بۇگىن استانادا VII قازاقستاننىڭ ازاماتتىق فورۋمى ءوتتى. بۇل قوعامدىق ۇيىمدار مەن بيلىك وكىلدەرىنىڭ اراسىندا ءوزارا ىقپالداستىق پەن ءىس-قيمىل جۇرگىزۋ ءۇشىن قۇرىلعان ەرەكشە سۇقبات الاڭى. دەلەگاتتار كەزدەسۋى قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا قر ۇلتتىق مۋزەيىندە ءوتتى.

فورۋمعا رەسپۋبليكالىق جانە وڭىرلىك ۇەۇ وكىلدەرى، پارلامەنت دەپۋتاتتارى، ورتالىق جانە جەرگىلىكتى اتقارۋشى ورگاندارىنىڭ وكىلدەرى، حالىقارالىق ۇيىمداردىڭ وكىلدەرى، ساراپشىلار جانە باق وكىلدەرى قاتىستى.

«ازاماتتىق قوعام دامۋىنىڭ جاعدايى جانە پەرسپەكتيۆالارى» تاقىرىبىندا وتكەن فورۋمنىڭ پلەنارلىق وتىرىسىنا قازاقستان رەسپۋبليكاسى پرەمەر-ءمينيسترىنىڭ ورىنباسارى يمانعالي تاسماعامبەتوۆ قاتىستى. تالقىلاۋ بارىسىندا ۆيتسە-پرەمەر ۇكىمەتتىك ەمەس ۇيىمداردىڭ ەلدىڭ الەۋمەتتىك-ەكونوميكالىق جانە قوعامدىق ومىرىندەگى جاسامپاز ءرولىنىڭ ماڭىزىن ەرەكشە اتاپ ءوتتى.

«ازاماتتىق فورۋم دەگەنىمىزدىڭ ءوزى – ءبىر ۇجىمنىڭ، يا ءبىر ۇيىمنىڭ كۇندەلىكتى وتەتىن جينالىسى ەمەس، پىكىر-تالاسى قايناعان، الەۋمەتتىڭ ايناسىن ايشىقتاپ، وسىعان وراي ۇسىنىس-تىلەگىن دايىنداعان ناعىز ويلى دا ورامدى ورتا. ونىڭ قوعامعا بەرەر قۇندىلىعى دا، مەملەكەتكە كەرەك شىندىعى دا، مىنە، وسىندا. ءسوز جوق، وسىندا وتىرعان كوپشىلىگىڭىزدىڭ ەل دامۋىندا قانشالىقتى ۇلەستەرىڭىز مول بولسا، تاۋەلسىزدىگىمىز بەن ەلباسىنىڭ دا وزدەرىڭىز تاسىن «ورگە دومالاتىپ جۇرگەن» ۇكىمەتتىك ەمەس ۇيىمداردىڭ ءوسىپ-وركەندەۋىندە ءرولى تالاسسىز» - دەدى ءوز سوزىندە يمانعالي تاسماعامبەتوۆ.

ۆيتسە-پرەمەر اتاپ وتكەندەي، بۇگىنگى تاڭدا قازاقستاندا 18 مىڭنان اسا قوعامدىق ۇيىمدار تىركەلگەن، ونىڭ ىشىندە 8 مىڭ ۇكىمەتتىك ەمەس ۇيىم بەلسەندى جۇمىس جاسايدى. ازاماتتىق سەكتوردا 30 مىڭ ادام جۇمىسپەن قامتىلعان. نەگىزىنەن بۇل جاستار ساياساتى مەن بالالار باستاماسى، حالىقتىڭ الەۋمەتتىك از قامتىلعان توبىن قولداۋ، ءبىلىم جانە عىلىم، سپورت جانە دەنە تاربيەسى، سالاۋاتتى ءومىر سالتىن ناسيحاتتاۋ، ازاماتتاردىڭ ءومىرى مەن قۇقىقتارىن قورعاۋ سالاسىنداعى قىزمەتتەر.

فورۋم بارىسىندا ۇكىمەتتىك ەمەس ۇيىمدارى جەتىستىكتەرىن كورسەتەتىن كورمە ءوتتى. وندا قازاقستان تاۋەلسىزدىگىنىڭ قالىپتاسۋى مەن نىعايۋىنداعى قوعامدىق بىرلەستىكتەردىڭ قوسقان ۇلەسى تانىستىرىلىپ، فورۋم دەلەگاتتارى مينيسترلىكتەر مەن ۆەدومستۆولاردىڭ باسشىلارىمەن كەزدەستى. سونداي-اق، رەسپۋبليكالىق «تانىم» بايقاۋىنىڭ جەڭىمپازدارىن سالتاناتتى ماراپاتتاۋ ءراسىمى ءوتتى.

ەسكە سالا كەتەيىك، وسىناۋ فورۋم قارساڭىندا استانا، الماتى قالالارىندا جانە وبلىس ورتالىقتارىندا ۇكىمەتتىك ەمەس ۇيىمداردىڭ وڭىرلىك فورۋمدارى ءوتتى. ونىڭ بارىسىندا ايماقتار الدىندا تۇرعان ماسەلەلەردى شەشۋ جولدارى تالقىلانىپ، ۇسىنىمدار ازىرلەندى جانە رەسپۋبليكالىق فورۋمعا قاتىساتىن دەلەگاتتار سايلاندى.

سونىمەن قاتار، «تاۋەلسىزدىكتىڭ 25 جىلدىعىنا ۇەۇ-نان 25 باستاما» رەسپۋبليكالىق اكتسياسى ءوتتى. ياعني، ءاربىر وڭىرلىك فورۋم بارىسىندا ۇەۇ وكىلدەرى بىرىگىپ ايماقتىڭ ناقتى ءبىر پروبلەماسىن شەشۋگە باعىتتالعان جوبانى جۇزەگە اسىرۋ باستاماسىن كوتەردى. وڭىرلىك 16 باستامامەن قاتار، 9 رەسپۋبليكالىق قوعامدىق بىرلەستىك الەۋمەتتىك ماسەلەلەردى شەشۋگە باعىتتالعان 9 باستاما كوتەردى. وسىلايشا، «تاۋەلسىزدىكتىڭ 25 جىلدىعىنا ۇەۇ-نان 25 باستاما» رەسپۋبليكالىق اكتسياسى سالتاناتتى تۇردە باستاۋ الدى.

اباي اقپارات