ەلباسى قازاقستاننىڭ الەۋمەتتىك-ەكونوميكالىق دامۋى جونىندە كەڭەس وتكىزدى، - دەپ حابارلايدى اباي-اقپارات.

كەڭەسكە پرەمەر-مينيستر ب.ساعىنتاەۆ، پرەزيدەنت اكىمشىلىگىنىڭ باسشىسى ءا.جاقسىبەكوۆ، ۇلتتىق بانك توراعاسى د.اقىشەۆ، پرەمەر-ءمينيستردىڭ ءبىرىنشى ورىنباسارى ا.مامين، پرەمەر-ءمينيستردىڭ ورىنباسارى اۋىل شارۋاشىلىعى ءمينيسترى ا.مىرزاحمەتوۆ، پرەمەر-ءمينيستردىڭ ورىنباسارى ي.تاسماعامبەتوۆ، پرەزيدەنتتىڭ كومەكشىسى ءا.سمايىلوۆ، دەنساۋلىق ساقتاۋ جانە الەۋمەتتىك دامۋ ءمينيسترى ت.دۇيسەنوۆا، قارجى ءمينيسترى ب.سۇلتانوۆ، ۇلتتىق ەكونوميكا ءمينيسترى ق.بيشىمباەۆ قاتىستى.

ءىس-شارا بارىسىندا ماڭىزدى باعدارلامالىق قۇجاتتارعا قاتىستى نەگىزگى ۇستانىمدار قاراستىرىلدى.
مەملەكەت باسشىسى جينالعاندارعا ارناعان سوزىندە بيىلعى قىركۇيەكتە ۇكىمەتتىڭ كەڭەيتىلگەن وتىرىسىندا ءتيىستى تاپسىرمالار بەرىلگەنىن ايتتى.

نۇرسۇلتان نازارباەۆ اگرارلىق سالا ماسەلەلەرى جان-جاقتى قاراستىرۋدى تالاپ ەتەتىنىن اتاپ ءوتتى. ءونىم كولەمىن ۇلعايتۋ، ونىمدىلىكتى ارتتىرۋ، اۋىل شارۋاشىلىعى ءوندىرىسىن ءارتاراپتاندىرۋ، ازىق-تۇلىك يمپورتىن ازايتۋ، وڭدەلگەن ءونىم ەكسپورتىن كوبەيتۋ جانە اۋىل شارۋاشىلىعى كووپەراتسياسىن جەتىلدىرۋ اگروونەركاسىپ كەشەنىن دامىتۋ جونىندەگى مەملەكەتتىك باعدارلامانىڭ باسىمدىعى بار باعىتتارى بولىپ سانالادى.

ءبىزدىڭ وڭدەۋشى كاسىپورىندارىمىز 30-40% جۇكتەمەمەن جۇمىس جۇرگىزۋدە. ولاردىڭ جۇمىسىنىڭ تولىق قۋاتتىلىعىنا جەتۋىن قامتاماسىز ەتۋ ءۇشىن شيكىزات كەرەك، ونىڭ جەتكىزىلەتىن مولشەرىن ارتتىرۋ ءۇشىن اۋىل شارۋاشىلىعى كووپەراتسياسىن دامىتۋ قاجەت، دەدى قازاقستان پرەزيدەنتى.

سونداي-اق، ەلباسى ءوزىن-ءوزى جۇمىسپەن ءتيىمسىز قامتىپ وتىرعانداردىڭ ۇلەسى ەداۋىر ەكەنىن اتاپ ءوتتى.
حالىقتىڭ بۇل ساناتى ءوزىن-ءوزى جۇمىسپەن ءتيىمدى تۇردە قامتۋ ءۇشىن جۇيەلى شارالار قابىلداۋ قاجەت. جۇمىسسىزداردى بوس جۇمىس ورىندارى بار جەرلەرگە تارتۋ كەرەك. وڭىرلەردەگى ازاماتتار جۇمىسپەن قامتۋ باعدارلامالارى جانە بوس ورىندار تۋرالى بىلۋگە ءتيىس، دەدى مەملەكەت باسشىسى.

سونىمەن بىرگە، نۇرسۇلتان نازارباەۆ اۋىل جاستارىن قايتا دايارلاۋ جانە اۋىلداعى جۇمىسپەن قامتىلۋ دەڭگەيىن ارتتىرۋدىڭ ماڭىزدىلىعىنا توقتالدى.

كەڭەس اياسىندا پرەمەر-ءمينيستردىڭ ورىنباسارى اۋىل شارۋاشىلىعى ءمينيسترى ا.مىرزاحمەتوۆ، دەنساۋلىق ساقتاۋ جانە الەۋمەتتىك دامۋ ءمينيسترى ت.دۇيسەنوۆا جانە ۇلتتىق ەكونوميكا ءمينيسترى ق.بيشىمباەۆ بايانداما جاسادى.

كەڭەس قورىتىندىسى بويىنشا نۇرسۇلتان نازارباەۆ ازىرلەنىپ جاتقان باعدارلامالىق قۇجاتتاردىڭ تۇجىرىمدىق ۇستانىمدارىن ماقۇلداپ، بارلىق ماسەلەنى مۇددەلى تاراپتارمەن ءوزارا كەلىسىپ، مۇقيات قاراستىرۋدى تاپسىردى.

اباي-اقپارات