وندا نەگىزىنەن ەلىمىزدىڭ 25 جىلدا قول جەتكىزگەن جەتىستىكتەرى مەن كواليتسيانىڭ ازاماتتىق قوعامدى نىعايتۋداعى ءرولى ءسوز بولدى.

كەزدەسۋدى اشقان مۇحتار قۇل-مۇحاممەد مەملەكەتتىك شەكارانى حالىقارالىق-قۇقىقتىق راسىمدەۋ، كونستيتۋتسيا قابىلداۋ، ەتنوسارالىق جانە دىنارالىق قاتىناستىڭ بىرەگەي ۇلگىسىن قۇرۋ، دامۋدىڭ ۇزاق مەرزىمدى ستراتەگياسىن بەكىتۋ، نۇرسۇلتان نازارباەۆ­تىڭ ينتەگراتسيالىق جانە يادرولىق قارۋعا قارسى باستامالارى، ەلىمىزدىڭ بىرىككەن ۇلتتار ۇيىمى قاۋىپسىزدىك كەڭەسىنىڭ مۇشەلىگىنە سايلانۋى، قازاق ەلىنىڭ جاڭا استاناسىن سالۋ سياقتى تاريحي شەشىمدەرگە ەرەكشە نازار اۋدارىپ، تاۋەلسىز قازاقستان­نىڭ باستى جەتىستىكتەرىن اتاپ ءوتتى.
– «ەلباسىنىڭ ساليقالى ساياساتىنىڭ ارقاسىندا ەلىمىز تاۋەلسىزدىكتىڭ 25 جى­لىندا تولاعاي تابىستارعا قول جەتكىزدى. بۇل قازاقستان تاۋەلسىزدىگىنىڭ 25 جىلدىعى دەكلاراتسياسىندا ايقىن كورىنىس تاپقان.
بىرىنشىدەن، ەل تاريحىندا العاش رەت پرەزيدەنت نۇرسۇلتان نازارباەۆتىڭ باسشىلىعىمەن قازاقستاننىڭ مەملەكەتتىك شەكاراسى شەگەندەلىپ، حالىقارالىق-قۇقىقتىق تۇرعىدان راسىمدەلدى.
ەكىنشىدەن، ەلباسىنىڭ بيىك بەدەلى مەن بۇكىلحالىقتىق قولداۋدىڭ ارقاسىندا مەملەكەتتىڭ ساياسي، قۇقىقتىق جانە الەۋ­مەتتىك-ەكونوميكالىق تۇعىرىن قالاعان اتا زاڭىمىز – قازاقستان رەسپۋبليكاسىنىڭ كونستيتۋتسياسى قابىلداندى. قوس پالاتالى پارلامەنت، كاسىبي ۇكىمەت، تاۋەلسىز سوت بيلىگى جاساقتالىپ، بۇگىنگى كۇنى جۇيەلى جۇمىس ىستەۋدە. سونداي-اق قازىرگى تاڭدا موبيلدىلىگى، تەحنيكالىق جابدىقتالۋ دەڭگەيى جانە كاسىبي قۇرىلىمى جونىنەن پوستكەڭەستىك ەلدەر اراسىندا جەتەكشى ورىنعا يە بولىپ وتىرعان زاماناۋي قارۋلى كۇشتەرىمىز جاساقتالدى.
ۇشىنشىدەن، مەملەكەت باسشىسىنىڭ باستاماسىمەن قۇرىلعان قازاقستان حالقى اسسامبلەياسىنىڭ جۇمىسى ناتيجەسىندە، مەملەكەتتە ەتنوسارالىق جانە دىنارالىق قاتىناستىڭ بىرەگەي ۇلگىسى قالىپتاستى. ول بۇگىندە ەلىمىزدەگى بىرلىك پەن بەيبىتشىلىكتىڭ جانە قوعامدىق كەلىسىمنىڭ باستى كەپىلى بولىپ وتىر.
