بۇگىن وبلىس اكىمدىگىندە وڭتۇستىك قازاقستان وبلىسىنىڭ اكىمى جانسەيىت تۇيمەباەۆ پەن تۇركيانىڭ مادەنيەت جانە تۋريزم مينيسترلىگىنىڭ ترەنەر شەبەرلەرى - دجەززيم وزدەمير جانە مۋرات وزەن، سونداي-اق، تۇركياداعى تۋراگەنتتىكتەر قاۋىمداستىعىنىڭ ۋاكىلەتتى وكىلى چەري ەردالدىڭ كەزدەسۋى ءوتتى. وڭتۇستىكتەگى تۋريزم سالاسىنىڭ ماماندارىن وقىتۋعا كەلگەن دەلەگاتسيا مۇشەلەرىمەن بولعان وتىرىستا تاراپتار ايماقتاعى اتالمىش سالانى دامىتۋ جايىن تالقىلادى.

باسقوسۋدا ءوڭىر باسشىسى وبلىستىڭ تۋريستىك الەۋەتىنىڭ جوعارى ەكەنىن ايتىپ، تۇركيالىق تۋريزم سالاسى بىلگىرلەرىنىڭ بۇل سالادا مول تاجىريبەسى بارىن جەتكىزدى.

ء«بىز تۋىسقان تۇرىك اعايىندارمەن تاجىريبە الماسۋعا نيەتتىمىز. ويتكەنى، تۇركيادا سوڭعى ۋاقىتتا تۋريزم سالاسى جاقسى دامىپ كەلەدى. مىسال كەلتىرسەك، كەيىنگى جىلدارى تۇركياعا 40 ملن. تۋريست كەلگەن. انتاليا مەن الانيانىڭ وزىندە ينفراقۇرىلىمى جولعا قويىلعان جانە قىزمەت كورسەتۋ دەڭگەيى جوعارى 1500-دەن استام ءۇش جۇلدىزدى، ءتورت جۇلدىزدى جانە بەس جۇلدىزدى قوناق ۇيلەر بار. سوندىقتان، بىزگە ولاردىڭ تاجىريبەسىن پايدالانۋ كەرەك»، - دەدى اكىم.

وڭتۇستىك قازاقستان وبلىسىنداعى تۋريستىك فيرمالاردىڭ قىزمەت كورسەتۋ دەڭگەيىن جاقسارتۋ ءۇشىن اپتالىق وقۋ كۋرسىن وتكىزۋگە كەلگەن تۇرىك دەلەگاتسياسى تۋريستىك وپەراتورلاردىڭ بىلىكتىلىگىن جەتىلدىرۋ، مەيرامحانا بيزنەسىنە باۋلۋ جانە قوناق ءۇي مەنەدجمەنتىنە ۇيرەتۋ تاقىرىپتارىنان تۇراتىن ءۇش كەزەڭدى شەبەرلىك دارىستەرىن وتكىزبەك. وعان 70-تەن استام تۋريزم سالاسىنداعى ماماندار قاتىسادى.

ايتا كەتۋ كەرەك، اتالعان وقۋ كۋرسى «وڭتۇستىك قازاقستان وبلىسىنىڭ تۋريزم يندۋسترياسىن دامىتۋ قاۋىمداستىعى» مەن تۇركيانىڭ تۋراگەنتتىكتەر قاۋىمداستىعى جانە تۋريستىك اقپاراتتىق ورتالىعىنىڭ كەلىسىمى ناتيجەسىندە جۇزەگە اسىرىلىپ وتىر.

اپتالىق وقىتۋ جۇمىستارىنان سوڭ، كۋرستى ءساتتى اياقتاعان قاتىسۋشىلارعا ارنايى سەرتيفيكاتتار تابىس ەتىلمەك.

Abai.kz