2016 جىلدىڭ سوڭىنا دەيىن وبلىستا جالپى 13 ءسۇت تاۋارلى فەرماسىن اشۋ جوسپارلانۋدا. قازىردىڭ وزىندە 5 فەرمانىڭ ناقتى يەلەرى انىقتالىپ، 2 650 باس ءىرى قارا مال ساتىپ الۋ جوسپارلانۋدا. اتالعان شارۋاشىلىقتاردا ءار سيىردان ساۋىلاتىن ءسۇت 6000 كەلىنى قۇراپ، جىلىنا 16 000 توننا ءسۇت وندىرىلەتىن بولادى.

ەتتى باعىتتاعى ءىرى قارا مال ءوسىرۋ سالاسىن دامىتۋدىڭ باسىمدى باعىتتارى. I باعىت: انالىق اسىل تۇقىمدى ەتتى باعىتتاعى بۇقانىڭ ۇرىعىن پايدالانۋ ارقىلى جەرگىلىكتى ءىرى قارا مالدى قولدان ۇرىقتاندىرۋدى جۇزەگە اسىرۋ. II باعىت: “سىباعا” باعدارلاماسىمەن 30 مىڭ باس ءىرى قارا مال الىنىپ، اسىل تۇقىمدى ەتتى باعىتتاعى بۇقامەن سىڭىرە بۋدانداستىرۋ ارقىلى تۇقىمدىق تۇرلەندىرۋگە قاتىستىرىلاتىن بولادى.

III باعىت: شەتەلدەن جانە اسىل تۇقىمدى مال شارۋاشىلىقتارىنان الىنعان تولدەردىڭ بۇقالارى «سىباعا» باعدارلاماسىنا قاتىسۋشىلار مەن جەرگىلىكتى جۇرتقا ساتىلادى. ال ۇرعاشى مال تابىندى جاڭارتۋعا پايدالانىلادى. قازىردىڭ وزىندە شەتەلدەن ساتىپ الىنعان 890 باس اسىل تۇقىمدى مالدىڭ سانى 1600-دەن استى. IV باعىت: شالعايداعى ءىرى قارا مالدىڭ انالىعىن تابيعي جولمەن ۇرىقتاندىرۋ ماقساتىندا ەتتى باعىتتاعى اسىل تۇقىمدى بۇقالارمەن قامتۋ بولىپ تابىلادى.

مال بورداقىلاۋمەن اينالىساتىن 736 مال بورداقىلاۋ الاڭىندا ءبىر اينالىمدا 50 مىڭ باس، ەكى اينالىمدا 100 مىڭ باس مال بورداقىلانسا، بورقىلاۋعا مۇمكىندىگى بار قارا مالدىڭ باسى 200 مىڭنان اسادى.

وسىعان بايلانىستى قوسىمشا مال بورداقىلاۋ الاڭدارىن اشۋ قاجەتتىلىگى تۋىنداپ، ءىس-شارا اياسىندا 10-15 باسقا ارنالعان 1151 مال بورداقىلاۋ الاڭىن اشۋ جوسپارلاندى. سونداي-اق، سەلولىق تۇتىنۋ كووپەراتسياسىن قۇرۋ جوباسى ۇسىنىلۋدا. جوبانى قۇرۋدىڭ باستى ماقساتى — جالپى مال شارۋاشىلىعىنىڭ دامۋىندا ءىرى قارا مال بورداقىلاۋ الاڭدارىن اشىپ، بورداقىلاۋمەن اينالىساتىن شارۋالاردىڭ جۇمىسىن جۇيەلەندىرىپ، جولعا قويۋ. وندىرىلگەن ەتتى جيناقتاپ، نارىقتىق ۇتىمدى باعادا ساتۋ، قايتا وڭدەۋ.

جاڭادان اشىلاتىن تۇتىنۋ كووپەراتسياسىنا تولىق ينفراقۇرىلىمىمەن قوسقاندا قاجەتتى قارجى كولەمى — 33 ميلليون 477 مىڭ تەڭگە. «سىباعا» باعدارلاماسى اياسىندا الىنعان اسىل تۇقىمدى بۇقالاردى بورداقىلاۋ ارقىلى وندىرىلگەن ءمارمار ەتتى الىس، جاقىن شەتەلدەرگە شىعارۋ ماقساتىندا 2016 جىلى وبلىس كولەمىندە ءىرى بازالىق تۇتىنۋ كووپەراتسياسى قۇرىلۋ قاجەت.

Abai.kz