تورتىنشىدەن، ەلباسىمىز «قازاقستان – 2030» جانە «قازاقستان – 2050» سىندى ستراتەگيالىق قۇجاتتاردى قابىلداپ، رەسپۋبليكامىز ءۇشىن دامۋدىڭ داڭعىل جولىن ايقىنداپ بەردى. قازاقستاندى الەمنىڭ ەڭ دامىعان 30 ەلىنىڭ قاتارىنا قوسۋدى كوزدەيتىن «100 ناقتى قادام» ۇلت جوسپارى مەن بەس ينستيتۋتتىق رەفورما جەمىستى جۇزەگە اسىرىلۋدا.
پرەزيدەنتىمىز قالىپتاستىرعان قازاقستاننىڭ بىرەگەي دامۋ جولىن بۇگىندە الەمنىڭ كوپتەگەن ەلدەرى ۇلگى رەتىندە قابىلدايدى. ءبىز پوستكەڭەستىك كەڭىستىكتە شەتەل ينۆەستيتسيالارىن تارتۋدا نەگىزگى ورتالىققا اينالدىق. قازىردىڭ وزىندە شەتەلدىك كومپانيالار مەن بانكتەر ەكونوميكامىزعا 260 ميلليارد دوللاردان استام قارجى قۇيدى. يندۋستريالىق-يننوۆاتسيالىق باعدارلامانى جۇزەگە اسىرۋدىڭ العاشقى بەس جىلىندا-اق 770 جاڭا ءوندىرىس ورنى اشىلىپ، 75 مىڭنان استام ادام جۇمىسپەن قامتىلدى. ال «نۇرلى جول» ينفراقۇرىلىمدى دامىتۋ باعدارلاماسىنىڭ ارقاسىندا قازاق دالاسىندا مىڭداعان شاقىرىم جاڭا ماگيسترالدار، ميلليونداعان شارشى مەتردى قۇرايتىن باسپانا جانە جۇزدەگەن الەۋمەتتىك نىساندار بوي كوتەردى.
بەسىنشىدەن، نۇرسۇلتان نازارباەۆ قازاقستاندى وڭىردەگى ينتەگراتسيالىق ۇدەرىستەردىڭ باستى لوكوموتيۆىنە جانە شانحاي ىنتىماقتاستىق ۇيىمى، ەۋ­رازيالىق ەكونوميكالىق وداق، ۇجىمدىق قاۋىپسىزدىك تۋرالى شارت ۇيىمى، ۇلى جىبەك جولىن جانداندىرۋ سياقتى ءىرى حالىقارالىق جوبالاردىڭ بەلدى مۇشەسىنە اينالدىردى. ودان بولەك، مەملەكەت باسشىسىنىڭ جوعارى بەدەلىنىڭ ارقاسىندا ەلىمىز تمد ەلدەرىنەن ءبىرىنشى بولىپ ەۋروپاداعى قاۋىپسىزدىك جانە ىنتىماقتاستىق ۇيىمىنا جەمىستى توراعالىق ەتتى جانە استانادا اتالعان ۇيىمنىڭ تاريحي ءسامميتىن وتە جوعارى دەڭگەيدە وتكىزدى.
التىنشىدان، يادرولىق قارۋدان ءوز ەركىمەن باس تارتىپ، سەمەي پوليگونىنداعى سىناقتاردى توقتاتقان مەملەكەت باسشىسى ەلىمىزدى حالىقارالىق يادرولىق قارۋعا قارسى قوزعالىستىڭ كوشباسشىسى رەتىندە تانىتتى. نۇرسۇلتان نازارباەۆتىڭ «الەم. XXI عاسىر» اتتى مانيفەسىن الەمدىك قوعامداستىق جاھاندىق دامۋدىڭ جاڭا پاراديگماسى دەپ مويىنداپ، بۇۇ-نىڭ رەسمي قۇجاتتارىنىڭ قاتارىنا قوستى. سونىڭ ناتيجەسىندە، 2017 جىلدىڭ 1 قاڭتارىنان باستاپ ەل تاريحىندا العاش رەت قازاقستان بىرىككەن ۇلتتار ۇيىمى قاۋىپسىزدىك كەڭەسىنىڭ مۇشەسى بولماق. بۇل – ەلباسى جۇرگىزىپ وتىرعان سىرتقى ساياساتتىڭ باستى جەڭىسى.
