جۇرت ەسىندە ەرەكشە باستامالارىمەن كورىنىپ جۇرگەن ءماجىلىس دەپۋتاتى قۋانىش سۇلتانوۆ استانانىڭ اتاۋىن وزگەرتۋدى ۇسىندى. بۇل تۋرالى «Tengrinews.kz» ءتىلشىسى حابارلايدى. دالىرەك ايتساق، دەپۋتات ەندىگى جىلى ەكسپو وتەتىن ەلوردانى ەلباسىنىڭ ەسىمىمەن بايلانىستىراتىن اتاۋ كەرەكتىگىن العا تارتىپ وتىر. حوشىندا، قۋانىش اتا سۇلتانوۆتىڭ ءسوزى الەمنىڭ تۇكپىر-تۇكپىرىنەن اعىلىپ كەلەتىن تۋريستەرگە استانانىن ايرىقشا اتالعانى قاجەت بولسا كەرەك-ءتى.

استانانى نازارباەۆ ەسىمىمەن بايلانىستىرۋ – تاۋەلسىزدىكتىڭ 25 جىلىنداعى ەڭ ۇتقىر ۇسىنىس بولدى. بۇل جولى قۋانىش سۇلتانوۆ بىردەن ءۇش ۇسىنىس جاساپتى.

ونىڭ ءبىرىنشىسى ەلوردادا «تاۋەلسىزدىك مونۋمەنتىن» ورناتۋ.  «تاۋەلسىزدىككە قالاي جەتكەنىمىز ماڭگى ەستە قالۋى كەرەك. سوندىقتان دا ەلوردادا "تاۋەلسىز قازاقستان" مونۋمەنتىن ورناتۋ كەرەك»،-دەيدى سۇلتانوۆ.

ەكىنشىسى، كونستيتۋتسيادا ەلباسىنىڭ ەسىمىن ەرەكشە اتاپ كورسەتۋ كەرەك ەكەن. تاراتىپ ايتار بولساق، تاۋەلسىز قازاقستاننىڭ تۇڭعىش پرەزيدەنتى ءام ونىڭ مەملەكەتىمىزدى، سونىڭ ىشىندە ەلوردانى سالۋعا قوسقان ۇلەسى ءۇشىن كونستيتۋتسيادا اتى اتالۋى كەرەك. بۇل - دەپۋتات سۇلتانوۆتىڭ سوڭعى ءسوزى ەمەس. سونداي-اق، «ەلباسىنىڭ ەسىمىن ەلوردا اتاۋىندا جانە ەلىمىزدەگى ماڭىزدى نىسانداردا كورسەتۋدى ۇسىنامىن»,-دەيدى دەپۋتات.   

ەلوردانىڭ اتاۋىن وزگەرتۋ ماسەلەسى بۇعان دەيىن بىرنەشە مارتە كوتەرىلگەن-ءدى. اسىرەسە، 2013 جىلى ۇلتتىق عىلىم اكادەمياسىنىڭ اكادەميگى سۇلتان سارتاەۆ استانانى – "نۇرسۇلتان" دەپ وزگەرتۋ كەرەك دەگەن ۇسىنىس بىلدىرگەن. الايدا ول كەزدە اكادەميكتىڭ ۇسىنىسى قولداۋ تاپپاعان بولاتىن.

ودان ءسال ەرتەرەكتە ءازىربايجان ەلشىسى استانانى «سۇلتان-اتا» دەپ اتاۋدى ۇسىنعان. ول 2009 جىلى بولعان.

ال وسى جولى قۋانىش سۇلتانوۆتىڭ سارابدال ساياساتى ءۇشىن ەلباسىنىڭ ەسىمىن ەرەكشە ۇلىقتاۋ تۋرالى باستاماسىن سەكسەننەن سەكىرىپ وتكەن كوممۋنيست-دەپۋتات ۆلاديسلاۆ كوسارەۆ تە قولداپتى.

تاعى ءبىر دەپۋتات يرينا ارونوۆا ەلباسىنىڭ ەسىمىن كونستۋيتۋتسياعا كىرگىزۋدى قوس قولداپ قولدايتىندىعىن  بىلدىرگەن.

«ەگەر ەلباسىنىڭ ەسىمى كونستيتۋتسيادا انىق كورىنىس تاباتىن بولسا – بۇل ادىلەتتى بولار ەدى»،-دەيدى دەپۋتات ارونوۆا.

ايتا كەتەيىك، دەپۋتاتتار دەكلاراتسيا قابىلداپ جاتىر. ول تاۋەلسىزدىكتىڭ 25 جىلدىعىنا ارنالعان. قوس پالاتانىڭ بىرلەسكەن وتىرىسىندا 107 دەپۋتاتتىڭ 104-ءى قاتىستى. ولاردىڭ 47-ءى سەناتتان كەلگەندەر. سونداي-اق، ۇكىمەت باسشىسى، مەملەكەتتىك حاتشى، پرەزيدەنت اكىمشىلىگى، كونستيتۋتسيالىق كەڭەس پەن جوعارعى سوت، ورتالىق سايلاۋ كوميسسياسى باسشىلارى دا اتالعان جيىنعا ساقاداي ساي بولىپ كەلىپتى.  

نۇرگەلدى ابدىعانيۇلى

Abai.kz