قر پرەمەر-مينيستر  باقىتجان ءابدىرۇلى ۇكىمەت ساعاتىندا جەتى ءوڭىردىڭ اكىمىن «جەلكەلەپ» الدى.

قىسقا دايىندىقتىڭ جوقتىعى اكىمدەردىڭ سالعىرتتىعىنان با، الدە ۇكىمەتتە الدەنەشە رەت ايتىلعان جىلۋ ماۋسىمىنا دايىندىققا جاۋاپتى مەكەمەلەردىڭ بەيقامدىعىنان با، ايتەۋىر ۇكىمەت باسشىسىنىڭ ءۇنى قاتقىل شىقتى.

راسىندا، ۇكىمەتتىڭ سەلەكتورلى وتىرىستارىندا باقىتجان ءابدىرۇلىنا ەسەپ بەرىپ، «جىلىتۋ ماۋسىمىنا ساقاداي سايمىز» دەگەن اكىمدەردىڭ انتتارى ادىرە قالعان-دى. ەندى مانە، قاراشا ورتايماي جاتىپ، قاقاعان قىس كەلىپ، ابىر-سابىرعا تۇسكەن اكىمدەر اقتالىپ باقتى. كەيبىر وڭىرلەردە قاھارىنا مىنگەن قىستىڭ ايازىنا شىداماعان جىلۋ قۇبىرلارى ىستەن شىققان كورىنەدى. سوندىقتان تۇرعىن ۇيلەر مەن الەۋمەتتىك نىساندارعى مۇلدە جىلۋ بەرىلمەگەن.

باقىتجان ساعىنتاەۆقا ەسەپ بەرگەن پاۆلودار، قاراعاندى، قوستاناي شىعىس قازاقستان، سولتۇستىك قازاقستان، اقمولا وبلىستارىنىڭ جانە الماتى قالاسىنىڭ اكىمى بولعان جايدى بايانداپ، جىلۋ بەرۋ جۇمىستارىن دەرەۋ قالىپقا كەلتىرەتىندىكتەرىن ايتقان.

«قۇرمەتتى ارىپتەستەر، اكىم مىرزالار، سىزدەردىڭ ايتۋلارىڭىزشا قىس ەندى عانا باستالدى. باستالعاندا دا وڭاي بولمادى. سوندىقتان جىلۋ بەرۋ ماۋسىمىن باستان اياق باقىلاۋدا ۇستاڭىزدار. ءاربىر ۇيگە جىلۋ بەرىلۋى ءتيىس. اسقار ۇزاقبايۇلى، وسى ماسەلەنى سىزگە مىندەتتەيمىن»،-دەدى باقىتجان ءابدىرۇلى.

Abai.kz