شارۋالار ءۇشىن توككەن تەر مەن ەڭبەكتىڭ جەمىسى كۇزدە بەلگىلى بولادى. جەرى شۇرايلى، ازاماتتارى ەڭبەكسۇيگىش، ىنتىماعى مەن بىرلىگى جاراسقان ورداباسى ءوڭىرى تاۋەلسىزدىگىمىزدىڭ 25 جىلىندا تۇراقتى دامۋ جولىنا ءتۇسىپ، ەلىمىزدىڭ ىلگەرى باسۋىنا وزىندىك ۇلەسىن قوسىپ كەلەدى.

1995 جىلى وڭتۇستىك قازاقستان وبلىسى بويىنشا بارلىق اۋىلشارۋاشىلىق قۇرىلىمىنىڭ سانى 8275-ءتى قۇراسا، ونىڭ 158-ءى ياعني 1,9 پايىزى عانا وسى اۋماقتان بولاتىن. 21 جىلدا بۇل كورسەتكىش وبلىستا 72 417-گە جەتسە، بۇگىندە ورداباسىلىقتاردىڭ ۇلەسى 5505-كە تۇراقتادى. بۇل جالپى وبلىستاعى اۋىلشارۋاشىلىق قۇرىلىمنىڭ 7,6 پايىزىن قۇرايدى. جالپى، ورداباسى اۋدانى بيىلعى جىلدى دا اۋىل شارۋاشىلىق ونىمدەرى بويىنشا جاقسى كورسەتكىشتەرمەن اياقتادى دەۋگە نەگىز بار. اتاپ ايتساق: «اعىمداعى جىلى اۋىلشارۋاشىلىعى داقىلدارىنىڭ ەگىستىك القابى 357 گەكتارعا ارتىپ، 54 357 گەكتاردى قۇراعان. وتكەن جىلمەن سالىستىرعاندا ماقتانىڭ ەگىستىگى - 62 پايىزعا، بيدايدىڭ ەگىستىگى - 32 پايىزعا، كارتوپ - 3,7 پايىزعا ۇلعايعان. اۋداندا بيىل 30 259 توننا بيداي، 15 028 توننا ماقتا، 68 650 توننا كوكونىس، 43 500 توننا باقشا ونىمدەرى جينالدى. اۋىلداردىڭ ەرەكشەلىگى ەسكەرىلىپ، ونىمدىلىكتى ارتتىرۋ بويىنشا اتقارىلعان جۇمىستىڭ ناتيجەسىندە 5 اۋىل شارۋاشىلىق وندىرىستىك كووپەراتيۆ قۇرىلدى. ەندىگى كەزەكتە، اۋىلدىق وكرۋگتەردە متس اشۋدى جوسپارلانىپ وتىر. ءبورجار اۋىلدىق وكرۋگىندە ينتەنسيۆتى باۋ شارۋاشىلىعى قولعا الىنىپ، «الەكساندروۆسكي ساد» جاۋاپكەرشىلىگى شەكتەۋلى سەرىكتەستىگى 17 گەكتار جەرگە جاڭا تەحنولوگيامەن تامشىلاتىپ سۋارۋ ءادىسى ارقىلى كۇن وتكىزبەيتىن سەتكا ارقىلى باۋ ەگۋمەن اينالىسۋدا. كاسىپورىن 2016 جىلدىڭ 30 ناۋرىزىنان ىسكە قوسىلىپ، بۇگىنگى تاڭدا 30 ادامدى جۇمىسپەن قامتىدى. اعىمداعى جىلى اۋداندا 500 گەكتار جاڭادان جەمىس باۋلارى ەگىلدى. ونىڭ ىشىندە، قارقىندى باۋ جوباسى 97 گەكتارعا ىسكە اسىرىلدى. تورتكول، بوگەن، جەڭىس جانە قاراقۇم اۋىلدىق وكرۋگتەرىندە ماقتا شارۋاشىلىعىن دامىتۋ، بۇل وڭىرلەردە ماقتا ەگىسىن 9000 گەكتارعا جەتكىزۋ كوزدەلىپ وتىر. وسى ورايدا، سۋارمالى جەرلەردىڭ جاعدايىن جاقسارتۋ جانە جاڭادان سۋارمالى جەرلەردى اينالىمعا قوسۋ ءۇشىن تاعى 187 تىك درەناج ىسكە قوسىلاتىن بولادى. بيىل اۋدان بويىنشا جىلىجايلاردىڭ كولەمى 7,18 گەكتارعا ۇلعايعانىن دا اتاپ وتكەن ورىندى. 

Abai.kz