ورداباسى اۋدانىنىڭ اكىمى الماسبەك كەڭەسبەكۇلى مامىتبەكوۆ كاسىپكەرلەرمەن كەزدەسىپ، وسى سالاداعى تۇيتكىلدى ماسەلەلەردى تالقىلادى. بۇل تۋرالى ورداباسى اۋدانى اكىمدىگىنىڭ ءباسپاسوز قىزمەتى حابارلادى.
جالپى، بۇگىنگى تاڭعا اۋدان ەكونوميكاسىنىڭ دامۋىنداعى شاعىن جانە ورتا بيزنەستىڭ ۇلەسى 35 %-دى قۇرايدى. وندىرىلگەن ونەركاسىپ ءونىمىنىڭ كولەمى 12 ملرد. 555 ملن. 200 مىڭ تەڭگەگە جەتىپ، ناقتى كولەم يندەكسى 109,5 پايىزعا تۇراقتادى، وبلىس كولەمىندە اۋدان، قالا اراسىندا ورداباسى اۋدانى كوش باستاپ تۇر. ونەركاسىپ سالاسىندا جۇيە قۇراۋشى لوكوماتيۆتى جوبالار “ورداباسى-نان” جشس، “ورداباسى قۇس”، “ينفراستروي لتد”، “باتسۋ ۆودوكانال”، “اگرو-V”، “سەيتبەك اۋلەتى”، ”شۇبار اسىل تۇقىم كەشەنى”، ”وڭتۇستىك قىش” جانە “ستروي-يۋگ گرۋپپ” جشس-ءرى. 

«بيزنەستىڭ جول كارتاسى-2020» مەملەكەتتىك باعدارلاماسى اياسىندا اعىمداعى جىلدىڭ 9 ايىندا جالپى قۇنى 7 ملرد. 562 ملن. تەڭگەنى قۇرايتىن 8 جوبا ماقۇلداندى. ونىڭ ىشىندە سۋبسيديالاۋ جەلىسى بويىنشا جالپى قۇنى 879,0 ملن.تەڭگەگە 3 جوبا («باتسۋ ۆودوكانال» جشس، جك «جانىبەك سەمبەك»، جك «سەيتحان سەرىكقوجا»), ينفراقۇرىلىمدى دامىتۋ جەلىسى بويىنشا جالپى قۇنى 6 680 ملن.تەڭگەگە 4 جوبا («اكۆا تەرم» جشس، «MEB Co» جشس،«KAZMERBLOCK» «مەربلوك» جشس، «فەبستروي» جشس), گرانتتىق قارجىلاندىرۋ بويىنشا 1 جوبا 3,0 ملن.تەڭگەگە ماقۇلداندى. 

جيىن بارىسىندا اتقارىلعان تىرلىكتەرمەن قاتار، كاسىپكەرلىكتى وڭتايلاندىرۋ جولدارى، جوسپارلار، ۇسىنىس-تىلەكتەر تىڭدالدى. اۋدان باسشىسى جەكە جۇمىس باستايمىن دەۋشى ءار ازاماتتىڭ تىلەگى قاراۋسىز قالمايتىنىن اتاپ ءوتتى.

ەلباسىنىڭ «100 ناقتى قادام» ۇلت جوسپارىنىڭ 94 قادامىن جۇزەگە اسىرۋ ءۇشىن قابىلدانعان «اقپاراتقا قول جەتكىزۋ تۋرالى» زاڭعا سايكەس مەملەكەتتىك ورگانداردىڭ باسشىلارى حالىقتىڭ تالاپ-تىلەگىن تىڭداپ، وزدەرىنىڭ جۇمىستارىنا قاتىستى اقپاراتتاردىڭ اشىقتىعىن قامتاماسىز ەتۋ ءۇشىن قابىلداۋلار، كەزدەسۋلەر وتكىزىپ وتىرۋى ءتيىس. وڭىرىمىزدە وبلىس اكىمىنىڭ تاپسىرماسىنا سايكەس ءجۇرىپ جاتقان «اشىق اكىمدىك» جوباسى دا وسى ماقساتتى-بيلىك پەن حالىقتىڭ اراسىن جاقىنداستىرۋدى، قاراپايىم تۇرعىنداردىڭ تالاپ-تىلەكتەرىنە دەر كەزىندە قۇلاق اسىپ، شەشىلۋىنە ىقپال جاساۋدى كوزدەيدى.

Abai.kz