جەتىنشىدەن، نۇرسۇلتان نازارباەۆ ەۋرازيانىڭ جاۋھارىنا بالانعان قا­زاقستاننىڭ جاڭا ەلورداسىن سالدى. سارىارقانىڭ توسىندەگى وسىناۋ اسەم قالا بۇگىندە ءاربىر قازاقستاندىقتىڭ ماق­تانىشىنا اينالدى. كەلەسى جىلى «ەكسپو – 2017» حالىقارالىق كورمەسىن وتكىزۋ ارقىلى ەلىمىز بەن استانا دامۋدىڭ جاڭا كەزەڭىنە اياق باساتىنىنا سەنىم بىلدىرەمىن.
ارينە، نۇرسۇلتان نازارباەۆتىڭ ارقاسىندا قازاقستاننىڭ 25 جىلدا العان اسۋلارى مەن باعىندىرعان بيىكتەرىن ءبىر بايانداماعا سىيعىزۋ مۇمكىن ەمەس.
ەلىمىزدىڭ بارلىق ازاماتتارىن «تاۋەلسىز قازاقستان» مونۋمەنتىن تۇرعىزۋ، اتا زاڭىمىزدا ەلباسىمىزدىڭ ەرەن ەڭبەگىن اتاپ كورسەتۋ مەن ونىڭ ەسىمىن ەلورداعا بەرۋ باستامالارىن قولداۋعا شاقىرامىن. ويتكەنى تاۋەلسىزدىگىمىزدىڭ جەڭىسى – مەملەكەت باسشىسى مەن بارشا قازاقستان حالقىنىڭ جەڭىسى، – دەدى «نۇر وتان» پار­تياسى توراعاسىنىڭ ءبىرىنشى ورىنباسارى.
ءوز كەزەگىندە «اق جول» پارتياسىنىڭ توراعاسى ازات پەرۋاشەۆ تاۋەلسىزدىكتىڭ العاشقى كۇنىنەن باستاپ ەلدى جارقىن بولاشاققا باستاعان ەلباسىنىڭ باتىل قادامدارىنا توقتالدى. «تاۋەل­سىزدىكتىڭ 25 جىلىندا قازاقستان وزگەلەرگە ۇلگى بولاتىن، ەكونوميكاسى مەن الەۋمەتتىك جاعدايى قۋاتتى، ىرگەسى بەرىك مەملەكەتكە اينالدى. پرەزيدەنتىمىزدىڭ باسشىلىعىمەن قازاقستان دامۋدىڭ داڭعىل جولىنا ءتۇستى» دەدى.

ازات پەرۋاشەۆ، 
«اق جول» پارتياسىنىڭ توراعاسى:
– شيرەك عاسىر ىشىندە جاڭا قازاقستان قالىپتاستى. تاۋەلسىزدىكتىڭ 25 جىلىنداعى تابىستارىمىز ماڭگىلىك ەل تۇجىرىمداماسىندا كورسەتىلگەن ۇزاق مەرزىمدى ۇلتتىق مۇددەلەر مەن ەلباسى ەڭبەگىنىڭ زاڭدى ناتيجەسى.
