يسلام كاريموۆتىڭ قىزى گۇلنارا كاريموۆا قايتىس بولىپتى. بۇل تۋرالى ءور ۇقك قىزمەتكەرى مالىمدەگەن. Inozpress.kg دەرەكتەرىنە  نازار اۋدارساق گۇلنارانى الدەكىمدەر ۋلاپ ولتىرگەن. وقيعا 5-قاراشادا بولعان-مىس.

دەسەك تە وزبەكستاننىڭ قۇزىرلى ورگاندارى 44 جاستاعى گۇلنارا يسلامقىزىنىڭ قازاسى تۋرالى ناقتى اقپارات بەرمەگەن. ۇزىن-قۇلاقتىڭ ايتۋىنشا ەكس-پرەزيدەنتتىڭ قىزى تاشكەنتتەگى «مينور» بەيىتىنە جەرلەنىپتى.

گۇلنارانىڭ جوعالىپ كەتۋىنە قاتىستى الەۋمەتتىك جەلىدە ارقيلى اڭگىمە ايتىلۋدا. «تۆيتتەر» جەلىسىندە «گۇلنارانى كورسەتىڭدەر» دەگەن توپ قۇرىلىپ، ورتالىق ازياداعى باق وكىلدەرىن، حالىقارالىق ساراپشىلاردى گۇلنارانىڭ ءتىرى نە ءولى ەكەنىن انىقتاۋعا شاقىرعان. الەۋمەتتىك جەلى قولدانۋشىلارى «گۇلنارا كاريموۆا ءتىرى بولسا، جۇرت الدىنا شىقسىن يا بولماسا بەينە جولداۋ جاساسىن» دەگەن ۇراندار ايتۋدا.

ال گۇلنارا كاريموۆانىڭ اتىنان ءتۇرلى اككاۋنتتار اشىلىپ، ونىڭ ءتىرى ەكەنىن ايتىپ، ەسكى سۋرەتتەردى سالىپ وتىرعانداردىڭ ءبىرسىپىراسىن «ازاتتىقتىڭ» وزبەك قىزمەتى انىقتاعان. بۇل جۇرت ىشىندە پرەزيدەنتتىڭ قىزى قايتىس بولىپتى دەگەن كۇماندى ودان سايىن ورشىتە تۇسكەن. ال وزبەكستان پرەزيدەنتىنىڭ اپپاراتى بۇعان قاتىستى ء«لام-ميم» دەمەپتى.

سونىمەن وزبەكستان حانشايىمى ءتىرى مە، الدە...

گۇلنارا كاريموۆا وزبەكستانداعى ىقپالدى ادامداردىڭ ءبىرى. ءتىپتى 2013 جىلى ەۋروپاداعى جەمقورلىققا قاتىستى جانجالدا ءدال وسى گۇلنارانىڭ اتى اتالىپ قالعان-تىن. شۆەيتساريادا ونىڭ ەسەپ-شوتى تاركىلەندى. ول كەزدە «TeliaSonera» شۆەد-فين تەلەكوممۋنيكاتسيالىق كومپانياسىنان وزبەكستان اۋماعىندا جۇمىس جۇرگىزۋگە رۇقسات بەرگەن. سول ءۇشىن 320 ميلليون دوللار كولەمىندە سىياقى العان. ءسويتىپ، گۇلەكەڭ ەۋروپاعا كىرۋگە مۇلدە بولمايتىنداردىڭ ساپىنا كىردى.

سوڭعى جىلدارى قولى قىسقارىپ، تاشكەنتتەن ۇزاپ شىعا الماعان گۇلەكەڭ ءوزىنىڭ اناسى تاتيانانى، ءسىڭىلىسى لولا مەن ءور ۇقك كەيبىر دوكەيلەرىن ايىپتاپ، الەۋمەتتىك جەلىدە سوعىس اشتى. وزبەكستان پرەزيدەنتىنىڭ كرەسلوسىنا تالاس-تارتىستىڭ باستالعانىن دا ءدال وسى گۇلنارا ايتقان بولاتىن. ەڭ سوراقاسى گۇلەكەڭ ءوزىنىڭ ومىرىنە قاۋىپ تونگەنىن جانە تاققا تالاستا قارسىلاستارى ونى ولتىرۋدەن تايىنبايتىنىن ايتىپتى. سويتكەن گۇلەكەڭ ەندى ءىز-ءتۇسسىز جوعالىپ كەتتى.

2014 جىلى گۇلەكەڭنىڭ تاشكەنتتەگى ءۇيىن ارنايى جاساق باسىپ كىرگەن-ءتىن. ول كەزدە كۇيەۋى رۋستام مادۋماروۆ، بيزنەس-سەرىكتەسى گايانە اۆاكيان تۇرمەگە توعىتىلىپ، ءوزى مەن بالالارى ءۇي قاماققا الىنعان.

ءۇي قاماقتاعى گۇلنارا العاشقى ۋاقىتتاردا اراگىدىك باق-قا سۇحباتتار بەرىپ، ءوزىنىڭ بار ەكەنىن ءام ءتىرى ەكەنىن بىلدىرگەنىمەن، 2015 جىلدان بەرى مۇلدە كورىنبەدى.

2-قىركۇيەك كۇنى يسلام كاريموۆتىڭ قازاسىنا گۇلنارا مەن ونىڭ بالالارى كەلمەدى. جەرلەۋ ءراسىمى سامارقاندا وتكەن-ءتىن. ال وزبەكستاننىڭ اتقارۋشى ءام بولاشاق پرەزيدەنتى شاۆكات ميرزيەەۆ پارلامەنتتە كاريموۆتىڭ قازاسىنا كوڭىل ايتقاندا گۇلنارانىڭ ەسىمىن مۇلدە اتاماپتى. قۇددى يسلام اتانىڭ جالعىز قىزى بولعانداي.

نۇرزات توعجان

Abai.kz