بۇگىن وڭتۇستىك قازاقستاندا «ۇلى دالا ەلى - تاۋەلسىزدىكتىڭ 25 نەگىزى» 25 جۇلدىزدى كۇندەرىنىڭ ەكىنشىسى – «مەملەكەتتىك رامىزدەر» كۇنى رەتىندە اتالىپ ءوتتى. بۇل تۋرالى «اباي اقپارات» حابارلايدى.

وسىعان وراي، بۇگىن شىمكەنتتىڭ بەلسەندى جاستارى ەرەكشە فلەشموب ۇيىمداستىردى. قالا ورتالىعىنداعى ىرگەلى وقۋ ورنىنىڭ ءبىرى م.اۋەزوۆ اتىنداعى وقمۋ-دىڭ 250 ستۋدەنتى قاتار تۇرىپ "مەن قازاقستاندى سۇيەمىن» دەگەن جازۋ قۇراستىردى. مۇنداي شارالار بارلىق اۋدان، قالالارداعى وقۋ ورىندارىندا ۇيىمداستىرىلدى.

سونىمەن بىرگە، «I LOVE KZ» جالپىۇلتتىق فلەشموبى اياسىندا الەۋمەتتىك جەلى بەلسەندىلەرى مەن قولدانۋشىلارى قازاقستان تۋىمەن سەلفي جاساپ، رامىزدەر كۇنىن ۇلىقتاۋدى ودان ءارى جالعاستىردى.

وبلىس كولەمىندە باستاۋ العان 25 جۇلدىزدى كۇننىڭ ەكىنشى تاڭىن 600 مىڭعا جۋىق جاس ءبىر مەزەتتە ءانۇران ايتىپ اتىردى. مەكتەپتەر مەن جوعارعى وقۋ ورىندارىندا ۇيىمداستىرىلعان ۇلتتىق رامىزدەرىمىزدى ۇلىقتاۋ شاراسى كەزىندە ءبىر عانا كەنتاۋ قالاسىنىڭ وزىندە كوپشىلىككە كولىك پەن تورگە ىلىنەتىن مىڭعا تارتا تۋ تاراتىلدى.

ەگەمەندى ەلدىگىمىزدىڭ نىشانىنا اينالعان رامىزدەردى قۇرمەتتەۋ شارالارى مۇنىمەن اياقتالعان جوق. وبلىستاعى بارلىق اۋدان، قالالاردا «مەملەكەتتىك رامىزدەرگە قۇرمەت» اتتى جاستار اراسىندا دوڭگەلەك ۇستەلدەر ۇيىمداستىرىلىپ، «مەن قازاقستاندىقپىن» شىعارمالار بايقاۋى ءوتتى.

Abai.kz