دامىعان، باسەكەگە قابىلەتتى، ءبىلىمدى، ەڭبەكقور حالقى بار قۋاتتى مەملەكەت قانا شىنايى تاۋەلسىز بولادى. ەلباسى تاۋەلسىزدىك ەڭ باستى بايلىعىمىز ەكەنىن ۇنەمى ايتىپ كەلەدى. تاۋەلسىزدىكتى ەشبىر الەۋمەتتىك نەمەسە ماتەريالدىق يگىلىكپەن سالىستىرۋعا بولمايدى. ال ونى ساقتاپ قالۋ ءۇشىن كەز كەلگەن سىناقتارعا، ءتىپتى قۇرباندىقتارعا دا بارۋعا بولادى. وعان ءبىزدىڭ اتا-بابامىزدىڭ ازاتتىق جولىنداعى كۇرەسى دالەل.
ەلدىگىمىزدى ودان ءارى نىعايتۋ ءۇشىن بارشا اقجولدىقتار قازاقستان رەسپۋبليكاسى تاۋەلسىزدىگىنىڭ 25 جىلدىعى دەكلاراتسياسىن قولدايدى.

جامبىل احمەتبەكوۆ، 
قازاقستان كوممۋنيستىك حالىق پارتياسىنىڭ حاتشىسى:
– كەز كەلگەن مىقتى مەملەكەتتىڭ الەۋمەتتىك جاعى دا بەرىك بولۋى كەرەك. قازاقستان تاۋەلسىزدىگىنىڭ 25 جىلى ىشىندە نۇرسۇلتان نازارباەۆتىڭ تۇراقتى ساياسي جانە ەكونوميكالىق باعىتىنىڭ ارقاسىندا الەۋمەتتىك ساياسات ەلىمىزدىڭ قارجىلىق جەتىستىكتەرى جانە مۇمكىندىكتەرىمەن بىرقالىپتى دامۋدا. الەمدەگى قيىن قارجىلىق احۋالعا قاراماستان، الەۋمەتتىك باستامالار ناقتى ورىندالۋدا.
مەملەكەت باسشىسى حالىقارالىق ينتەگراتسيا­لىق ۇدەرىستەردىڭ يدەيالىق شابىت بەرۋشىسى بولىپ تابىلادى. ەگەمەندىكتىڭ شيرەك عاسىرى ىشىندە ەلىمىز ەلباسىنىڭ باستاماسىمەن اسا كۇردەلى ەكونوميكالىق جانە ساياسي تۇرلەنۋدى باستان وتكەردى. وسىعان وراي قازاقستان كوممۋنيستەرى دەپۋتاتتار قابىلداعان دەكلاراتسيانى تولىعىمەن قولدايدى.

سەرىك سۇلتانعالي، 
«بىرلىك» ساياسي پارتياسىنىڭ توراعاسى:
– قازىرگى تاڭدا ءبىز العا قاراي سەنىممەن ءجۇرىپ كەلەمىز. وتانىمىز – قازاقستاننىڭ قۋاتتى ساياسي جانە الەۋمەتتىك-ەكونوميكالىق تۇراقتىلىق جاعدايىندا دامىپ كەلە جاتقانىنا ءبارىمىز كۋامىز. قازاقستاندىقتاردىڭ ءال-اۋقاتى ارتىپ، حالىقارالىق ارەنادا ەلىمىزدىڭ بەدەلى بيىكتەپ كەلەدى.
تاۋەلسىزدىك جىلدارى قازاقستان ەلباسىنىڭ دانا ساياساتىنىڭ ارقاسىندا تۇراقتىلىقتى ساقتاپ، قوعامدىق كەلىسىمدى قالىپتاستىرۋدا ەلەۋلى جەتىستىكتەرگە قول جەتكىزدى. ال ەكونوميكا، مادەنيەت پەن عىلىمدى دامىتۋداعى ەل جەتىستىگى شىن مانىندە، بارلىق قازاقستاندىقتىڭ مەرەيى بولىپ سانالادى. سوندىقتان «بىرلىك» پارتياسى ەلىمىزدىڭ جارقىن بولاشاعى ءۇشىن جاسالعان بارلىق يگى باستامانى قولدايدى.

