اۋىلشارۋاشىلىق ءونىم كولەمى – 383,6 ميلليارد
وقو-نىڭ اۋىلشارۋاشىلىق ءونىم كولەمى – 383,6 ميللياردتى قۇرادى. بۇل تۋرالى «اباي اقپارات» وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.
وڭتۇستىك قازاقستان وبلىسى ەكونوميكاسىنىڭ نەگىزگى باعىتتارىنىڭ ءبىرى - اۋىل شارۋاشىلىعى سالاسى. رەسپۋبليكا بويىنشا اۋىل شارۋاشىلىعىندا وبلىستىڭ ۇلەسى 13 پايىزدى قۇرايدى. قۋانىشقا قاراي وبلىستاعى اۋىلشارۋاشىلىق ونىمدەرى جىلدان جىلعا ارتۋمەن كەلەدى. بۇعان، ارينە، مەملەكەتتىڭ، مەملەكەتتىك باعدارلامالاردىڭ سەبەپ بولىپ جاتقانى ءسوزسزى.
قاڭتار - قازان ايلارىندا ءوڭىردىڭ اۋىل شارۋاشىلىعى سالاسىنداعى جالپى ءونىم كولەمى 383,6 ملرد.تەڭگەنى قۇراپ، وتكەن جىلدىڭ ءتيىستى كەزەڭىمەن سالىستىرعاندا 83,2 ملرد. تەڭگەگە ارتتى. ناقتى كولەم يندەكسى 101,2 پايىز. سالاعا تارتىلعان ينۆەستيتسيالاردىڭ كولەمى 5,8 ملرد.تەڭگەگە جەتىپ، وتكەن جىلدىڭ ءتيىستى كەزەڭىمەن سالىستىرعاندا 1,6 ەسەگە ارتتى.
وسىمدىك شارۋاشىلىعىندا اۋىل شارۋاشىلىعى داقىلدارى وتكەن جىلدان 12,8 مىڭ گەكتارعا ارتىپ، 788,6 مىڭ گەكتاردى قۇرادى. نەگىزگى داقىلداردىڭ ەگىس كولەمى ءداندى داقىلدار – 260,0 مىڭ، مايلى داقىلدار – 80,8 مىڭ، كوكونىس – 40,4 مىڭ، باقشا – 59 مىڭ، كارتوپ - 15,3 گا، ماقتا – 109,6 مىڭ گەكتارعا ورنالاستىرىلعان-دى. داقىلداردىڭ باسىم بولىگى العاشقى قارعا دەيىن ىسىراپسىز جينالىپ الىندى.
Abai.kz
