ءال-فارابي اتىنداعى قازاق ۇلتتىق ۋنيۆەرسيتەتىندە الماتى قالاسى ءدىن ىستەرى جونىندەگى باسقارماسىمەن بىرلەسكەن «مەگاپوليس جاعدايىنداعى ءدىن اتىن جامىلعان ەكسترەميزمنىڭ الدىن الۋ» تاقىرىبىندا الماتى حالىقارالىق عىلىمي-تاجىريبەلىك كونفەرەنتسياسى ءوتتى.

تاريح عىلىمدارىنىڭ دوكتورى، پروفەسسور، رجعا جانە حتعا اكادەميگى، «ينتەللەكت وردا» الەۋمەتتىك-گۋمانيتارلىق زەرتتەۋلەردى ينتەگراتسيالاۋ حالىقارالىق ينستيتۋتىنىڭ باس ديرەكتورى ساتتار ءماجيتوۆ مودەراتور رەتىندە كونفەرەنتسيانىڭ ماڭىزدىلىعىن اتاپ ءوتتى. «جوبانىڭ مىندەتى – قوعامدا  انتيتەررورلىق ۇعىم قالىپتاستىرۋ، مەگاپوليس جاعدايىنداعى ءدىن اتىن جامىلعان ەكسترەميزمنىڭ الدىن الۋ بويىنشا ادىستەمەلىك نۇسقاۋ-ۇسىنىستار دايارلاۋ»، – دەدى ساتتار ءماجيتوۆ.

الماتى قالاسى اكىمىنىڭ ورىنباسارى ا. قىرىقباەۆ: «رەسپۋبليكا بويىنشا تىركەلگەن 18  كونفەسسيانىڭ 17-ءسى قازاقستاننىڭ ءىرى مەگاپوليسى الماتى تەرريتورياسىندا ءوز قىزمەتىن جۇزەگە اسىرىپ وتىر. ءبىزدىڭ قالا حالقىنىڭ 1/3 پايىزىن 30 جاسقا دەيىنگى جاستار قۇرايدى، مۇندا قازاقستان ستۋدەنتتەرىنىڭ 30 پايىزى ءبىلىم الۋدا. اسىرەسە، جاستار كوبىنەسە ءتۇرلى توپتاردىڭ ىقپالىنا ءتۇسىپ جاتادى. سوندىقتان دا، الماتى قالاسى ءدىن ىستەرى جونىندەگى باسقارماسىنىڭ جۇمىسىن كۇشەيتىپ، ءىرى كونفەسسيالارمەن تىعىز بايلانىس ورناتۋدامىز. بۇگىندە مەملەكەت ءدىني ەكسترەميزمنىڭ الدىن الۋ ماسەلەلەرىنە ۇلكەن ءمان بەرۋدە»، – دەپ اتاپ ءوتتى.  

 «وسى كەزەڭگە دەيىن ءدىني تۇراقتى جانە ءدىني ماسەلەلەردەن تىس اۋماق رەتىندە سانالىپ كەلگەن قازاقستان بۇگىندە ءبۇلدىرۋشى سيپاتتاعى كۇشتەردىڭ اسەرىنەن قيىن كەزەڭدى باستان وتكەرۋدە. قازىرگى كەزدە جاس ۇرپاق بويىندا ەكسترەميستىك قىزمەتكە تارتۋ ارەكەتتەرى مەن ناسيحاتتارىنا قارسى تۇرا الاتىن يممۋنيتەت قالىپتاستىرۋ – مەملەكەت پەن قوعام الدىنداعى ەرەكشە ماڭىزدى مىندەت. بۇل ۇدەرىستە جوعارى وقۋ ورىندارىنىڭ اتقارار ءرولى زور»، – دەدى ءوز سوزىندە ءال-فارابي اتىنداعى قازۇۋ-دىڭ الەۋمەتتىك دامۋ جونىندەگى پرورەكتورى شولپان جامانبالاەۆا.

قورىتا كەلگەندە، ساراپشىلار كونسترۋكتيۆتى تۇجىرىمنىڭ قاجەتتىگى  جانە ءدىنتانۋدى وقىتۋ ،جاستاردىڭ ءدىني مادەنيەتىن ارتتىرۋ مەن ولارمەن پروفيلاكتيكالىق جۇمىس جاساۋدىڭ ءتاسىلى مەن تيىمدىلىگى، مەملەكەتتىك-ءدىني قاتىناس سالاسىندا قوعامعا كەرەك عىلىمي زەرتتەۋلەر جۇرگىزۋ ۇسىنىسى جونىندە ءبىراۋىزدان كەلىسىمگە كەلدى. بۇل تالاپتار مەن مىندەتتەردى ىسكە اسىرۋ ءدىني ەكسترەميزمنىڭ الدىن الۋ، قوعامدى بىرىكتىرۋ جانە قازاقستان ازاماتتارىنىڭ قاۋىپسىزدىگىن كۇشەيتۋ جونىندەگى ورتاق جۇمىستاردىڭ العا باسۋىنا ىقپال ەتەدى.

كونفەرەنتسياعا  الماتى قالاسى ءدىن ىستەرى باسقارماسىنىڭ توراعاسى ايدار ەسەنبەكوۆ، قر بعم عك شىعىستانۋ ينستيتۋتىنىڭ ديرەكتورى، فيلولوگيا عىلىمدارىنىڭ دوكتورى، پروفەسسور، قازاقستان جوعارى مەكتەبى عىلىم اكادەمياسىنىڭ اكادەميگى  ءابساتتار قاجى دەربىسالى،  الماتى قالاسى ورتالىق مەشىتىنىڭ باس يمامى نۇربەك قاجى ەسماعانبەت، الماتى قالاسى بوستاندىق اۋدانىنىڭ پروكۋرورى باۋىرجان جۇماقانوۆ قاتىستى. سونىمەن قاتار، شاراعا وتاندىق جانە شەتەلدىك  ساراپشىلار، ءدىني بىرلەستىكتەر مەن ۇەۇ جانە ۇلتتىق مادەني ورتالىقتار جانە باق وكىلدەرى، ارنايى جانە قۇقىق قورعاۋ ورگاندارىنىڭ ارداگەرلەرى مەن قىزمەتكەرلەرى اتسالىستى.

شارا اياسىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان كورمە ۇيىمداستىرىلىپ، «قازىرگى زامان ءدىنى» تاقىرىبىنداعى كىتاپتىڭ تانىستىرىلىمى جانە «سالاۋات» قب ءبىلىم بەرۋ-مادەني ورتالىعى ۇسىنعان «انتيتەررور – مەملەكەت پەن قوعام مىندەتى» تاقىرىبىنداعى دەرەكتى ءفيلمنىڭ كورسەتىلىمى ورىن الدى. سونداي-اق،  «يسلام» جانە «حريستيان» سەكتسيالارى جۇمىس ىستەدى.

اباي-اقپارات