ءالي بەكتاەۆ، 
«اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى:
– پارلامەنت پالاتالارىنىڭ بىرلەسكەن وتىرىسىندا قابىلدانعان قازاقستان رەسپۋب­ليكاسى تاۋەلسىزدىگىنىڭ 25 جىلدىعى دەكلاراتسياسىن تولىق قولدايتىنىمىزدى ايتقىم كەلەدى. وندا قازاقستاننىڭ سوڭعى 25 جىلداعى جەتىستىكتەرى انىق جازىلعان. سونداي-اق حالىقتىڭ ەڭبەگى مەن ەلباسىنىڭ ولشەۋسىز قىزمەتى شىنايى كورسەتىلدى.
تاۋەلسىزدىك ارقىلى قازاقستان دۇنيەجۇزى بىلەتىن قۋاتتى مەملەكەتكە اينالدى. قازىر وزگە ەلدەر قازاقستاندى مويىنداپ، دامۋ جولىمىزدى ۇلگى رەتىندە الاتىن كۇنگە جەتتىك. ءبىزدىڭ كوپتەگەن الپاۋىت ەلدەرمەن تەرەزەمىز تەڭەستى. مۇنىڭ بارلىعى ەڭ بىرىنشىدەن، ەلباسىنىڭ ارقاسى.

باقتىقوجا ىزمۇحامبەتوۆ، 
رەسپۋبليكالىق ارداگەرلەر ۇيىمىنىڭ توراعاسى، پارلامەنت ءماجىلىسىنىڭ دەپۋتاتى:
– تاريح ءۇشىن قاس-قاعىم ءسات بولىپ سانالاتىن تاۋەلسىزدىكتىڭ 25 جىلىندا قازاقستان اۋىز تولتىرىپ ايتارلىقتاي جەتىستىكتەرگە قول جەتكىزدى. وسى ۋاقىت ىشىندە ەلىمىز ەلباسىنىڭ كورەگەن، تەگەۋرىندى ساياساتىنىڭ ارقاسىندا اسا قيىن جاھاندىق داعدارىستاردى ارتتا قالدىرىپ، قارقىندى دامىپ، الەمگە بەلگىلى ەلگە اينالدى.
الداعى ۋاقىتتا دا وسى باعىتىمىزدان تايماي، بەرەكە-بىرلىگىمىزدى ارتتىرۋ ءۇشىن مەملەكەت باسشىسىنىڭ دانا ساياساتى توڭىرەگىندە توپتاسۋىمىز كەرەك. وسى رەتتە تاۋەلسىزدىكتىڭ 25 جىلدىق تاريحي مەجەسى قارساڭىندا قازاقستاندىق ارداگەرلەر قاۋىمى بولاشاق ۇرپاق الدىنداعى جاۋاپكەرشىلىكتى سەزىنە وتىرىپ، پارلامەنتتە قابىلدانعان قازاقستان رەسپۋبليكاسى تاۋەلسىزدىگىنىڭ 25 جىلدىعى دەكلاراتسياسىن قولدايدى.

مۇرات جۇرىنوۆ، 
ۇلتتىق عىلىم اكادەمياسىنىڭ پرەزيدەنتى:
– مەملەكەت باسشىسىنىڭ الەمدىك سىن-تەگەۋرىن­دەردىڭ الدىن الىپ، حالىقتى كەمەل كەلە­شەككە باستاۋى بىزگە قازاقستاندىق دامۋ جولىنىڭ ىرگەتاسىن بەكەمدەۋگە مۇمكىندىك بەردى. قازاقستاندا تۇڭعىش رەت ستراتەگيالىق جوسپارلاۋ ناتيجەسى ەنگىزىلىپ، ەتنوسارالىق جانە كونفەسسياارالىق كەلىسىمنىڭ ەرەكشە مودەلى قالىپتاستى جانە قارجى جۇيەسى وزگەرتىلدى. مەملەكەت جاڭا زاماننىڭ كادرلارىن دايىنداۋعا ەرەكشە ءمان بەرىپ وتىر.
