وڭتۇستىك قازاقستاندا ەل تاۋەلسىزدىگىنىڭ 25 جىلدىعى مەن اۋىل شارۋاشىلىعى ەڭبەككەرلەرىنىڭ كۇنىنە ارنالعان ءداستۇرلى «التىن كۇز - 2016» سالتاناتتى شاراسى بولىپ ءوتتى. اۋىل شارۋاشىلىعى سالاسىنىڭ جەتىستىكتەرى باياندالعان مەرەكەگە كەلۋشىلەردى وبلىس اكىمى جانسەيىت تۇيمەباەۆ قۇتتىقتاپ، بيىلعى جىلدىڭ ءوڭىر شارۋالارىنا بەرەكەلى بولعانىن اتاپ ءوتىپ، شارۋالارعا قۋانىشتى حابار رەتىندە كەلەر جىلعا 6 ملرد. 47 ملن. تەڭگە سۋبسيديا بولىنگەنىن جەتكىزدى.

وبلىس باسشىسى ءتۇرلى اۋىل شارۋاشىلىق ونىمدەرىن وندىرۋدەن ءى ورىن العان وزات اۋدان، قالالاردى اتاپ، ارنايى ءمۇسىن مەن وبلىس اكىمىنىڭ سەرتيفيكاتتارىن تابىستادى. ماسەلەن، استىق وندىرۋدە قازىعۇرت اۋدانىنا ەشكىم تەڭ كەلمەسە، جۇگەرى وندىرۋدە وتىرار اۋدانى، ماقسارىدا تولەبي، وڭتۇستىكتىڭ برەندى بولىپ تابىلاتىن ماقتا بويىنشا ماقتارال اۋدانى ۇزدىك دەپ تانىلدى. ال باقشا ونىمدەرىن جيناۋ بويىنشا شاردارالىقتار كوش باستاسا، كوكونىستە سارىاعاش، جەمىس-جيدەكتە تۇلكىباس، ءسۇت ارىس قالاسى، ەت وندىرۋدە ورداباسى شارۋالارىنىڭ مەرەيى ۇستەم بولدى. «سىباعا» باعدارلاماسىنىڭ ورىندالۋى جونىنەن تۇركىستاندىقتار ەرلەپ، «التىن اسىق» باعدارلاماسى شەڭبەرىندە بايدىبەك وزىق شىقتى. ال وزىق ينۆەستيتسيالىق جوبالاردى ىسكە اسىرۋدا شىمكەنت قالاسى باسىم بولسا، اۋىل شارۋاشىلىعى جارمەڭكەسىن ۇيىمداستىرۋدا سايرام ورلەپ، اۋىل شارۋاشىلىعى سالاسىنىڭ دامۋىنا عىلىمي تۇرعىدان ۇلەس قوسۋدان ماقتارالدىڭ بەدەلى بيىك بولدى.

ايتا كەتەيىك، وبلىستا ماقتانىڭ 80 پايىزىن ماقتارال اۋدانى ءوندىرىپ وتىر. ارينە، عىلىم مەن ەڭبەكتى ۇشتاستىرعان ساتتە كەز كەلگەن قامالدى باعىندىرۋعا بولادى. ماقتا شارۋاشىلىعىنداعى عىلىمي-زەرتتەۋلەردى دامىتۋ ارقىلى وتاندىق باسەكەگە قابىلەتتى ماقتانىڭ جاڭا سورتتارىن شىعارۋ، ماقتا ءوندىرۋدىڭ تيىمدىلىگىن، يننوۆاتسيالىق تەحنولوگيالاردى وندىرىسكە ەندىرۋمەن ماقتارال اۋدانىندا قازاق ماقتا شارۋاشىلىعى عىلىمي-زەرتتەۋ ينستيتۋتىنىڭ عالىمدارى اينالىسىپ، بىرقاتار جەتىستىكتەرگە جەتتى.

Abai.kz