24 قاراشا كۇنى م.اۋەزوۆ اتىنداعى قازاق اكادەميالىق دراما تەاترىندا الاش ارداگەرى، مەملەكەت جانە قوعام قايراتكەرى ءاليحان بوكەيحانوۆتىڭ 150 جىلدىعىنا ارنالعان "الاشتىڭ ءاليحانى" اتتى سالتاناتتى كەش ءوتتى.

يۋنەسكو جىلدىڭ ەڭ مىقتى قايراتكەرى دەپ تانىعان ۇلى تۇلعانىڭ كەشىندە الماتى قالاسىنىڭ اكىمى باۋىرجان بايبەك، تاريح عىلىمدارىنىڭ دوكتورى، پروفەسسور، الاشتانۋشى- عالىم مامبەت قويگەلديەۆ ءسوز سويلەدى.

كەش بارىسىندا الاش ارداگەرىنىڭ ءومىرى مەن مەملەكەتتىك قىزمەتى تۋرالى دەرەكتى بەينەفيلم كورسەتىلىپ، قازاقستاننىڭ ەڭبەك سىڭىرگەن قايراتكەرلەرى رامازان ستامعازيەۆ، گۇلزات داۋىرباەۆا، ەركىن شۇكىمانوۆ، ءاليحاننىڭ تۋعان وڭىرىنەن 150 جىلدىق مەرەيتويعا ارنايى كەلگەن داۋرەنبەك اركەنوۆ، بەلگىلى ءانشى فارحاد كۋبەەۆ، ت.ب. ونەر شەبەرلەرى قاتىستى.

كونتسەرت بارىسىندا "وتىرار سازى" مەملەكەتتىك اكادەميالىق ەتنگرافيالىق-فولكلورلىق وركەسترى قۇرمانعازى، تاتتىمبەت. نۇرعيسا تىلەنديەۆتىڭ كۇيلەرىن ورىندادى. ع.مۇسىرەپوۆ اتىنداعى جاستار مەن جاسوسپىرىمدەر تەاترىنىڭ اكتەرلەرى ءاليحان بوكەيحانوۆتىڭ ومىرىنە قاتىستى قويىلىم جاسادى.

مازمۇندى، ماعىنالى وتكەن مۋزىكالىق-پوەتيكالىق كەشتى الماتى قالاسىنىڭ اكىمدىگى ۇيىمداستىردى.

Abai.kz