ەلباسىمىز ەلدىڭ جەتىستىگى تىكەلەي ادام كاپيتالىمەن بايلانىستى ەكەنىن ءاردايىم ايتىپ كەلەدى. قازاقستاننىڭ بولاشاق عالىمدارىنىڭ مۇمكىندىكتەرىن جاڭا بەلەسكە شىعارۋ ءۇشىن تۇراقتى تۇردە تىڭ باعدارلامالار جۇزەگە اسىرىلىپ كەلەدى. وسىنىڭ ءبارى پرەزيدەنتىمىزدىڭ ەرەن ەڭبەگىنىڭ جەمىسى. سول سەبەپتى، قازاقستان عالىمدارى دەپۋتاتتاردىڭ باستاماسىنا ءوز ۇندەرىن قوسىپ، قولداۋ بىلدىرەدى.

ابىلعازى قۇسايىنوۆ، 
كاسىپوداقتار فەدەراتسياسىنىڭ توراعاسى:
– نۇرسۇلتان نازارباەۆتىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» باعدارلاماسىندا ماكروەكونوميكالىق دامۋ كورسەتكىشتەرىنە قاراماستان، الەۋمەتتىك جۇيەنى دامىتۋعا باعىتتالعان نەگىزگى جاڭا قادامدار قاراستىرىلعان. قوعامدىق ءومىردىڭ اسپەكتىلەرىنە تالداۋ جاساي وتىرىپ، مەملەكەت باسشىسى كاسىپورىندارعا دا باسىم مىندەتتەر جۇكتەدى. بۇل تاپسىرمالاردىڭ دەنى ەڭ الدىمەن ەڭبەك قارىم-قاتىناستارىن رەتتەۋدە دەموكراتيالىق تاسىلدەردى ەنگىزۋ ماسەلەلەرىنە قاتىستى. بۇل مىندەتتەردىڭ باسىم بولىگى مەملەكەت باسشىسىنىڭ كورسەتكەن باعىتىنىڭ ارقاسىندا ورىندالعان بولاتىن.
وسى ورايدا حالىق قالاۋلىلارىنىڭ بۇگىنگى باستاماسىن كاسىپوداقتار فەدەراتسياسىنىڭ قولدايتىنىن جەتكىزەمىن.

ابىلاي مىرزاحمەتوۆ، 
«اتامەكەن» ۇكپ باسقارما توراعاسى:
– اتا-بابامىز اڭساعان، سول جولدا قان توككەن تاۋەلسىزدىكتى كورۋ باقىتى بىزگە بۇيىرىپ وتىر. از عانا ۋاقىتتىڭ ىشىندە قازاقستان شەكاراسىن بەكىتىپ، قۋاتتى، دامىعان ەلگە اينالدى. ەلباسىنىڭ يگى باستامالارىنىڭ ارقاسىندا قازاقستاندى وتە قىسقا ۋاقىتتىڭ ىشىندە بۇكىل الەم مويىندادى.
سونىمەن قاتار ءوزىمىزدىڭ جاڭا، باسەكەگە قا­بى­لەتتى ەكونوميكامىزدى قۇردىق. ءوندىرىس اياسى كەڭەيىپ، شەتەلدىك ءىرى كومپانيالارمەن ارىپتەستىگىمىز نى­عايدى. ودان بولەك، ەلىمىزدە شاعىن جانە ورتا كا­سىپ­كەرلىكتىڭ دامۋ قارقىنى دا كوڭىل قۋانتادى. بۇگىندە قازاقستاندا 1 ملن 300 مىڭ كاسىپكەر جەمىستى جۇمىس ىستەپ، ەل ەكو­نو­ميكاسىنىڭ لوكوموتيۆىنە اينالدى. تاۋەلسىزدىك العان كەزدە شيرەك عاسىردان كەيىن وسىنداي جەتىستىكتەرگە قول جەتكىزەمىز دەپ ويلاپ پا ەدىك؟! وسىنىڭ بارلىعى پرەزيدەنتىمىزدىڭ ەل ءۇشىن جاساپ جاتقان يگى ىستەرىنىڭ ناتيجەسى. سوندىقتان بۇگىنگى باستامانى ەلىمىزدىڭ بارلىق كاسىپكەرلەرى تولىق قولدايدى.

