وڭتۇستىك قازاقستان وبلىسىنىڭ əكىمى جانسەيىت تۇيمەباەۆ ءىس-شارادا جاۋراپ تۇرعان قىزداردى كورىپ، جانى اشىپ كەتتى دەپ حابارلايدى NUR.KZ پورتالىنىڭ وڭىردەگى ءتىلشىسى.

جانسەيىت تۇيمەباەۆ وڭتۇستىك قازاقستان وبلىسىنا قاراستى ارىس قالاسىنداعى جاڭا دەندروساياباقتىڭ لەنتاسىن قيدى. دەمالىس ورنىنىڭ اشىلۋ سالتاناتىنا جينالعان قاتىسۋشىلاردىڭ كۇننىڭ سۋىعىندا جەڭىل كويلەكپەن جاۋراپ تۇرعان قىزداردى نازارىنا العان تۇيمەباەۆقا شارانى ۇيىمداستىرۋشىلار جاقپاي قالدى.

كەز كەلگەن ۇلتتىق كيىمنىڭ جازدىق جəنە قىستىق ءتۇرى بولاتىنىن ەسكە سالعان ايماق باسشىسى بۇل əرەكەتتى اسىرا سىلتەۋشىلىك دەپ، كونتسەرتتىك باعدارلامانى توقتاتىپ تاستادى.

"اعايىندار-تۋعاندار، كەز كەلگەن ۇلت جازدا جازدىق، قىستا قىستىق كيىممەن شىعادى. سىزدەردىڭ كيگەندەرىڭىز جازدىق كيىمدەر. قىزدارىمىز ءبۇرىسىپ تۇر. بۇنداي اسىرا سىلتەۋ بولماسىن. بارلىقتارىڭىزعا اماندىق تىلەيمىن", - دەگەن وبلىس əكىمى دەندروساياباقتا اعاش وتىرعىزدى.

ايتا كەتەيىك، لەنتاسى قيىلعان دەندروساياباقتىڭ قۇرىلىسى وتكەن جىلدىڭ تامىز ايىندا باستالىپ، تۋرا ءبىر جىل ىشىندە قۇرىلىس جۇمىستارى اياقتالعان. الايدا كوپشىلىك سەرۋەندەۋگە ارنالعان ورىن قىستىڭ قاقاعان سۋىعىندا پايدالانۋعا بەرىلدى.

Abai.kz