جاقىندا قازاقستاننىڭ ءبىلىم جانە عىلىم مينيسترلىگىندە از-كەم رەفورما جاسالدى. ەل تاريحىنداعى ەڭ رەفورماشىل مينيسترلىك بۇل جولى ەجەلگى قازاقستان تاريحىن جوو-دا وقىتپاۋ تۋرالى ماسەلە كوتەردى.

وسىعان بايلانىستى ەكونوميست  مۇحتار تايجان پىكىر ءبىلدىرىپ، كەي دەرەكتەردى ءبولىستى.

مۇحتار تايجان، ەكونوميست:

- بارىمىزگە بەلگىلى، ەجەلگى قازاقستان تاريحى جوو وقۋلىقتارىنان الىنىپ تاستالدى. ەندى ۋنيۆەرسيتەتتەر مەن ينستيتۋتتاردا ستۋدەنتتەر قازاقستان تاريحىن 1905 جىلدان بەرى قاراي وقيتىن بولادى. بۇل ۇلكەن قيانات. كەزىندە ەرمۇحان بەكماحانوۆ تۇڭعىش بولىپ اشقان ەجەلگى قازاقستان تاريحى كافەدرالارىن بيىل جاپتىق.

مەن جوعارى ءبىلىمدى  پولشانىڭ ۆارشاۆا ۋنيۆەرسيتەتىنەن الدىم. ول جەردەن نە كوردىم؟ پولياكتار ءوز بالالارىنا تاريحتى مەكتەپ قابىرعاسىنان ءجىتى سىڭىرەدى. سودان كەيىن جوو-دا تەرەڭدەتىپ وقىتادى. سەبەبى، ۇلتتىڭ تاريحى سول ۇلتتىڭ سانا سەزىمىنىڭ بيىك، ءور بولۋى ءۇشىن كەرەك. جوو-دا تاريح تەرەڭدەتىلىپ وقىتىلۋى كەرەك. مەكتەپتەردە تاريح عىلىم رەتىندە دامىمايدى. سەبەبى وعان شارت جوق. سوندىقتان ەجەلگى قازاقستان تاريحىن جوو وقۋلىقتارىنا قايتا ەنگىزۋىمىز كەرەك.

حوش، رەفورماتور مىرزالاردىڭ ءبىلىم جۇيەسىنە جاساپ جاتقان رەۆوليۋتسياسى راسىندا ۇلتتىق تاريحقا جاسالىپ جاتقان قاستاندىق ەمەس پە؟ جالقى سۇراعىمىز مىناۋ ەدى: ەجەلگى قازاقستان تاريحىن نەگە وقۋ باعدارلاماسىنان الىپ تاستادى؟

سويتسەك، ءبىرلى-جارىم رەكتور مينيسترلىككە حات جولداپتى. حات جولداپ، ەجەلگى تاريحتى وقىتپاي-اق، قويۋعا بولاتىنىن ايتىپتى.

مىسالى، ساكەن امانجولوۆ اتىنداعى شقو مەملەكەتتىك ۋنيۆەرسيتەتىنىڭ رەكتورى ا.كۋاندىقوۆ ءوز حاتىندا «قازاقستاننىڭ جاڭا تاريحى» (نەمەسە جاڭا قازاقستاننىڭ تاريحى) دەگەن كۋرستىڭ ماڭىزى مەن ءمانىن اشىپ جازىپ، «ۇلى دالا ەلى»، «ماڭگىلىك ەل» يدەيالارىن كوبىرەك ناسيحاتتاۋدى سۇراپتى.

ءال-فارابي اتىنداعى قازۇۋ-دىڭ وقۋ ءىسى جونىندەگى پرورەكتورى د.احمەت-زاكي دە بۇل ۇسىنىستى قولداپ، جاڭا قازاقستاننىڭ تاريحىن وقىتۋدى ءوتىنىپتى.

س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ پرورەكتورى گ.احمەتوۆا، د.سەرىكباەۆ اتىنداعى شقو مەملەكەتتىك تەحنيكالىق ۋنيۆەرسيتەتىنىڭ رەكتورى ج. شايماردانوۆا، قورقىت اتا اتىنداعى قىزىلوردا مەملەكەتتىك ۋنيۆەرسيتەتى رەكتورىنىڭ مىندەتىن اتقارۋشى ا.ءجۇنىسوۆ، م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى م.سارىبەكوۆ، م.وتەمىسۇلى اتىنداعى بقو مەملەكەتتىك ۋنيۆەرسيتەتى رەكتورىنىڭ مىندەتىن اتقارۋشى ا.تاسماعامبەتوۆ، رۋدنىي يندۋستريالىق ينستيتۋتى رەكتورىنىڭ مىندەتىن اتقارۋشى ل.بوجكو دا وسى مازمۇندا مينيسترلىككە ءۇشبۋ حات جازىپتى.

ءسويتىپ، ەسكى تاريحتى قويا تۇرىپ، جاڭا قازاقستاننىڭ تاريحىن وقىتۋ وسكەلەڭ ۇرپاقتى تاربيەلەۋدە ماڭىزدى ەكەنىن جەتەر جەرىنە جەتكىزىپ تۇرىپ جازىپتى. «Abai.kz» پورتالى رەكتورلاردىڭ رەسمي حاتىن ۇسىنىپ وتىر.

نۇرزات توعجان

Abai.kz