قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى» رمكق «قازاقستان  رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسى» اياسىندا قازاقستان تاۋەلسىزدىگىنىڭ 25 جىلدىعىنا وراي X رەسپۋبليكالىق ء«تىل-پاراسات» بايقاۋىن وتكىزدى، - دەپ حابارلايدى اباي-اقپارات. اتالعان بايقاۋ الماتى قالاسىندا ەتنوسارالىق قاتىناستار ورتالىعى – دوستىق ۇيىندە وتكىزىلدى.

بايقاۋدىڭ ماقساتى – ورىس جاستارى اراسىندا مەملەكەتتىك ءتىلدىڭ قولدانىس اياسىن كەڭەيتۋ، قازاق ءتىلىن ەركىن مەڭگەرگەن ورىس جاستارىن انىقتاپ، ولاردى ىنتالاندىرۋ، مەملەكەتتىك تىلگە قۇرمەتپەن قاراۋدى قالىپتاستىرۋ، ءتىل مادەنيەتىنىڭ دەڭگەيىن، بەدەلىن ارتتىرۋ.

بايقاۋعا 18-22 جاس ارالىعىنداعى وبلىستىق جانە قالالىق ىرىكتەۋ كەزەڭدەرىنىڭ 12 جەڭىمپازى  قاتىستى. دارىندى جاستارعا ءال فارابي اتىنداعى قازاق ۇلتتىق ۋنيۆەرسيتەتى قازاق ءتىل ءبىلىمى كافەدراسىنىڭ مەڭگەرۋشىسى، ف.ع.ك.، دوتسەنتى سيەزد شارداربەكۇلى اقىمبەك (توراعا), قر مادەنيەت قايراتكەرى، قازاق مەمملەكەتتىك قىزدار پەداگوگيكالىق ۋنيۆەرسيتەتى ونەر جانە مادەنيەت فاكۋلتەتىنىڭ پروفەسسورى الپىسباي مىرسىدىقۇلى كوپباەۆ، اباي  اتىنداعى قازاق ۇلتتىق پەداگوگيكا ۋنيۆەرسيتەتى فيلولوگيالىق پاندەردى وقىتۋ ادىستەمەسى كافەدراسىنىڭ اعا وقىتۋشىسى، پ.ع.ك. گۇلداريعا مەرەكەبايقىزى كەنجەباەۆا، قازاق مەملەكەتتىك قىزدار پەداگوگيكالىق ۋنيۆەرسيتەتى قازاق ادەبيەتى كافەدراسىنىڭ اعا وقىتۋشىسى پارحات قورابايۇلى يۋسۋپ، اباي  اتىنداعى قازاق ۇلتتىق پەداگوگيكا ۋنيۆەرسيتەتى فيلولوگيا جانە كوپتىلدى ءبىلىم بەرۋ ينستيتۋتى ديرەكتورىنىڭ ورىنباسارى نۇپتەكەەۆا گۇلناز بايعوناققىزى قازىلىق ەتتى.

بايقاۋ قورىتىندىسى بويىنشا  الماتى قالاسىنىڭ قاتىسۋشىسى دراچەۆا وكسانا باس جۇلدەگەر اتانىپ، 150 000 اقشالاي سىيلىققا يە بولدى. قىزىلوردا وبلىسىنان كەلگەن دەنيسوۆ كيريلل  1 ورىن (120 000) السا، قوستاناي وبلىسىنىڭ ۇمىتكەرى ەكىنشى ورىنعا (100 000) يە بولدى. الماتى وبلىسىنان كەلگەن قاتىسۋشى گونچاروۆا كريستينا ء ۇشىنشى ورىن (70 000) يەگەرى اتاندى. سولوپوۆا الەنا (كوكشەتاۋ وبلىسى), ميسيموۆا ماريا (شىعىس قازاقستان وبلىسى), كاستەنكو نادەجدا (جامبىل وبلىسى), گاگارينا الينا (قاراعاندى وبلىسى) ىنتالاندىرۋ سىيلىعىنا يە بولدى.

اباي-اقپارات