ءال-فارابي اتىنداعى قازۇۋ-دا 29 قاراشا كۇنى قازاقستان رەسپۋبليكاسى تاۋەلسىزدىگىنىڭ 25-جىلدىعى جانە قر تۇڭعىش پرەزيدەنت كۇنىنە ارنالعان «مەن جاستارعا سەنەمىن!» اتتى ستۋدەنت جاستاردىڭ رەسپۋبليكالىق ءتورتىنشى پاتريوتتىق فورۋمى وتەدى. بايقاۋعا قاتىسۋعا ەلىمىزدىڭ 70 جوعارى وقۋ ورنىنان 1500-دەن استام ستۋدەنت ءوتىنىش بىلدىرگەن.

ستۋدەنتتىك جاستار فورۋمىنىڭ ماقساتى جوعارى پاتريوتتىق تۇسىنىگىن، ءوز ەلى ءۇشىن ماقتانىش سەزىمىن ارتتىرۋ جانە قازاقستان بولاشاعىنا دەگەن ازاماتتىق جانە الەۋمەتتىك جوعارى جاۋاپكەرشىلىكتى كوتەرۋگە باعىتتالعان.

بيىلعى جىلى «مەن جاستارعا سەنەمىن!» ءتورتىنشى رەسپۋبليكالىق پاتريوتتىق ستۋدەنتتىك گالا-فورۋمىنىڭ اقتىق بايقاۋىنا قازاقستاننىڭ 14 وبلىسىنىڭ 63 وقۋ ورنىنان 400 ۇمىتكەردىڭ جۇمىسى تاڭدالدى. ەڭ دارىندى ستۋدەنتتەر  «مەن جاستارعا سەنەمىن!» رەسپۋبليكالىق پاتريوتتىق فورۋمىندا ەڭ ۇزدىك جۇمىس اۆتورى رەتىندە باق سىناسادى.  

فورۋم اياسىندا ءبىر اي كولەمىندە «ەلىمىزدىڭ يننوۆاتسيالىق دامۋىنا مەنىڭ قوسقان ناقتى ۇلەسىم» اتتى ستۋدەنتتىك الەۋمەتتىك ماڭىزى بار  يننوۆاتسيالىق جوبا، «مەن مەملەكەتىمنىڭ گۇلدەنۋى ءۇشىن نە ىستەي الامىن؟» اتتى ستۋدەنتتىك ەسسە، «مەن جاستارعا سەنەمىن!» تاقىرىبىندا ستۋدەنتتىك پوەزيالىق ازاماتتىق-پاتريوتتىق شىعارما، «ماڭگىلىك ەل مۇراتىم!» پاتريوتتىق ءان بايقاۋلارى بويىنشا ستۋدەنتتىك جۇمىستار قابىلداندى. فورۋمنىڭ باس جۇلدەسى – ءال-فارابي اتىنداعى قازۇۋ-دا ءبىر جىلدىق تەگىن ءبىلىم الۋ گرانتى.

جوبانى ءال-فارابي اتىنداعى قازاق ۇلتتىق ۋنيۆەرسيتەتى، «جاندانۋ الەمى» قورى، «جاس وتان» جاستار قاناتى، قر جازۋشىلار وداعى جانە الماتى قالاسى اكىمدىگى ۇيىمداستىرۋدا.

«مەن جاستارعا سەنەمىن» گالا فورۋمى 29 قاراشا كۇنى ساعات 16:00-دە الماتى ق. ءو.جولداسبەكوۆ اتىنداعى ستۋدەنتتەر سارايىندا وتەدى.

اباي-اقپارات