بۇگىن پارلامەنتتىڭ بىرىككەن وتىرىسىندا ءماجىلىس دەپۋتاتى قۋانىش سۇلتانوۆ استانانىڭ اتاۋىن وزگەرتۋدى ۇسىنعانى تۋرالى جازعان ەدىك.

ساياساتتا سابەت وكىمەتىنەن بەرى جۇرگەن سۇلتانوۆ ەلباسىنىڭ ەڭبەگىن ەلەپ، ەلوردانى «نازارباەۆ» قالاسى دەپ وزگەرتۋدى ۇسىندى.

ءسويتىپ، قۋانىش مىرزانىڭ ۇسىنىسىن ارىپتەستەرى دە قولداپتى. تاۋەلسىزدىك دەكلاراتسياسىن قابىلداۋعا ارنالعان جيىن سوڭى دەپۋتات سۇلتانوۆتىڭ ۇسىنىسىن قابىلداۋمەن اياقتالدى. بۇل باستاما ەل ىشىندە دە قىزۋ تالقىعا تۇسۋدە. ال دەپۋتاتتاردىڭ وزدەرى نە دەيدى؟

مىسالى، ماجىلىسمەن ماۋلەن اشىمباەۆ ەلوردانىڭ اتاۋىن وزگەرتۋ كەرەك دەپ وتىر.

«بۇل ماڭىزدى ءارى دۇرىس ۇسىنىس. ال ەندى بۇل پروتسەسس قالاي جۇزەگە اسادى دەگەنگە كەلسەك، ول جونىندە، ارينە، اقىلداسۋ كەرەك. قوعام وكىلدەرىمەن، جۇرتپەن اقىلداسۋ كەرەك»,-دەيدى اشىمباەۆ.

دەپۋتات زاعيپا باليەۆا دا بۇل ۇسىنىستى قولداۋشىلاردىڭ ساپىنان تابىلدى.

«مەنىڭشە استانانى «نازارباەۆ» قالاسى دەپ وزگەرتۋگە بولار ەدى»,-دەيدى باليەۆا حانىم.

ەستەرىڭىزدە بولسا، زاعيپا حانىم 2014 جىلى قازاقستان اتاۋىن «قازاق ەلى» دەپ وزگەرتۋدى ۇسىنعان بولاتىن.

ماجىلىستەگى تاعى ءبىر دەپۋتات پاۆەل كازانتسەۆ باق-قا سۇحبات بەرىپ، ارىپتەستەرىنىڭ باستاماسىن تولىق قولدايتىنىن ايتتى.

«قازىرگى ماقسات قالانىڭ اتاۋىن قالاي وزگەرتەمىز دەگەن ماسەلە. قالانى قالاي وزگەرتۋ كەرەك، بۇنى حالىق شەشۋى كەرەك. ول ءۇشىن دايىندىق جۇمىستارىن جۇرگىزۋ كەرەك. تاۋەلسىزدىكتىڭ 25 جىلدىعىنا قارسى ورايلاستىرۋ جوسپارلانىپ وتىر. قازىرگى جاعدايدا بۇل ماسەلەنى جىل بويى سوزىپ جۇرە بەرۋگە بولمايدى دەپ ويلايمىن»,-دەيدى كازانتسەۆ مىرزا.

كوپشىلىك الدىنا كۇندە كورىنە بەرمەيتىن سەناتور ميحايل بورتنيكتە بۇل جولى قاراپ قالماپتى.

«اتاۋدى ويلاستىرۋ كەرەك. قيىنداۋ، ارينە. دەگەنمەن تۇسىنىكتى عوي. مەن «استانا-ەلباسى» دەگەن اتاۋدى قالدىرار ەدىم. ءارى ادەمى ەستىلەدى، ءارى لايىقتى اتاۋ بولار ەدى»,-دەپتى بورتنيك.

دەپۋتات باقىتگۇل حامەنوۆا استانانىڭ اتاۋىن «ەلباسى» دەپ وزگەرتۋدى ۇسىنعان. سۇلتانوۆ «نۇرسۇلتان» قالاسى دەگەن يدەيانى ايتسا، سەناتور ۆلاديمير رەدكوكاشين سۇلتانوۆتىڭ ۇسىنىسىن قولداعان.

"ەلورداعا ەلباسىنىڭ ەسىمىن بەرۋ ءادىل ۇسىنىس", - دەيدى دەپۋتات بەكبولات تىلەۋحان دا.

«جالپى بۇل ءبىرىنشى رەت ۇسىنىلىپ وتىرعان جوق. وسى ماسەلەنى كەزىندە پارلامەنت دەپۋتاتى ءسات توقپاقباەۆتىڭ (2008 جىلى ەلباسىنىڭ اتىمەن اتاۋدى ۇسىنعان. - ن.ت.) تاراپىنان كوتەرىلگەن بولاتىن. شيرەك عاسىرلىق مەرەكەنىڭ قارساڭىندا بۇل باستامانى جەكە ءوز باسىم قولدايمىن. نەگە دەسەڭىز، بۇل تاريحتا بار جاعداي. مەملەكەتتى قۇرعان ادامنىڭ ەسىمىمەن قالانى اتاۋ تاجىريبەسى بار. ماسەلەن، ۆاشينگتون قالاسى بارشاعا ءمالىم. نۇرسۇلتان اتىنداعى قالانىڭ بولعانى تاۋەلسىزدىكتىڭ سيمۆولى ىسپەتتەس. تاۋەلسىز قازاقستان مەن نازارباەۆتىڭ اتى سينونيمدەر سياقتى. مەنى جاعىندى نەمەسە باسقا دەپ تۇسىنسەڭىزدەر، وزدەرىڭىز بىلىڭىزدەر، بىراق تاريحي كوزقاراسپەن جانە ەگەمەندى ەلدىڭ ازاماتى رەتىندە، مۇنى وتە ءبىر ءادىل ۇسىنىس دەپ ويلايمىن»، - دەدى دەپۋتات.

نۇرزات توعجان

Abai.kz