باۋىرلاس تۇركى جۇرتى كيەلى تۇركىستاندا بىرىگەدى. بۇكىل تۇركى جۇرتى ناۋرىز تويىن تۇركىستاندا تويلايتىن بولادى. بۇل تۋرالى بۇگىن وقو ايماقتىق كوممۋنيكاتسيالار قىزمەتىندە وتكەن بريفينگتە تۇركىستان قالاسىنىڭ اكىمى الىپبەك وسەرباەۆ ءمالىم ەتتى. بۇل تۋرالى «اباي اقپارات» پورتالى وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.
تۇركىستان قالاسى اكىمى الىپبەك وسەرباەۆتىڭ ايتۋىنشا، 2017 جىلدىڭ اقپان ايىندا تۇركىستان قالاسىندا «تۇركى الەمىنىڭ مادەني استاناسى» باعدارلاماسىنىڭ اشىلۋ سالتاناتى وتەدى. 2017 جىلدىڭ اقپان ايىندا باستاۋ الاتىن شارا جىل سوڭىنا دەيىن ءتۇرلى ايدارلارمەن جالعاساتىن بولادى.

سونىمەن قاتار، تۇركى الەمىنە قاتىستى مەرەكەلىك، رۋحاني، مادەني ءىس-شارالار وتەدى. سولاردىڭ ءبىرى ناۋرىز ايىندا بارشا تۇركى جۇرتشىلىعىمەن بىرلەسكەن ۇلىستىڭ ۇلى كۇنى - ناۋرىز مەرەكەسىن اتاۋعا بولادى.
سونىمەن قاتار، «تۇركى الەمىنىڭ مادەني استاناسى»  باعدارلاماسى اياسىندا تۇركى تىلدەس تەاترلار فەستيۆالى، تۇركسوي-دىڭ حح وپەرالىق فەستيۆالى، تۇركى الەمىنىڭ كىتاپ كورمەسى مەن مادەنيەت پەن ونەر ۋنيۆەرسياداسى جانە ورتا ازيا حالىقتارىنىڭ قولونەر فەستيۆالى سىندى كوپتەگەن حالىقارالىق دارەجەدەگى ءىس-شارالار دا بار.

ايتا كەتەيىك، ناۋرىز مەيرامى كۇللى تۇركى جۇرتىنا ورتاق بولىپ تابىلادى.

اباي-اقپارات