ەلباسى كەزەكتى رەت دەپۋتاتتاردىڭ دەسىن قايتاردى. "كەزەكتى رەت" دەۋىمىزگە سەبەپ: بۇنىڭ الدىن دا بيلىك پارتياسى مەن ءماجىلىس دەپۋتاتتارى ەلباسىن ەرەكشە ۇلىقتاۋ جارىسىنا تۇسكەن بولاتى. الدىڭعىسى پرەزيدەنت نازارباەۆتى «ماڭگىلىك پرەزيدەنت» مارتەبەسىنە ۇسىنسا، كەيىنگىسى ء«نومىرى ءبىرىنشى پرەزيدەنت» دەگەن اتاقتى كولدەڭنەڭ تارتقان. الايدا، نۇرسۇلتان ءابىشۇلى «ۇلت كوشباسىشىسى» اتالىپ، ەكى جاقتىڭ باسەكە-بايگەسىنە «اۋىزدىق سالعان» بولاتىن. اق جاعالى ۇلىقتار سودان كەيىن دە شىداپ جۇرە الماعاندىقتان استانا اتىن «نۇرسۇلتان» دەپ وزگەرتۋگە ۇمتىلعان. سول ۇمتىلىس وسى اتپانىڭ باسىندا تاعى دا قايتالاندى. بۇل جولى ەلوردانىڭ «ەسىم-سويىن» وزگەرتۋ دەيتىن ماسەلەنى قۋانىش سۇلتانوۆ مىرزا كوتەرىپ ەدى. اۋزىمەن قۇس تىستەگەن، ءتىلدى-جاقتى دەپۋتات ۇسىنىستارىنىڭ قاتارىنا پرەزيدەنت نازارباەۆتىڭ اتى-ءجونىن ەرەكەشە اتاۋ كەرەكتىگىن، ەلىمىزدىڭ باستى نىساندارى دا وسى ءبىر قايراتكەردىڭ اتىمەن اتالۋى كەرەكتىگىن دەپۋتاتتىق مانداتىن پايدالانا وتىرىپ تالاپ ەتتى. ايتكەنمەن دە، سۇلتانوۆتىڭدا، ونىڭ ارىپتەستەرىنىڭ دە ۇىنىس-تىلەگى...وتپەي قالدى. وسىنداي كەزدە اقوردانىڭ ماڭىنان تابىلا قوياتىن رف ءباسپاسوزىنىڭ وكىلدەرىنە سۇحبات بەرگەن قر پرەزيدەنتى:

-         مەن وسىندا تۇرامىن، بارلىعىن ەستىپ جاتىرمىن. ينتەرنەتتە جازىپ، ايتىپ جاتىر. بۇعان جاۋاپ تا بەرىپ قويعانمىن. (...) بۇل – برەند (استانانى ايتادى. - رەد). سوندىقتان اتاۋىن وزگەرتۋدىڭ قاجەتى جوق. استانادا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءححى عاسىرداعى ءبىرىنشى ءسامميتى ءوتتى. قىسقى ازيا ويىندارىن قابىلدادىق. EXPO-2017 وتەدى. وسىنىڭ بارلىعى قازاقستانمەن بايلانىستى، بىراق بارلىق جەردە استانا ايتىلادى. مۇنى وزگەرتۋدىڭ قاجەتى نە؟ - دەپ ءسوزدىڭ توتەسىنە كوشتى.

ورىس جۋرناليستەرىمەن سۇحباتتاسقان قر پرەزيدەنتى Bloomberg News اگەنتتىگىنىڭ تىلىشىلەرىمەن دە تىلدەسىپ ءوزىنىڭ كەيدە كوپشىلىك تاراپىنان سىنعا ۇشىراپ قالاتىنىن ايتىپ بەردى.

-         مەن كوپ جىلدان بەرى جۇمىس ىستەپ كەلەمىن. سوندىقتان سىنالىپ جاتىرمىن. كوپ جۇمىس ىستەۋ، از جۇمىس ىستەۋ... بار ماسەلە جۇمىسىڭنىڭ تيىمدىلىگىنە كەلىپ تىرەلەدى. ءوز قىزمەتىڭمەن حالقىڭا پايداڭدى تيگىزەسىڭ بە، تيگىزبەيسىڭ بە - ماسەلە وسىندا دەپ ەسەپتەيمىن", - دەدى ول جۋرناليستەرمەن اڭگىمە بارىسىندا.

-         2020 جىلى نازارباەۆ پرەزيدەنت سايلاۋىنا ۇمىتكەر رەتىندە قاتىسا ما؟ بۇل تۋراسىندا ەلباسى بىلاي دەدى:

-         ءبىزدىڭ زاڭ مەن كونستيتۋتسيامىز جايلى ايتساق، ولار ماعان كانديداتۋرامدى ارى قاراي دا ۇسىنۋىما مۇمكىندىك بەرەدى. بىراق 2020 جىلى نە بولاتىنىن ايتپايمىن. بۇل كوپتەگەن فاكتورعا بايلانىستى.  

Abai.kz