ال قازاقستان كوممۋنيستىك حالىق پارتياسىنىڭ حاتشىسى جامبىل احمەتبەكوۆ تاۋەلسىزدىك جىلدارىندا العان اسۋلارىمىز بەن باعىندىرعان بەلەستەرىمىز ەلباسىمىزدىڭ ەرەن ەڭبەگىنىڭ جەمىسى ەكەنىنە قاتىسۋشىلاردىڭ نازارىن اۋداردى.
سونداي-اق اتالعان ءىس-شاراعا قاتىسقان ەلىمىزدىڭ جەتەكشى ساياسي پارتيالارى مەن قوعامدىق بىرلەستىكتەرىنىڭ باسشىلارى دا مەملەكەتىمىزدىڭ جەڭىستەرى مەن جەتىستىكتەرىن تىلگە تيەك ەتتى. اتاپ ايتقاندا، «بىرلىك» پارتياسىنىڭ توراعاسى سەرىك سۇلتانعالي، «اۋىل» حالىقتىق-دەموكراتيالىق پاتريوت­تىق پارتياسىنىڭ توراعاسى ءالي بەكتاەۆ، حالىق قاھارمانى، ءماجىلىس دەپۋتاتى باقىتجان ەرتاەۆ، «اتامەكەن» ۇكپ باسقارما توراعاسى ابىلاي مىرزاحمەتوۆ، قحا كەڭەسىنىڭ مۇشەسى، ءماجىلىس دەپۋتاتى احمەت مۋرادوۆ، قازاقستان ازاماتتىق اليانسىنىڭ پرەزيدەنتى نۇرلان ەرىمبەتوۆ، رەسپۋبليكالىق ارداگەرلەر ۇيىمىنىڭ توراعاسى، ءماجىلىس دەپۋتاتى باقتىقوجا ىزمۇحامبەتوۆ، كاسىپوداقتار فەدەراتسياس­ى­نىڭ توراعاسى ابىلعازى قۇسايىنوۆ، ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ جانە قازاقستان رەسپۋبليكاسى­نىڭ پرەزيدەنتى جانىنداعى راقىمشىلىق جاساۋ ماسەلەلەرى جونىندەگى كوميسسيانىڭ ءتورايىمى زينايدا فەدوتوۆا تاۋەلسىز قازاقستاننىڭ گۇلدەنۋى مەن كوركەيۋى ەلباسىنىڭ ەسىمىمەن تىكەلەي بايلانىستى ەكەنىن جەتكىزدى.
جيىن قورىتىندىسى بويىنشا دەموكراتيالىق كۇشتەردىڭ جالپىۇلتتىق كواليتسياسى قازاقستاندىقتارعا ارنالعان ۇندەۋ قابىلدادى. وندا تاۋەلسىزدىك جەتىستىكتەرى – تۇڭعىش پرەزيدەنتتىڭ كوشباسشىلىعى، جالپىۇلتتىق بىرلىك، بارشا قازاقستاندىقتاردىڭ جانكەشتى ەڭبەگى مەن ىنتا-جىگەرى ەكەنى اتاپ وتىلگەن. سونداي-اق ازاماتتاردى ەلباسىنىڭ مەملەكەتتىك باعىت-باعدارى اياسىنداعى بىرلىك پەن ىنتىماققا شاقىرعان ۇندەۋدە بەس ينستيتۋتتىق رەفورما، «100 ناقتى قادام» ۇلت جوسپارى جانە ماڭگىلىك ەل يدەياسى قازاقستاننىڭ دامۋ جولىندا ماڭىزدى رولگە يە ەكەندىگىنە ەرەكشە كوڭىل بولىنگەن.