بۇگىن وڭتۇستىك قازاقستان وبلىسىندا قر تاۋەلسىزدىگىنىڭ 25 جىلدىعىنا ارنالعان «بىرلىگىمىز جاراسقان-ماڭگىلىك ەل» اتتى رەسپۋبليكالىق ايتىس باستالدى. اقىنداردىڭ باسىن قوسقان ءدۇبىرلى دوداعا ەلىمىزدىڭ ايتۋلى 16 اقىنى مەن قىتاي، قىرعىزستان، موڭعوليا، وزبەكستان ەلدەرىنىڭ ءسوز دۇلدۇلدەرى دە ارنايى شاقىرتىلدى.
اتاپ ايتار بولساق، بۇگىنگى جۇيرىكتەردىڭ ءسوز سايىسىنا وڭتۇستىك قازاقستان وبلىسى اتىنان ج.ناۋشابەكوۆ، ك.ورالوۆا، ا.جاپپارقۇلوۆا، ن.مەيىرمانوۆ، ق.ابزالوۆ، ب.بايتۋوۆ، ن.ءاناپيا، د.پولاتباەۆ، ت.تۇلەۋليەۆ، ا.نيازبەكتەر قاتىسسا، ەلىمىزدىڭ باس قالاسى استانادان ا.تۇرسىنباەۆا، ج.بۇلعاقوۆ، ال، قىزىلوردادان م.ايتباي، قوستانايدان س.اۋەزحان، جامبىل وبلىسىنان ق.مىرزاحان، قاراعاندىدان ا.جۇماعۇلوۆ سىندى ءبىرتۋار اقىندارىمىز كەلىپ باق سىناۋدا.
قر تاۋەلسىزدىگىنىڭ 25 جىلدىعى مەن 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي، ۇيىمداستىرىلعان الامان ايتىسقا وبلىس اكىمدىگىنىڭ ەكى جەڭىل اۆتو كولىگى مەن قارجىلاي جۇلدە قورى تاعايىندالىپ وتىر.
اقىندار ايتىسىن وبلىسىمىزدىڭ تۋماسى، «پاراسات» وردەنىنىڭ يەگەرى، «ارا.kz» جۋرنالىنىڭ باس رەداكتورى، بەلگىلى ساتيريك كوپەن امىربەك جۇرگىزۋدە.
كىل مىقتىلاردىڭ ايتىس الامانىندا قازىلار القاسىنىڭ ءتورايىمى- قازاقستاننىڭ حالىق اقىنى، جامبىل جاباەۆ اتىنداعى سىيلىقتىڭ جانە «پاراسات» وردەنىنىڭ يەگەرى اسەلحان قالىبەكوۆا بولسا، قوعام قايراتكەرى، قر مادەنيەت قايراتكەرى ورازكۇل اسانعازى، قازاقستاننىڭ حالىق اقىنى، ايتىسكەر اقىن ءاسيا بەركەنوۆا، قر ەڭبەك سىڭىرگەن قايراتكەرى، «قۇرمەت»، «پاراسات» وردەندەرىنىڭ يەگەرى، حالىقارالىق «الاش» سىيلىعىنىڭ لاۋرەاتى، جازۋشى مارحابات بايعۇت پەن ايتىسكەر اقىن، سازگەر ابدىحالىق ءابدىرايىمۇلى سىندى ازاماتتار قازىلىق ەتۋدە.
ەكى كۇنگە جالعاساتىن سۋىرىپ سالما الامان ايتىسىنىڭ ماقساتى - تاۋەلسىزدىك جىلدارىندا ەلىمىزدىڭ قول جەتكىزگەن جەتىستىكتەرى مەن تابىستارىن ولەڭ سوزبەن حالىققا جەتكىزۋ بولىپ تابىلادى.
ەرتەڭ 3 جەلتوقسان كۇنى ساعات 11.00-دە «تۇركىستان» سارايىندا «بىرلىگىمىز جاراسقان-ماڭگىلىك ەل» اتتى رەسپۋبليكالىق اقىندار ايتىسىنىڭ جابىلۋ سالتاناتىنا وتەدى.

اباي-اقپارات