپ ايتقاندا، وبلىستاعى بالالار مەن بوساناتىن ايەلدەرگە مەديتسينالىق كومەك بەرۋ قىزمەتىنىڭ 36 دارىگەرى مەن 20 ورتا مەديتسينا قىزمەتكەرىنە – نەوناتولوگتارعا، وفتالمولوگتارعا، پەدياترلارعا، اكۋشەر ماماندارعا، نەوناتالدىق مەيىربيكەلەرگە تەوريالىق جانە پراكتيكالىق دارىستەر ءوتتى. سەمينار ناتيجەسى بويىنشا ەمتيحان تاپسىرعان مامانداردىڭ 4-ءى جوعارى بالل جيناپ، تەست سۇراقتارىنا 90-100 پايىزعا دۇرىس جاۋاپ بەرگەن.

ايتا كەتۋ كەرەك، وڭتۇستىك قازاقستان وبلىسىندا جىل ساناپ نارەستەلەر ءولىمى ازايىپ كەلەدى. وبلىستىق بالالار كلينيكالىق اۋرۋحاناسىنىڭ باس دارىگەرى ءا.مايماقوۆتىڭ مالىمەتىنشە، وتكەن جىلى وڭىرىمىزدە 12 بالا ءولىمى تىركەلسە، بيىل بۇل كورسەتكىش 11-گە تومەندەگەن. رەسپۋبليكالىق دەڭگەيگە شاققاندا، بىلتىر ايماعىمىز بالا ءولىمىنىڭ كوپتىگى جونىنەن ەلىمىزدە ءۇشىنشى ورىندا بولسا، ءتيىستى ناتيجەگە قول جەتكىزىلگەننەن كەيىن التىنشى ورىنعا تۇراقتادى.

اباي اقپارات